كورونوۆيرۋس: كارانتين تالاپتارى جەڭىلدەتىلگەن ايماقتار بار

ەلوردا مەن الماتى قالاسىنداعى شەكتەۋ شارالارى ءالى دە كۇشەيتىلە تۇسەتىن سياقتى.

ويتكەنى، كورونوۆيرۋس ينفەكسياسىن جۇقتىرعان ازاماتتار سانى تومەندەمەي تۇر.

وسى جانە وزگە دە ايماقتارداعى احۋالعا قىسقاشا شولۋ جاساپ كورەيىك.

نۇر-سۇلتان قالاسىندا كارانتين تالاپتارى كۇشەيتىلەتىن بولدى. ويتكەنى، ءبىر تاۋلىكتە 118 ادامنان كورونوۆيرۋس ينفەكسياسى انىقتالدى. قالا قازىر «قىزىل» ايماقتا. جاقىن كۇندەرى ەلوردانىڭ باس سانيتارلىق دارىگەرى ارنايى قاۋلى شىعارماق. ءبىراق بلوكپوستار قويىلمايدى.

بۇل تۋرالى اكىمدىكتە وتكەن جيىندا بەلگىلى بولدى. الايدا ەلورداعا كەلەتىن نەمەسە باس قالادان شىعاتىن جولاۋشىلار پ ت ر- تەست تاپسىرۋعا مىندەتتى بولۋى مۇمكىن. باس سانيتارلىق دارىگەر تۇرعىندارعا اسا ساق بولۋدى ەسكەرتتى. سوندىقتان، الداعى دەمالىس كۇندەرى جۇرتتى ۇيدە وتىرۋعا شاقىردى.

تاعى ءبىر ايتا كەتەتىن جايت، ەلورداداعى مەكتەپتەردىڭ بارلىعى قاشىقتان وقىتۋ رەجيمىنە كوشۋى مۇمكىن. قالانىڭ باس سانيتارلىق دارىگەرى وسىنداي مالىمدەمە جاسادى. جاننا پرالييەۆانىڭ ايتۋىنشا، وقۋشىلار اراسىندا ىندەت جۇقتىرۋ دەرەگى جيىلەپ كەتكەن. جاڭا وقۋ جىلى باستالعالى 224 بالادان ۆيرۋس انىقتالىپتى.

سوندىقتان ماماندار ساقتانۋ كەرەكتىگىن ايتىپ وتىر. كەشە اۋداندىق سانيتارلىق دارىگەرلەر قالاداعى 20 مەكتەپتى ۋاقىتشا جابۋ تۋرالى شەشىم قابىلداعان. الماتىداعى ەپيدەميولوگيالىق جاعداي كۇردەلى كۇيىندە قالىپ وتىر. بۇل تۋرالى وڭىرلىك كوممۋنيكاتسيالار قىزمەتى الاڭىندا وتكەن ونلاين- بريفينگ بارىسىندا الماتىنىڭ باس مەملەكەتتىك سانيتارلىق دارىگەرى جانداربەك بەكشين مالىمدەدى. وسىعان بايلانىستى ول تۇرعىنداردى قاۋىپسىزدىك شارالارىن ۇستانىپ، سانيتارلىق- ەپيدەميولوگيالىق تالاپتاردى ساقتاۋعا شاقىردى.

سونىمەن قاتار، ول تەك الدىن-الۋ شارالارىن جاپپاي ساقتاۋ ارقىلى اۋرۋدىڭ وسۋىنە جانە قاتاڭ شەكتەۋ شارالارىنىڭ ەنگىزىلۋىنە جول بەرمەۋ مۇمكىن بولاتىنىن اتاپ ءوتتى. الەمدەگى جاعدايدىڭ ۋشىعا تۇسكەنىن جانە مەگاپوليستە سىرقاتتاردىڭ كوبەيۋى مۇمكىن دەگەن بولجامدى ەسكەرە وتىرىپ، ول تۇرعىندارعا ساقتىق شارالارىنا سالعىرت قاراماۋدى ەسكەرتتى.

«كارانتين رەجيمىن ۇستانىپ، كۇن سايىن ايتىلىپ جاتقان قاراپايىم ەرەجەلەردى ساقتاۋ كەرەك. ولاردىڭ ورىندالۋىن جاقىندارىمىزدان، تۋىس- تۋعاندارىمىزدان تالاپ ەتۋ كەرەك. بەتپەردە تاعىپ، الەۋمەتتىك قاشىقتىقتى ساقتاپ، ادامدار جاپپاي جينالاتىن ورىندارعا، اسىرەسە جابىق عيماراتتارعا بارماۋ. قوعامدىق كولىككە بەتپەردەسىز جانە قولعاپسىز كىرمەۋ. اسا قاجەتتىلىك تۋىنداماسا، ادام كوپ جينالاتىن ورىندارعا بارماۋ، جانە اۋاسى قيىن جەلدەتىلەتىن جابىق مەكەمەلەردە كوپ ۋاقىت وتكىزبەۋ. سىرتقى جابىنداردى دەزينفەكسيالىق قۇرالدارمەن وڭدەۋ. قولدى ءجيى جۋۋ جانە بالالاردى جەكە گيگيەنانى ساقتاۋعا ۇيرەتۋ»، - دەپ اتاپ ءوتتى الماتىنىڭ سانيتارلىق دارىگەرى. كوروناۆيرۋس ينفەكسياسىنىڭ تارالۋ قاۋپى جاعىنان «جاسىل ايماقتاعى» باتىس قازاقستان وبلىسىندا ەپيدەميولوگيالىق احۋال ازىرگە ءبىرقالىپتى.

وسى اپتادا وڭىردە كارانتين تالاپتارى جەڭىلدەتىلدى. قوعامدىق تاماقتانۋ ورىندارى 50 ادامعا دەيىن قابىلداپ جاتىر. بازارلار مەن ساۋدا ۇيلەرى كۇن سايىن اشىق. اۆتوبۋستار دەمالىس جانە مەرەكە كۇندەرى دە جۇرەدى. تەك سانيتارلىق تالاپتار قاتاڭ ساقتالۋى ءتيىس. تۇنگى ساعات 12 دەن تاڭعى 6 عا دەيىنگى ارالىقتا تۇرعىنداردىڭ كوشەگە شىعۋىنا شەكتەۋ قويىلدى. جەلتوقسان ايى باستالعالى بەرى ايماقتا 370 ادام ىندەت جۇقتىرعان. ولاردىڭ جارتىسىنان كوبى ورال قالاسىنىڭ تۇرعىندارى. ال جانىبەك جانە قاراتوبە اۋداندارىندا ءبىر دە ءبىر جاعداي تىركەلمەگەن. 14-جەلتوقساننان باستاپ پەتروپاۆل قالاسىنىڭ اۋماعىنداعى بلوكپوستار الىنادى. ياعني، الداعى دۇيسەنبىدەن باستاپ وڭىردە كارانتين تالاپتارى جەڭىلدەيدى.

قوعامدىق كولىكتەردىڭ دەمالىس كۇندەردە جۇرۋىنە رۇقسات ەتىلىپ وتىر. مۇنىمەن قوسا وبلىستاعى بارلىق اۆتوستانتسيا اشىلىپ، اۋدان، اۋىلدارعا اۆتوبۋستار قاتىنايدى. ءدىني نىساندار، كىتاپحانالار، مۇراجايلار مەن تەاترلار قايتا اشىلادى. سپورتتىق نىساندار، باسسەيندەر جانە بالالارعا ءبىلىم بەرۋ مەكەمەلەرىنە سەنبى كۇندەرى جۇمىسىن جالعاستىرۋعا رۇقسات ەتىلدى. وڭىردە ەپيدەميولوگيالىق احۋال تۇراقتالىپ كەلەدى. قازىر وبلىس «سارى ايماقتا». ەستەرىڭىزگە سالا كەتەيىك، قاراشانىڭ 9 ىنان باستاپ، قالا كارانتينگە جابىلىپ، تۇرعىنداردىڭ پتسر تەست انىقتاماسىنسىز كىرىپ شىعۋلارىنا تىيىم سالىنعان بولاتىن.

قىزىلورداداعى ساۋدا ورتالىقتارى مەن كينوتەاترلار جەكسەنبى جانە مەرەكە كۇندەرى دە جۇمىس ىستەيتىن بولدى. وبلىستىڭ باس مەملەكەتتىك سانيتارلىق دارىگەرىنىڭ قاۋلىسىنا سايكەس كاسىپكەرلىك نىسانداردىڭ قىزمەت كورسەتۋ كەستەسىنە وزگەرىس ەنگىزىلدى. ويىن- ساۋىق ورتالىقتارى، ساۋدا-ساتتىق جەلىلەرى، ازىق-تۇلىك ەمەس جانە جابىق بازارلار بۇعان دەيىن تاڭعى 10:00-دەن كەشكى 22:00 گە دەيىن جۇمىس ىستەگەن ەدى.

ەندى ولاردىڭ تۇتىنۋشىنى قابىلداۋ ۋاقىتى 1 ساعاتقا ۇزاردى. بۇل وزگەرىستەردىڭ كينوتەاترلار مەن قوعامدىق تاماقتانۋ نىساندارىنا دا قاتىسى بار. اتالعان نىسانداردىڭ بارلىعىنا جەكسەنبى جانە مەرەكە كۇندەرى ساعات 10:00 دەن 17:00-گە دەيىن جۇمىس ىستەۋىنە رۇقسات بەرىلدى.

بالقاش قالاسىنداعى ورتالىق اۋرۋحانا بازاسىندا پ ت ر- زەرتحانا اشىلدى، دەپ حابارلايدى وبلىستىڭ دەنساۋلىق ساقتاۋ باسقارماسى. تاۋلىگىنە 500 سىناق وتكىزە الادى. بالقاش، پريوزەرسك، اقتوعاي جانە شەت اۋداندارىنىڭ تۇرعىندارىنا قىزمەت كورسەتەدى.

جالپى العاندا، بۇل شامامەن 130 مىڭ ادام. مەكەمە بارلىق تالاپتارعا ساي جانە گەرمانيالىق جابدىقتارمەن جاراقتالعان. ءۇي- جايلاردا جوندەۋ جۇمىستارى جۇرگىزىلدى، تەحنيكا ورناتىلدى، قاجەتتى رەاكتيۆتەر ساتىپ الىندى. زەرتحانا قىزمەتكەرلەرى قاراعاندىنىڭ جەتەكشى زەرتحانالارى بازاسىندا ارنايى وقىتۋدان وتكەن. جوبانىڭ جالپى قۇنى 39 ملن تەڭگە. بۇرىن پ ت ر زەرتتەۋگە بارلىق بيولوگيالىق ماتەريالدار بالقاشتان قاراعاندىعا جىبەرىلەتىن. ناتيجەلەردى الۋ ءۇشىن 3 كۇننەن 5 كۇنگە دەيىن ۋاقىت قاجەت بولاتىن. ەندى جاڭا پ ت ر زەرتحاناسى ارقىلى كوروناۆيرۋس ينفەكسياسىن تەز ارادا انىقتاۋعا بولادى. تالداۋدى وڭدەۋگە ورتاشا ەسەپپەن 5 ساعات ۋاقىت كەتەدى. ناتيجە ءبىر تاۋلىك ىشىندە بەرىلەدى.

اۆتور: ءالىمحان قانات ۇلى