پۋتين بايدەندى جەڭىسىمەن قۇتتىقتادى

الەم ەلدەرىنىڭ باسشىلارى قاراشا ايىنىڭ باسىندا سايلاۋدىڭ الدىن الا قورىتىندىسى بەلگىلى بولعاننان كەيىن بايدەندى قۇتتىقتاي باستاعان. وسىعان دەيىن قۇتتىقتاۋدىڭ كەشىگۋىنە بايلانىستى تۇسىنىكتەمە بەرگەن كرەمل «سايلاۋدىڭ رەسمي قورىتىندىسىن كۇتىپ وتىرعانىن» ايتقان ەدى.

14- جەلتوقساندا ا ق ش- تا سايلاۋشىلار القاسى دجو بايدەننىڭ جەڭىسكە جەتكەنىن راستادى. بايدەن سايلاۋشىلار القاسىنىڭ 306 داۋىسىن العان، ال قارسىلاسى، قازىرگى پرەزيدەنت دونالد ترامپ 232 داۋىسقا يە بولعان.

2016-جىلعى سايلاۋ كەزىندە پۋتين سايلاۋ اياقتالعاننان كەيىن بىرنەشە ساعاتتان سوڭ ترامپتى قۇتتىقتاعان. ءبىراق ول كەزدە ترامپتىڭ قارسىلاسى حيللاري كلينتون ونىڭ جەڭىسىن مويىنداعان. ال ترامپ ءالى كۇنگە دەيىن بايدەننىڭ جەڭىسىن مويىندامادى.

كرەمل سايتىنداعى اقپارات بويىنشا، پۋتين جاڭادان سايلانعان پرەزيدەنتكە «ساتتىلىك تىلەپ، الەم قاۋىپسىزدىگى مەن تۇراقتىلىعىنا ەرەكشە جاۋاپتى رەسەي مەن ا ق ش ءبىرقاتار كەلىسپەۋشىلىكتەرگە قاراماستان الەمدەگى ماسەلەلەردىڭ شەشىلۋىنە ىقپال ەتە الادى» دەپ ءۇمىت بىلدىرگەن.

ول سونىمەن بىرگە جاڭا سايلانعان پرەزيدەنتپەن «قارىم-قاتىناس ورناتۋعا» ءازىر ەكەنىن ايتقان.

بايدەن باراك وبباما تۇسىندا ۆيتسە-پرەزيدەنت بولىپ تۇرعان كەزىندە پۋتيندى سىناپ، ماسكەۋدىڭ ۋكراينا مەن كورشى ەلدەرگە ساياساتىن تەرىس باعالاعان. ول سونىمەن بىرگە اقپان ايىندا مەرزىمى اياقتالاتىن يادرولىق ستراتەگيالىق شابۋىل قارۋلارىن قىسقارتۋ جانە شەكتەۋ جونىندەگى شارالار تۋرالى كەلىسىمدى (س ن ۆ-3) ۇزارتۋدى قولداعان.

14- جەلتوقساندا سايلاۋشىلار القاسىنىڭ داۋىس بەرۋى اياقتالعاننان كەيىن بايدەن ۇندەۋ جاساپ، امەريكا حالقىن بىرلىككە شاقىرعان.

«امەريكادا بيلىكتى المايدى - ونى ادامداردىڭ وزدەرى تاپسىرادى. بۇل ەلدە دەموكراتيا الاۋى جاعىلعاننان بەرى كوپ ۋاقىت ءوتتى. ەندى ءبىز ەشتەڭەنىڭ دە، ءتىپتى ىندەت پەن بيلىكتى اسىرا پايدالانۋ دا بۇل الاۋدى وشىرە المايتىنىنا سەنىمدىمىز» دەدى بايدەن.

بايدەن يناۋگۋراتسياسى 20- قاڭتاردا وتەدى.

«ازاتتىق»