باسپانا كەزەگىندە تۇرعان شىعىس قازاقستاندىقتارعا جەر ۋچاسكەسى بەرىلۋدە

وڭىردە جەكە تۇرعىن ءۇي قۇرىلىسىن جۇرگىزۋ ماقساتىندا كەزەكتە تۇرعان ازاماتتارعا جەر تەلىمىن بەرۋ جۇمىستارى جالعاسۋدا.

باستى تالاپ - بەرىلگەن جەر تەلىمىن ۋاقتىلى ءارى ماقساتتى پايدالانۋ. كوپ جاعدايدا جەردىڭ يگەرىلمەۋىنە ينجەنەرلىك ينفراقۇرىلىمنىڭ جوقتىعى سەبەپ بولىپ جاتادى. وسى ماسەلەنى شەشۋ ءۇشىن شىعىس قازاقستاندا جەكە تۇرعىن ءۇي قۇرىلىسىنا بەرىلەتىن جەر تەلىمدەرى قاراستىرىلعان اۋماقتاردى كەزەڭ-كەزەڭمەن قارجىلاندىرۋ جوسپارى بەكىتىلىپ وتىر. قازىرگى تاڭدا وسكەمەن، سەمەي جانە اياگوز قالالارىنداعى 1-كەزەڭگە كىرگەن جەر ۋچاسكەلەرىنىڭ جالپى سانى 2591 قۇرايدى. بارلىعى ينجەنەرلىك- كوممۋنيكاتسيالىق ينفراقۇرىلىممەن قامتاماسىز ەتىلگەن. ونىڭ ىشىندە 1700 ۋچاسكە تۇرعىن ءۇي سالۋعا بەرىلدى. قازىرگى تاڭدا ولاردىڭ 602-ىندە جۇمىس اياقتالسا، ال 790 ۋچاسكەدە قۇرىلىس جۇمىستارى ءالى باستالماعان.

«جەر العان تۇرعىندار وندا ءۇي سالۋلارى ءتيىس. قاجەتتى ينفراقۇرىلىم جۇرگىزىپ، جارىق پەن سۋ تارتتىق. سوندىقتان بەرىلگەن ۋچاسكەلەردە قۇرىلىس جۇمىستارى ءجۇرىپ جاتقانىن قاتاڭ باقىلاۋىمىز قاجەت»، - دەدى ايماق باسشىسى دانيال احمەتوۆ.

جەكە تۇرعىن ءۇي قۇرىلىسى وسكەمەن قالاسىنداعى 20 شاعىن اۋداندا قارقىندى ءجۇرىپ جاتىر. بۇگىندە شاھار تۇرعىندارى سالعان 119 ءۇي قولدانىسقا بەرىلىپ، تاعى 120 ءۇيدىڭ قۇرىلىسى جۇرگىزىلۋدە. سەمەيدە ۇشاقتار، كومسومولسكي، اياگوز قالاسىنداعى مياسوكومبينات شاعىن اۋداندارىندا دا بۇل باعىتتاعى جۇمىستار جالعاسۋدا.

ايتا كەتەيىك، بۇگىندە وسكەمەن بويىنشا جەكە تۇرعىن ءۇي قۇرىلىسىن سالۋ ءۇشىن جەر تەلىمدەرىن الۋعا كەزەكتە - 4206، سەمەيدە - 24473 ادام تۇر.

اۆتور: تالعاتجان مۇحامەتبەك ۇلى