بەيسەن قۇرانبەكتىڭ شاكىرتتەرىنە ءجيى ايتقان اقىلى

ونىڭ ەسىمى كۇللى قازاق جۇرتىنا «ايتۋعا وڭاي»، «قارەكەت» باعدارلامالارى ارقىلى جاقسى تانىلدى. ول وسى باعدارلامالار ارقىلى قانشاما تاعدىرعا اسەر ەتتى، قانشاما ىزگى قادامدارعا جول اشتى. جۇزدەگەن ادامداردىڭ جۇرەگىندە شىندىققا، ادىلدىككە دەگەن سەنىم ۇيالاتتى.

بەيسەن قۇرانبەك ومىردە دە اينالاسىنداعىلارعا، ارىپتەس ءىنى-قارىنداستارىنا اقىلىن ايتىپ، ومىردە دۇرىس ادام بولىپ قالىپتاسۋىنا كوپ كوڭىل بولگەن كىسى. قازىر «بەيسەن قۇرانبەك ايتتى» دەگەن سوزدەر ەل اراسىنا ءتالىم-تاربيە رەتىندە تارالعان.

وسى ورايدا Massaget.kz پورتالى بەيسەن قۇرانبەكتىڭ شاكىرتتەرىنە حابارلاسىپ، ولارعا قانداي اقىل-كەڭەس ايتقانىن سۇراپ ءبىلدى.

ءازيزا عازەز قىزى، جۋرناليست:

اعا بىزگە ۇنەمى «بىرەۋدىڭ ۋاقىتىن ۇرلاماڭدار. سەن بىرەۋدىڭ اقشاسىن نەمەسە قىمبات دۇنيەسىن قايتارىپ بەرە الۋىڭ مۇمكىن، ءبىراق ەشكىمنىڭ ەشقاشان ۋاقىتىن قايتارىپ بەرە المايسىڭ. سوندىقتان ۇرلىقشى بولماڭدار!» دەپ ۇرساتىن. اعا بىزگە كوپ ۇرىسپايتىن، ۇرىسسا تەك وسىنداي ادامي قۇندىلىقتار ءۇشىن ۇرىساتىن. وسىنىڭ ءبارىن ءوز ۋاقىتىنىڭ ساناۋلى ەكەنىن ءبىلىپ ايتتى ما دەپ ويلايمىن. سوسىن اعا بىزگە كەز كەلگەن قارىم-قاتىناستى ۇستاپ تۇراتىن 5 ەرەجە بار دەيتىن:

1. ءسوز قولداۋ (قانداي كومەك كەرەك، سەنىڭ قولىڭنان كەلەدى، ساعان سەنەمىن، قۇلاعىم سەندە، ت. ب)؛

2. كومەكتەسۋ (ءۇيىپ-توگىپ اپارىپ بەر دەگەن ەشكىم جوق، قولىڭنان كەلگەنشە تىرىس. ءجاي ءسوز بوپ قالماسىن)؛

3. تولىق نازار اۋدارۋ (تىڭدا، ءتۇسىن، نازارىڭ، ويىڭ سول ادامدا بولسىن)

4. فيزيكالىق بايلانىس (قۇشاقتا، ءسۇي، قولىن قىس...)

5. سىيلىق سىيلاپ تۇر (جاي ءبىر شوكولاد الا سال، ءبىر كامپيت. كوپ ادام مۇنى ەسكەرمەيدى، ءبىراق بۇل ماڭىزدى)

اعا ىلعي: «ەشكىمدى كىنالاما، ەشكىمدى سىناما!» دەپ ايتىپ وتىراتىن. «مەن بىرەۋدى جامانداعانىمدى، سىناعانىمدى ەستىدىڭدەر مە؟ ودان ادامعا كەلىپ كەتەتىن پايدا جوق»، - دەيتىن.

مۇنىڭ ءبارىن اعا ماعان ستۋدەنت كەزىمنەن باستاپ ۇيرەتتى. اعانىڭ ەشكىمنىڭ كوڭىلىنە تيگەنىن، رەنجىتكەنىن كورمەدىم. ول جىلاعاندى ۇناتپايتىن. قازىر جىلاپ ەسىمە العىم كەلمەيدى، اتتەڭ. سەبەبى اعا بىزگە ۇنەمى قۋانىش سىيلادى. اعانىڭ جانىندا جۇرگەن جەتى جىل ماعان بەرىلگەن ءتاڭىردىڭ ەڭ ۇلكەن سىيى ەكەن.

اقجەلەڭ راحاتدين، جۋرناليست:

بەيسەن اعانىڭ قاسىمىزدا جۇرگەنىنىڭ ءوزى اقىل ەدى. تۇسىرىلىمنەن شىققان سوڭ، شارشاپ كرەسلودا تەلەفونىنا قاراپ وتىراتىن. اعا سول كەزدە تەلەفونىنا ءمان بەرمەي، اينالاسىنداعى ادامداردى باقىلاپ وتىرادى ەكەن. كىم نە ىستەپ ءجۇر، كىم جۇمىسىن قالاي ىستەپ ءجۇر، كىمنىڭ كوڭىل- كۇيى جوق. سونىڭ ءبارىن باقىلاپ ارتىنان سول ادامدى شاقىرىپ، شاي ىشۋگە الىپ كەتىپ، سويلەسەتىن. ماسەلەسى بولسا، بىرگە تالقىلايتىن. اعا اپتاسىنا 1-2 رەت قانا كەلەدى. ءبىراق اينالاسىنداعى ادامداردىڭ بارلىعىنىڭ نە ىستەپ جۇرگەنىن ءبىلىپ جۇرەدى دەپ تاڭعالاتىنبىز.

كەيىن تاعى ءبىر قايتالاپ ايتاتىن كەڭەسى «ادامنىڭ ۋاقىتىن ۇرلاماڭدار!» دەيتىن. ءوزى كەز كەلگەن جەرگە ۋاقىتىنان بۇرىن باراتىن. كەشىگىپ كەلسەك، بىزگە ۇرساتىن. ول ءۇشىن بىزگە «شتراف» جازعىزىپ، «كەشىككەنىڭ ءۇشىن مىنانشا تەڭگە تولەيسىڭ» دەيتىن. بىزگە جينالىستى اعا كوبىنە سىدىق اعانىڭ شۇباتحاناسىندا شاي بەرىپ وتكىزەتىن. ەگەر جينالىسقا كەشىگىپ كەلسەك، ءجۇز تەڭگەدەي «شتراف» بەلگىلەپ كەيىن سونى شايعا قوسىپ جىبەرەتىن. اعا وسى ارقىلى بىزگە ۋاقىتتىڭ قادىرىن تۇسىندىرگىسى كەلدى. اعا جينالىستان سوڭ قالعان جاستارعا «سەن قاشان ۇيلەنەسىڭ، سەن قاشان تۇرمىسقا شىعاسىڭ؟!» دەيتىن. «زامەتكاسىنا» بويداقتاردان قاي كۇنى تۇرمىس قۇراتىنىن نەمەسە ۇيلەنەتىنىن جازاتىن.

مىسالى ءازيزا «2018-جىلى 28- قاراشا» دەسە، ونى بەلگىلەپ قوياتىن. «وسى كۇنگە دەيىن تۇرمىسقا شىقپاساڭدار، مەن كىمدى ايتام، سوعان شىعاسىڭدار» دەيتىن. وسىلاي بەيسەن اعانىڭ ايتۋى بويىنشا ۇيلەنگەن 90 عا جۋىق جۇپ بار ەكەن.

كەرىم ايان قىزى، جۋرناليست:

بەيسەن اعا مىنا ءۇش نارسەنى مىقتاپ ۇيرەتكەن ەدى: ايىپتاما! شاعىمدانبا! اقتالما!

باسىندا ۇيرەنۋ قيىن بولدى. قيت ەتسە بولدى، ءوزىمدى اقتاعىم كەپ «اعا، اناۋ كىسى عوي بۇيتكەن» دەي بەرگەننەن-اق ءسوزىڭدى تىڭداماي سۇق ساۋساعىن كورسەتىپ «توقتا! شاعىمدانبا!» دەپ تاعى ءبىر ەسكەرتەتىن ەدى. كەيىن بولعان ىسكە ەشكىمدى كىنالاماۋعا تىرىساتىن بولدىم. ءار نارسەنىڭ سەبەبىن وزىمنەن ىزدەۋدى ۇيرەندىم. «جاماندىق كورسەم وزىمنەن، جاقسىلىق كورسەم وزىمنەن» دەگەن سۇلتانماحمۇت تورايعىروۆتىڭ ءسوزىن اعادان ءجيى ەستىپ، بولعان ىسكە ەشكىمدى ايىپتامايتىن بولدىق.

بىرەۋگە كىنا ارتىپ، وعان باسقاسى دا سەنە باستاعان سايىن تەك ادامنىڭ تەرىس جاعىن اڭدۋعا، ءار جەردەن كىر ىزدەۋگە ۇمتىلىپ تۇرادى ەكەنسىڭ. اعا ءبارىمىزدى وسەك ايتۋدان، وزىمىزگە كىر جاعىپ جۇرۋدەن قۇتقاردى. بارىنەن بۇرىن وسى ءۇش نارسەنى قاعيدا قىپ العالى ءومىردىڭ تاماشا ەكەنىن ۇقتىم. ايتپەسە، ءىشىمىزدىڭ ءبارى كىنا، رەنىشتەرگە تولىپ، جامان ەنەرگيامىز شاشىلىپ جۇرەتىن ەدى. ال اقتالماس ءۇشىن جاسايتىن ءىسىمدى «وسى دۇرىس پا؟» دەپ بىرنەشە رەت ويشا قورىتىپ الاتىن بولدىم. بۇل سوڭىندا «قاپ» دەمەس ءۇشىن ءار ءىسىمىزدى تياناقتى ويلانىپ ىستەۋگە كومەكتەستى. ءالى كۇنگە دەيىن وسى ءۇش ەسكەرتۋ ميىمدا ساڭقىلدايدى دا تۇرادى. دەر كەزىندە ەسىمدى جيناۋعا تىرىسامىن.

massaget.kz