راسۋل جۇمالى: بۇل سايلاۋدىڭ ءبىرقاتار جاڭاشىلدىعى بار

ايتا كەتەيىك، بۇگىن ەلوردادا ەۋرازيالىق ينتەگراتسيا ينستيتۋتىنىڭ ۇيىمداستىرۋىمەن «سايلاۋ-2021: ساياسي مودەرنيزاتسيانىڭ جاڭا كەزەڭى» اتتى ساراپشىلىق كەزدەسۋ ءوتتى. ءىس- شارانىڭ ماقساتى - پارلامەنت ماجىلىسىنە سايلاۋدىڭ ەرەكشەلىكتەرى مەن ءرولىن ساراپتامالىق تۇرعىدا تالقىلاۋ، ساياسي پارتيالاردىڭ ستراتەگيالارىن تالداۋ، ەل ازاماتتارىنىڭ ساياسي مادەنيەتىن ارتتىرۋ بويىنشا ۇستانىمدار مەن ۇسىنىستاردى ازىرلەۋ.

«قازىر ءبارىمىز قىزىقتى دا ماڭىزدى كەزەڭنىڭ الدىندا تۇرمىز. سايلاۋعا ءبىر ايدان از ۋاقىت قالدى. بۇل سايلاۋدىڭ ءبىرتالاي جاڭاشىلدىعى بار. ەسكى داستۇرلەردىڭ دە ساقتالۋىن، ونىڭ ىشىندە كەلەڭسىز تاجىريبەلەردىڭ قايتالانۋىن بايقاپ وتىرمىز. جاڭاشىلدىققا كەلسەك، سايلاۋ كوپ جىلدان كەيىن ءوزىنىڭ زاڭمەن بەلگىلەنگەن كەزەڭىندە ءوتىپ وتىر. مەنىڭشە، بۇل - يگى ءارى جاقسى جاڭالىق. بۇعان دەيىن پرەزيدەنتتىك بولسىن، پارلامەنتتىك بولسىن سايلاۋلاردىڭ بارلىعى ءتۇرلى سەبەپتەرمەن كەزەكتەن تىس وتەتىن. بىرەسە داعدارىستى جەلەۋ ەتىپ، بىرەسە اۋقىمدى جوبالاردى العا تارتا وتىرىپ سايلاۋدىڭ مەرزىمى وزگەرەتىن. مەنىڭشە، بۇل فاكتور - وركەنيەتتىلىكتىڭ، مەملەكەتتىڭ، بيلىكتىڭ ءوز زاڭدارىن قۇرمەتتەي ءبىلۋىنىڭ كورسەتكىشى»، - دەدى راسۋل جۇمالى.

ساياسات تانۋشى ۇلتتىق كەڭەس اياسىندا ءبىرتالاي ساياسي مودەرنيزاتسياعا بەت تۇزەگەن زاڭدار قابىلدانىپ، وزگەرىستەر ەنگىزىلگەنىن ايتىپ ءوتتى.

«پارلامەنتتىڭ وپپوزيتسيا ۇعىمىنىڭ ەنگىزىلىپ وتىرعانى، سول وپپوزيتسيانىڭ قۋىرشاق ەمەس ناقتى بولۋى - ءبىزدىڭ ەلىمىزگە اۋاداي قاجەت. قازىر ساياسي الاڭداعى پارتيالار قانشالىقتى بۇكىل قوعامنىڭ مۇددەسىن، نارازىلىعىن ءبىلدىرىپ وتىر؟ بۇل تاقىرىپتا پىكىرتالاس قۇرۋعا بولادى. مەنىڭ ويىمشا، جاقىن ارادا جاڭا ءبىر ساياسي ويىنشىلاردىڭ، توپتاردىڭ پايدا بولۋى وتە ماڭىزدى. بيلىك ورگاندارى وعان بارىنشا مۇمكىندىك جاساۋى كەرەك»، - دەدى ساياساتتانۋشى.

اۆتور: ايان بەكەن ۇلى