قىستا ماسكانى قالاي تاعۋ كەرەك
الماتى. قازاقپارات - الماتى قالالىق سانيتارلىق ەكپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا قىستا ماسكا تاعۋ تالاپتارىن ءتۇسىندىردى، دەپ حابارلايدى قازاقپارات ءتىلشىسى.
«ءبىز بۇعان دەيىن دە ماسكانى قالاي دۇرىس تاعۋ كەرەكتىگىن تۇسىندىرگەن بولاتىنبىز. بۇل بىرەۋلەرگە ماسكا بار دەگەن كۋالىك ءۇشىن تاعىلمايدى. ول قۇلاقتا اسىلىپ، يەكتە تۇرماۋى كەرەك. ماسكا اۋىز بەن مۇرىندى تولىق جابۋى ءتيىس. ولاي بولماعان جاعدايدا پايداسى جوق»، - دەدى ول.
سپيكەر شەتەلدىك مامانداردىڭ ماسكا جايلى پىكىرىنە تۇسىنىك بەردى. بۇعان دەيىن ءبىرقاتار زەرتتەۋشىلەر سۋىق اۋا رايىندا كوشەدە الەۋمەتتىك قاشىقتىق ساقتالعان جاعدايدا ماسكا تاعۋدىڭ كەرەگى جوق ەكەنىن ايتقان.
«الماتى سانيتارلىق ەپيدەميولوگيالىق باقىلاۋ دەپارتامەنتى جاريالاعان ماسكا تاعۋدىڭ شارتتارى بار. سۋىق اۋا رايىندا كوشەدە بىرنەشە ادام جۇرگەن جاعدايدا ماسكا تاعۋ مىندەتتەلەدى. ادامنىڭ قاسىندا ارىپتەسى، تانىسى بولسا، ماسكا تاعىپ سويلەسكەنى دۇرىس. الايدا ماسكا سۋلانىپ كەتسە، ول جارامسىز سانالادى. سۋلانعان ماسكانى 2-3 ساعات تاعۋعا بولمايدى»، - دەدى مامان.
اسەل حالىقوۆا بىرنەشە رەت تاعۋعا جارايتىن شۇبەرەك ماسكانى تاعۋعا تىيىم سالىنباعانىن ايتتى. بۇل ماسكاعا دا جوعارىداعى تالاپتار ساي كەلەدى. دەپارتامەنت باسشىسىنىڭ ورىنباسارى ساقتىق شارالارىن بارىنشا ساقتاۋعا شاقىردى.
«اۋرۋدى جۇقتىرىپ ەم ىزدەگەنشە، اۋىرماعان دۇرىس»، - دەدى سپيكەر.
