ايتىسكەرلەر جاڭا جىل مەرەكەسىندە كارانتين تالاپتارىن ساقتاۋعا شاقىردى

نۇر-سۇلتان. قازاقپارات - ايتىسكەر اقىندار قازاقستاندىقتاردى جاڭا جىل مەرەكەسى كۇندەرى كارانتين تالاپتارىن قاتاڭ ساقتاۋعا ۇندەدى، دەپ حابارلايدى قازاقپارات ءتىلشىسى.

امانجول ءالتاي، ايتىسكەر اقىن، فيلولوگيا عىلىمدارىنىڭ دوكتورى:

- ءوتىپ بارا جاتقان جىل قازاق حالقى ءۇشىن وڭاي بولعان جوق. قانشاما اسىل ازاماتتارىمىزدان ايىردى. وسىنداي وقيعالاردىڭ ءالى ەل ەسىندە ەكەنى اقيقات. سوندىقتان قۇرمەتتى قازاقستاندىقتار، جاڭا جىلدى اتاپ وتكەن كەزدە تارتىپكە يكەمدەلۋگە شاقىرامىن. ءتارتىپ بار جەردە بولاشاعىمىزدىڭ جاقسى بولاتىنى انىق. ۇلكەن كورپوراتيۆتىك كەشتەر، كوپشىلىك باس قوساتىن جيىنداردان باس تارتا تۇرعانىمىز ءجون. ويتكەنى كۇن سايىن ەتەك الىپ بارا جاتقان ىندەت ءبىزدىڭ كوسىلە، ەسىلە جۇرگەنىمىزگە قارامايدى. كەلەر جىل اۋىرتپاشىلىقتان ارىلىپ، ۇلكەن قۋانىشقا بولەنەتىن جىل بولسىن! بارشا قازاقستان حالقىن كەلە جاتقان جاڭا جىل مەرەكەسىمەن قۇتتىقتايمىن! جاڭا جىل جارىلقاپ، ەسكى جىل ەسىركەسىن.

سەرىكزات دۇيسەنعازين، ايتىسكەر اقىن، فيلولوگيا عىلىمدارىنىڭ كانديداتى:

- جاڭا جىل - وتباسىلىق مەرەكە. ءبىراق بىزدە دوستار، تۋىستار جانە ارىپتەستەر بولىپ كورپوراتيۆ ۇيىمداستىرۋ ادەتكە اينالعان. بۇگىنگى جاعدايدا وسىنداي شارالار جاساۋ بىرىنشىدەن، وزىمىزگە ەكىنشىدەن، جاقىندارىمىزدىڭ دەنساۋلىعى ءۇشىن قاۋىپتى. مەيرامدى جابىق عيماراتتاردىڭ ىشىندە تويلاۋ ارقىلى جاعدايدى ۋشىقتىرىپ الۋىمىز عاجاپ ەمەس. ادام - ۆيرۋس تاسۋشى. ينفەكسيا كەز- كەلگەن ازاماتتىڭ بويىندا بولۋى مۇمكىن. تەك كەيبىر ادامداردا ول سيمپتومسىز ءوتىپ جاتادى. ەگەر بەيقامدىققا سالىناتىن بولساق، جاز مەزگىلىندەگى قيىن جاعداي قايتالانىپ كەتۋى مۇمكىن. سوندىقتان بارشا ازاماتتاردى كارانتين تالاپتارىن ساقتاۋعا شاقىرامىن.

مۇمكىندىك بولسا، تازا اۋدا سەرۋەندەپ، سپورتپەن اينالىسقان دۇرىس دەپ ويلايمىن. 2020 -جىلدىڭ باسىندا الەمدى پاندەميا جايلادى. بارلىعىمىز ونلاين جۇمىس ىستەۋگە يكەمدەلدىك. بۇل پروتسەستەردىڭ بارلىعى كىمگە بولسا دا وڭاي تيگەن جوق. سوندىقتان ىندەتتەن قۇتىلىپ، بۇرىڭعى مامىراجاي ومىرگە ورالاتىن كۇنگە جازسىن. ەل- جۇرتىمىز امان، بەرەكە- بىرلىگىمىز بەكەم بولسىن! ديدار قاميەۆ، ايتىسكەر اقىن، ق ر ەڭبەك سىڭىرگەن قايراتكەرى:

- بارلىعىمىز جاڭا جىلدى اتاپ وتكىمىز كەلەدى. دەگەنمەن ساقتىق شارالارىن ەستەن شىعارماۋىمىز كەرەك. جاڭا جىل - كوپ كۇنانىڭ جاسالاتىن ءتۇنى. سوندىقتان كارانتين تالاپتارىن نەگىزگە الساق، ءبىر جاعىنان كۇنا جاساۋدان دا ساقتاناسىز. جاڭا جىلعا دەنىمىزدىڭ ساۋ بولىپ بارعانى دۇرىس شىعار. تويلايتىن بولساڭىزدار، تەك وتباسىلىق دەڭگەيدە باس قوسىپ، ءۇي ارالاماي اتاپ وتۋگە شاقىرامىن. جاڭا جىلدا بارشاڭىزعا جاقسىلىق تىلەيمىن. كارانتيننىڭ اياسى تارىلىپ، بۇرىڭعى جايما شۋاق كۇنىمىزگە قايتا ورالايىق.

جانداربەك بۇلعاقوۆ، ايتىسكەر اقىن:

- ىندەت تەك قازاق حالقىن عانا ەمەس، بۇكىل الەمدى الاڭداتىپ وتىر. سوندىقتان جاقىندارىمىزدىڭ دەنساۋلىعىنا جاناشىرلىقپەن قاراپ، جاڭا جىل مەرەكەسىن وتباسى دەڭگەيىندە اتاپ وتۋگە شاقىرامىن. ينفەكسيانىڭ سالدارىنان عىلىم، ءبىلىم، ونەر، سپورت سالاسىنداعى ءمۇيىزى قاراعايداي ازاماتتارىمىزدان كوز جازىپ قالدىق. بيىلعى جىل جانىمىزداعى جاقىن ادامدارىمىزدىڭ قادىرىن تۇسىندىرەتىندەي ساباق بەردى دەپ ويلايمىن. مۇمكىندىگىمىزشە اق حالاتتى ابزال جانداردىڭ شىرىلداپ ايتىپ جاتقان كەڭەسىنە قۇلاق اسايىق. اتى جامان اۋرۋدىڭ بەتى قايتسا، مارە-سارە قاۋىشاتىن كۇن الدا دەپ ويلايمىن.

مۇحتار نيازوۆ، ايتىسكەر اقىن، قىزىلوردا قالالىق مادەنيەت جانە تىلدەردى دامىتۋ ءبولىمىنىڭ باسشىسى:

- جاڭا جىل - قازاق حالقىنا ءۇش قايناسا سورپاسى قوسىلمايتىن مەرەكە. ويتكەنى بۇل مەيرام قارساڭىندا جاس شىرشالارعا زيان كەلتىرىپ، ولاردى وتايمىز. سونداي-اق پيروتەحنيكالاردى قولدانىپ، وت- شاشۋ ۇيىمداستىرۋ سالدارىنان قانشاما جاستار زارداپ شەگىپ جاتادى. ستاتيستيكا بويىنشا، جاڭا جىل مەرەكەسىندە جاراقات الىپ، اۋرۋحاناعا تۇسەتىن ناۋقاستاردىڭ سانى كوپ بولادى. ەگەر اتالعان مەرەكەنى تويلايمىن دەگەن ازاماتتار بولسا، وندا ونى وتباسى كولەمىندە اتاپ وتسە دۇرىس دەپ ويلايمىن. بيىل قوناققا بارىپ، الاۋلاتىپ، جالاۋلاتىپ توي تويلايتىن جاعداي جوق. سوندىقتان دارىگەرلەر كەڭەسىنە نازار قويىپ، كارانتين تالاپتارىن ساقتايىق!

اۆتور: ءاليحان اسقار