انگليادا كوروناۆيرۋستىڭ تەز تارايتىن جاڭا ءتۇرى انىقتالدى
نۇر -سۇلتان. قازاقپارات - ۇلى بريتانيادا SARS- CoV-2 كوروناۆيرۋسىنىڭ جاڭا ءتۇرى انىقتالدى. ول قازىرگى كوروناۆيرۋسقا قاراعاندا تەز جۇعادى.
بۇل تۋرالى بىرىككەن كورولدىكتىڭ دەنساۋلىق ساقتاۋ ءمينيسترى مەتت حەنكوك مالىمدەدى، - دەپ حابارلايدى ريا نوۆوستي.
«ءبىزدىڭ گەنەتيكتەر بىرنەشە كۇن بۇرىن كوروناۆيرۋستىڭ جاڭا ءتۇرىن انىقتادى. بۇل انگليانىڭ وڭتۇستىك- شىعىسىندا ۆيرۋستىڭ جىلدام تارالۋىمەن بايلانىستى بولۋى مۇمكىن. العاشقى زەرتتەۋلەر جاڭا شتامدار كوروناۆيرۋستىڭ بىزگە بەلگىلى تۇرىنە قاراعاندا اناعۇرلىم تەز تارايتىنىن كورسەتتى»، - دەدى مينيستر.
حەنكوكتىڭ ايتۋىنشا، قازىر انگليانىڭ وڭتۇستىگىندەگى 60 اۋداندا ۆيرۋستىڭ جاڭا ءتۇرىن جۇقتىرعان مىڭعا جۋىق جاعداي انىقتالعان.
ءمينيستردىڭ ايتۋىنشا، ۆيرۋستىڭ جاڭا مۋتاتسياسى ناۋقاس جاعدايىنىڭ اۋىرلاۋىنا، سونداي-اق COVID-19-عا قارسى ۆاكسيناعا رەاكسيا بەرمەيدى دەۋگە ەش نەگىز جوق. ونىڭ بىردەن ولىمگە اكەپ سوعۋى مۇمكىن ەكەنىنە دە دالەل جوق. الايدا كوروناۆيرۋستىڭ جاڭا ءتۇرى تەز تارايدى جانە الدەقايدا جىلدام جۇعادى.
«د د ۇ حاباردار (ۆيرۋستىڭ جاڭا ءتۇرى تۋرالى)... سوڭعى ايلاردا كوروناۆيرۋستىڭ بۇل ءتۇرى ەۋروپانىڭ باسقا ەلدەرىندە انىقتالعان»، - دەپ قوستى حەنكوك.
