قازىر تەمىردەي تارتىپكە باعىنۋىمىز كەرەك - ابىلاي ماۋدانوۆ
اقىننىڭ ايتۋىنشا، جاڭا جىل مەرەكەسى قارساڭىندا تۇرعىندار وتباسىلىق ءىس-شارالاردى جيىلەتەدى. الايدا، قازىر توي-تومالاقتاردىڭ ۋاقىتى ەمەس. سوندىقتان سانيتارلىق تالاپتاردى قاتاڭ ساقتاۋ كەرەك.
«ماماندار ەپيدەميولوگيالىق احۋال جازعى ۋاقىتپەن سالىستىرعاندا اجەپتاۋىر تۇراقتالعانىمەن، ۆيرۋس قاۋپى ءالى جوعارى ەكەنىن ايتادى. سويتە تۇرا كەيبىر كاسىپكەرلىك سۋبەكتىلەرىنىڭ ىندەت قاۋپىنە سالعىرت قاراۋى جانە شەكتەۋ تالاپتارىن بىرنەشە مارتە بۇزۋى قىنجىلتادى. ازىرشە توي-تومالاقتارعا تىيىم سالىنعان. ەرتە مە، كەش پە، قۋانىش-تويلارعا رۇقسات ەتىلەر. ءبىز ەندىگى جەردە تەمىردەي تارتىپكە، مۇنتازداي تازالىققا، جوعارى جاۋاپكەرشىلىككە باعىنۋىمىز قاجەت. ويتپەسە، قيىن-اق. الەمدى ابىگەرلەندىرىپ، دۇنيەنى دۇرلىكتىرگەن جۇقپالى ىندەت ءارقايسىمىزدى ودان سايىن ويلاندىرۋعا ءتيىس. قانشاما اياۋلىلارىمىزدان ايىرىلدىق. ءبىر قازاق تۋسا، بار قازاق قۋاناتىنداي، ءبىر قازاق ومىردەن وتسە، بار قازاق قايعىراتىنداي كۇيدەمىز. تىيىم سالىنعان توي-تومالاقتاردان، باسقا دا جيىنداردان، ءتىپتى جانازالاردان قاراۋلى، قالىڭ ۆيرۋس جۇقتىرىپ قايتىس بولعاندار از ەمەس. الداعى ايلار مەن جىلدار جاقسىلىقتار اكەلگەي. الايدا، ءبارىبىر، قاتەرلى پاندەميادان كەيىن جان- جاقتى وزگەرۋىمىز كەرەك. بيلىك وزگەرسىن، وزگەلەر وزگەرسىن دەپ وزەۋرەي بەرمەي، ءوزىمىز وزگەرمەككە مىندەتتىمىز»، - دەيدى ابىلاي ماۋدانوۆ.
اقىن سوزىنە سۇيەنسەك، قايتكەندە دە توي وتپەي تۇرمايدى، وتباسىلىق مەرەكەلەرگە رۇقسات بەرىلەدى. ءبىراق وسى ىندەت حالىقتى ىسىراپشىلدىققا جول بەرمەي، نەگىزسىز وتىرىستار جاساماۋعا ۇيرەتتى. سوندىقتان اتقارۋشى بيلىك وكىلدەرى ازاماتتاردى جەكە قاۋىپسىزدىك شارالارىن ساقتاۋعا شاقىرادى.
اسىرەسە جالپى حالىقتىق مەرەكەلەر قارساڭىندا سانيتارلىق تالاپتاردى ساقتاۋدىڭ ماڭىزى زور. ەگەر ونى ۇستانباساق، پاندەمياعا قارسى كۇرەستە وڭ ناتيجە بولمايدى.
