عالىمدار الەمدى دۇرلىكتىرگەن ۇلى بريتانيالىق ۆيرۋستىڭ قاۋپىن باعالادى

وتكەن اپتانىڭ سوڭىندا ۇلى بريتانيالىق ۇكىمەت شۇعىل كەڭەس وتكىزىپ، كوروناۆيرۋستىڭ مۋتاتسيالانعان(وزگەرگەن) ءتۇرى «ادەتتەگىدەن 70 پايىزعا تەز جۇعاتىنىن» جانە «جاعداي باقىلاۋدان شىققانىن» مالىمدەگەن.

الايدا ماماندار جاعدايدى باعالاۋدا ۇستامدى بولىپ وتىر. ۆيرۋسولوگ الەكساندر كەكۋلە MDR Aktuell-گە بەرگەن سۇحباتىندا ۇلى بريتانيادا انىقتالعان ۆيرۋستىڭ مۋتاتسياسى تەز جۇعاتىنىن دالەلدەيتىن بەلگىلەردى اتادى:

«مىسالى لوندوندا ناۋقاستاردىڭ جارتىسى ۆيرۋستىڭ جاڭا ءتۇرىن جۇقتىرىپ كەلگەن»، - دەيدى ول.

«جاعدايدى ۋشىقتىرعان مۋتاتسيا». ۇلى بريتانيادا تاراپ جاتقان كوروناۆيرۋستىڭ جاڭا ءتۇرى تۋرالى نە بەلگىلى؟

ال ۇلى بريتانيالىق ساراپشىلار توبى ۆيرۋستىڭ بۇل ءتۇرى «انتيگەندەر بويىنشا باسقا ۆيرۋستاردان ەرەكشە» ەكەنىن ايتادى.

بازەل ۋنيۆەرسيتەتىنىڭ بيولوگيا ورتالىعىنىڭ پروفەسسورى ريحارد نەيەر Die Zeit گازەتىنە بەرگەن سۇحباتىندا «ۇرەيلەنۋگە ەش نەگىز جوعىن» ايتادى. زەرتتەلگەن ۆاكسينالار تيىمدىلىگىن جوعالتپايدى، سەبەبى ۆاكسينا راسىندا ءتيىمسىز بولىپ قالۋى ءۇشىن مۋتاتسيانىڭ بىرنەشە ءتۇرى قاجەت ەكەن.

«ادامنىڭ يممۋن جۇيەسى سپايك- اقۋىزداردى اجىراتىپ، ونى جويىپ جىبەرە الادى»، - دەيدى ساراپشى.

سيەتلدەگى ونكولوگيالىق زەرتتەۋ ورتالىعىنىڭ بيولوگى دجەسسي بلۋم قورقۋدىڭ قاجەتى جوعىن ايتادى.

«سۇمدىق مۋتاتسيا پايدا بولىپ، ول يممۋنيتەتىمىز بەن انتيدەنەلەردى ءولتىرىپ جىبەرەدى دەپ ەش ۋايىمداۋدىڭ قاجەتى جوق»، - دەيدى ول The New York Times گازەتىنە بەرگەن سۇحباتىندا.

كاليفورنياداعى سكريپپس عىلىمي- زەرتتەۋ ينستيتۋتىنىڭ جۇقپالى اۋرۋلار بويىنشا ديرەكتورى كريستيان اندەرسەن كەرىسىنشە ۇستامدى بولۋعا شاقىرادى.

«مەن يممۋنيتەتكە، ۆاكسيناعا اسەر ەتپەيدى نەمەسە كلينيكالىق بەلگىلەرى جوق دەگەن كوپتەگەن ماقالامەن تانىستىم. بۇل دۇرىس ەمەس. ءبىز بۇل تۋرالى ءالى بىلمەيمىز. ءبىراق كەلەسى اپتادا ءبارى بەلگىلى بولادى»، - دەيدى عالىم.

ەۋروپالىق مولەكۋلالىق بيولوگيا زەرتحاناسىنىڭ باس ديرەكتورىنىڭ ورىنباسارى ەۆان بيرني بۇگىندە ۆيرۋستىڭ جاڭا ءتۇرىنىڭ بەلگىلەرىندەگى ەلەۋلى ايىرماشىلىقتارىن جوققا شىعارادى.

«ەگەر ۆيرۋستىڭ جاڭا ءتۇرى اۋرۋ اعىمىنا قاتتى اسەر ەتسە، ءبىز ونى بايقار ەدىك»، - دەدى بيرني The Guardian گازەتىنە.

دۇنيەجۇزىلىك دەنساۋلىق ساقتاۋ ۇيىمىنىڭ وكىلى مايكل راياننىڭ سوزىنشە، ۇيىمدا كوروناۆيرۋستىڭ جاڭا مۋتاتسياسى اۋرۋ اعىمىن كۇردەلەندىرەتىنى تۋرالى دالەلدەر جوق.

SARS- CoV-2 ۆيرۋسىنىڭ مۋتاتسيالانۋىنا بايلانىستى 25 ەل، ونىڭ ىشىندە، رەسەي دە ۇلى بريتانيامەن اۋەقاتىناسىن توقتاتتى.