جاڭاجىلدىق بانكەت وتكىزۋگە تىيىم سالىندى
تاشكەنت. قازاقپارات - وزبەكستاندا مەملەكەتتىك ۇيىمداردىڭ جاڭاجىلدىق بانكەت وتكىزۋىنە جانە ءبىلىم مەكەمەلەرىندە جاڭا جىل مەرەكەسىن تويلاۋعا تىيىم سالىندى، دەپ حابارلايدى قازاقپارات ەلدىڭ دەنساۋلىق ساقتاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
وزبەكستاندا كوروناۆيرۋسقا قارسى كۇرەس جونىندەگى رەسپۋبليكالىق كوميسسيانىڭ قاۋلىسىنا وراي، مەملەكەت ۇلەسى بار كاسىپورىنداردا مەرەكەلىك جيىن وتكىزۋگە تىيىم سالىندى.
ودان ۇنەمدەلگەن قارجىنى ءبىلىم بەرۋ، دەنساۋلىق ساقتاۋ، بالالار ءۇيى سەكىلدى الەۋمەتتىك سالالارعا جۇمساۋ ۇسىنىلادى.
باسقا ۇيىمدار نەمەسە جەكە تۇلعالاردىڭ قوعامدىق تاماقتاندىرۋ ورىندارىندا 30 ادامنان اسپايتىن جانە سانيتاريا-گيگيەنا جانە كارانتين تالاپتارىن قاتاڭ ساقتاي وتىرىپ مەرەكە ءىس-شارالارىن وتكىزۋىنە شەكتەۋ قويىلمايدى. ءبىراق ەل ازاماتتارىنا جاڭا جىلدى ۇيدە وتباسىمەن تويلاۋ ۇسىنىلادى.
سونداي-اق مەكتەپكە دەيىنگى ۇيىمداردا، ورتا مەكتەپتەر مەن جوعارى وقۋ ورىندارىندا وقۋشىلاردىڭ، تاربيەلەنۋشىلەردىڭ جانە ستۋدەنتتەردىڭ قاتىسۋىمەن جابىق جەردە ءتۇرلى مەرەكەلىك ءىس-شارا مەن كەشتەر ۇيىمداستىرۋعا جانە وتكىزۋگە تىيىم سالىنادى. وبلىس، اۋدان جانە قالا ورتالىقتارىندا جاڭا جىل شىرشاسىن اشىق جەرگە ورناتۋ ۇسىنىلادى.
