ەلوردادا جاڭا تەاتر اشىلدى

نۇر- سۇلتان. قازاقپارات - ەلوردادا مۋزىكالىق جاس كورەرمەن تەاترى سالتاناتتى تۇردە اشىلدى، دەپ حابارلايدى قازاقپارات ءتىلشىسى.

جاڭا تەاتردىڭ اشىلۋى تاۋەلسىزدىك مەرەكەسى قارساڭىندا جانە ۇلى اقىن ابايدىڭ 175 جىلدىعىنا وراي ۇيىمداستىرىلىپ وتىر.

«قاستەرلى مەرەكە قارساڭىندا مادەنيەت سالاسىندا جاعىمدى جاڭالىق ورىن الىپ وتىر. قالادا بىرنەشە تەاتر بار، ءبىراق جاس جەتكىنشەكتەرگە ارنالعان تەاتر جوق ەكەن. وسى ورايدا مادەنيەت جانە ونەر ماماندارىمەن اقىلداسىپ جاڭا تەاتر قۇرۋدى ءجون شەشتىك. سونىمەن قاتار، بۇل تەاتردىڭ اشىلۋى ق ر مادەنيەت جانە سپورت مينيسترلىگىنىڭ تاراپىنان دا قولداۋ تاپتى»، - دەدى نۇر- سۇلتان قالاسىنىڭ اكىمى التاي كولگىنوۆ تەاتردىڭ اشىلۋ سالتاناتىندا.

ءوز جۇمىسىن بيىل 1 -قازاندا باستاپ كەتكەن تەاترعا كاستينگ ارقىلى 50 دەن استام جاس ءارتىس تاڭداپ الىندى.

«ارينە ءار تەاتردىڭ ءوز ەرەكشەلىگى بولۋ كەرەك، بۇل تەاتر ءوزىنىڭ مۋزىكالىق جانرىمەن ەرەكشەلەنەدى. ءبىزدىڭ تەاتردىڭ انالوگى تەك ماسكەۋدە عانا بار. ماقسات - جاسوسپىرىمدەر مەن جاستاردى ونەردى سۇيۋگە ۇيرەتۋ، باۋلۋ. ولاردىڭ بويىنا مۋزىكالىق، ەستەتيكالىق قاسيەتتەردى ءسىڭىرۋ. الداعى ۋاقىتتا جاڭا تەاتر ساحناسىندا الەمدىك جانە وتاندىق تۋىندىلار قويىلاتىن بولادى. جالپى بۇگىندە نۇر- سۇلتان قالاسىندا قالالىق دەڭگەيدە 6 جانە رەسپۋبليكالىق دەڭگەيدەگى 3 تەاتر بار» ، - دەدى نۇر- سۇلتان قالاسى مۋزىكالىق جاس كورەرمەن تەاترىنىڭ ديرەكتورى اسحات ماەميروۆ.

مۋزىكالىق جاس كورەرمەن تەاترى شىمىلدىعىن م. اۋەزوۆتىڭ «اباي- توعجان» مۋزىكالىق دراماسىمەن اشتى. قويىلىمدا ابايدىڭ ءرولىن جاس ءارتىس ايان وتەپبەرگەن سومداسا، ال ونىڭ عاشىعى توعجاندى ارەلينا امانگەلديەۆا وينادى. سونداي- اق، ابايدىڭ اناسى ۇلجاننىڭ ءرولىن 71- كانن حالىقارالىق كينوفەستيۆالىنىڭ جەڭىمپازى، تانىمال اكتريسا سامال ەسلياموۆاعا سومداۋ بۇيىردى.

ايتا كەتسەك، اتالعان جاڭا تەاتر ەلورداداعى ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق تەاترىنىڭ بۇرىنعى عيماراتىنا ورنالاستى.