لاۋازىمدى ادامدارعا شەتەلدىك بانكتەردەگى شوتتارعا يەلىك ەتۋى بويىنشا جاڭا شەكتەۋ ەنگىزىلدى
زاڭ جوباسىنا پارلامەنت دەپۋتاتتارى ق ر پرەزيدەنتىنىڭ 2019 -جىلعى 2 - قىركۇيەكتەگى جانە 2020 -جىلعى 1 - قىركۇيەكتەگى جولداۋلارىن ىسكە اسىرۋ ماقساتىندا باستاماشى بولدى. زاڭ جوباسىنىڭ ماقساتى - ازاماتتاردىڭ قۇقىقتارىن قورعاۋ كەپىلدىكتەرىن ارتتىرۋ، قىلمىستىق پروتسەستە تاراپتاردىڭ باسەكەلەستىگى مەن تەڭدىگىن قامتاماسىز ەتۋ، سىبايلاس جەمقورلىققا قارسى ءىس- قيمىل جونىندەگى زاڭنامانى جەتىلدىرۋ. زاڭ جوباسىنىڭ نەگىزگى مىندەتتەرى پروكۋرورعا ادام قۇقىقتارى مەن بوستاندىقتارىن قوزعايتىن نەگىزگى شەشىمدەردى كەلىسۋ مىندەتىن زاڭنامالىق جۇكتەۋ، سونداي- اق سىبايلاس جەمقورلىققا قارسى ءىس- قيمىلدىڭ جاڭا قۇرالدارىن ەندىرۋ ارقىلى سىبايلاس جەمقورلىققا قارسى زاڭنامانى جەتىلدىرۋ بولىپ تابىلادى.
زاڭ جوباسىندا 3 كودەكس پەن 2 زاڭعا وزگەرىستەر مەن تولىقتىرۋلار ەنگىزۋ كوزدەلگەن. قىلمىستىق ءىس جۇرگىزۋ زاڭناماسىنا ادام قۇقىقتارى مەن بوستاندىقتارىن قوزعايتىن سوتقا دەيىنگى تەرگەپ- تەكسەرۋ ورگاندارىنىڭ نەگىزگى شەشىمدەرىن پروكۋرورمەن مىندەتتى تۇردە كەلىسۋ تۋرالى نورمالار ەنگىزىلەدى، بۇل قىلمىستىق پروتسەستىڭ ءۇش بۋىندى مودەلىنە كوشۋدىڭ ماڭىزدى كەزەڭىنىڭ ءبىرى بولىپ تابىلادى.
اتالعان تولىقتىرۋلار كۇدىكتىلەردىڭ (ايىپتالۋشىلاردىڭ) عانا ەمەس، جابىرلەنۋشىلەردىڭ دە قۇقىقتارىن قورعاۋ كەپىلدىكتەرىن ارتتىرادى. قىلمىستىق كودەكسكە قۇقىق قورعاۋ ورگاندارىنىڭ قىزمەتكەرلەرى مەن سۋديالاردى، پارا بەرۋشىلەر مەن دەلدالداردى سىبايلاس جەمقورلىق قىلمىستار جاساعانى ءۇشىن جازالاۋدى قاتاڭداتۋ بويىنشا تۇزەتۋلەر ەنگىزىلدى. بۇدان باسقا، اۋىر جانە اسا اۋىر سىبايلاس جەمقورلىق قىلمىستارى ءۇشىن سوتتالعان ادامدارعا شارتتى تۇردە مەرزىمىنەن بۇرىن بوساتۋدى قولدانۋ مۇمكىندىگىن الىپ تاستاۋ ۇسىنىلادى.
«سىبايلاس جەمقورلىققا قارسى ءىس- قيمىل تۋرالى» زاڭدا جاۋاپتى مەملەكەتتىك لاۋازىمدى اتقاراتىن ادامدار جانە مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن ادامدار (ءماسليحاتتار دەپۋتاتتارىن قوسپاعاندا) مەن لاۋازىمدى ادامدار ءۇشىن شەتەلدىك بانكتەردەگى شوتتارعا يەلىك ەتۋى بويىنشا سىبايلاس جەمقورلىققا قارسى جاڭا شەكتەۋ ەنگىزۋ كوزدەلگەن. زاڭنامالىق اكتىلەردەگى قۇقىقتىق ولقىلىقتاردى جويۋ ماقساتىندا زاڭ جوباسىنا رەداكسيالىق، ناقتىلاۋ سيپاتىنداعى باسقا دا تۇزەتۋلەر ەنگىزىلدى. قازاقستان حالقىنا جولداۋىن جاريا ەتكەن ق ر پرەزيدەنتى قاسىم- جومارت توقايەۆ 2021 -جىلدان باستاپ مەملەكەتتىك قىزمەتشىلەردىڭ شەتەل بانكتەرىندە ەسەپشوتى بولۋىنا شەكتەۋ ەنگىزۋ كەرەكتىگىن ايتقان بولاتىن.
