نۇرسۇلتان نازاربايەۆ: پاندەميا كەزىندە ە ا ە و ەلدەرى پروتەكتسيونيستىك دۇربەلەڭگە جول بەرگەن جوق
«بيىلعى جىل جاعىمسىز جايلارعا تولى بولدى. پاندەميا مەن ەكونوميكالىق داعدارىستىڭ سالدارى ايقىن بايقالدى. بەلارۋستەگى سايلاۋدىڭ كۇردەلى جاعدايدى ءوتۋى، ارمەنيادا بولعان وقيعالار - وسىنىڭ ءبارىن كورىپ- ءبىلىپ، ۋايىمداپ وتىردىق. مۇنىڭ ءبارى دە ارتتا قالدى دەگەن ۇمىتتەمىز. پاندەميانىڭ ءوزى داعدارىس ۋاقىتىنداعى مەملەكەتتىڭ ماڭىزدى ءرولىن كورسەتىپ بەردى. مەملەكەتتىك رەتتەۋدىڭ شۇعىل شارالارىنىڭ ارقاسىندا ءبىز پاندەميانىڭ جاعىمسىز سالدارىنان، ەكونوميكالىق بەلسەندىلىكتىڭ قۇلدىراۋىنان، ادام كاپيتالىن جوعالتۋ قاۋپىنەن اينالىپ وتتىك. تەك مەملەكەتتىك قولداۋ عانا ىشكى نارىقتاعى تۇراقتىلىقتى قامتاماسىز ەتتى»، - دەدى نۇرسۇلتان نازاربايەۆ وتىرىستا.
ەلباسى ەكونوميكالىق وداققا مۇشە مەملەكەتتەرىنىڭ كووپەراتسياسىنىڭ دەڭگەيى جوعارىلىعى بايقالعانىن، پاندەميامەن كۇرەس اياسىندا مەملەكەتتەر ءبىر- بىرىنە گۋمانيتارلىق كومەك جىبەرگەنىن جەتكىزدى.
«ە ا ە و اۋماعىندا كوروناۆيرۋس ينفەكتسياسىنىڭ ودان ارى تارالۋىنا جول بەرمەۋ ماقساتىندا بىرلەسكەن شارالار جوسپارى ازىرلەندى. وسى رەتتە ءوز وداقتاستارىنا ءاردايىم كومەك كورسەتىپ كەلە جاتقان رەسەيدىڭ ءرولىن ەرەكشە اتاپ وتكىم كەلەدى. بۇل كومەك پاندەميا ۋاقىتىندا ەرەكشە بايقالدى. پاندەميا كەزىندە ءبىز يىقتاسىپ تۇرىپ ءبىر- بىرىمىزگە كومەكتەستىك. رەسەي وسى ەلدەردىڭ ىشىندە ءبىرىنشى بولىپ كوروناۆيرۋسقا قارسى ۆاكسينا ازىرلەپ، ەكونوميكالىق وداقتاعى مەملەكەتتەرگە ۇسىندى. ونىمەن قوسا ە ا ە و ەلدەرى پروتەكتسيونيستىك دۇربەلەڭگە جول بەرمەدى، ءبىر- بىرىنە ەكونوميكالىق تۇرعىدا تەرىس ارەكەت ەتكەن جوق. بۇل - ءبىزدىڭ ينتەگراتسيا باعىتىنداعى باعدارىمىز دۇرىس ەكەنىن كورسەتەدى»، - دەدى نۇرسۇلتان نازاربايەۆ.
