ۇلىتاۋدا كوكبورىگە ەسكەرتكىش ورناتىلدى

ول ۇلىتاۋدان 35 شاقىرىم جەردە - جەزقازعانعا اپاراتىن جول بويىنداعى جولاۋشىلار تىنىستايتىن «كۇمىسبۇلاق» دەمالىس ورنى اۋماعىندا ورناتىلدى. جاڭا نىسان - ۇلىتاۋدى حالىقارالىق ەتنوتۋريزم ورتالىعىنا اينالدىرۋ باعىتىندا قولعا الىنعان جوبالاردىڭ ءبىرى، دەپ حابارلايدى قازاقپارات ءتىلشىسى.

ەرتە داۋىردەن كەلە جاتقان جالپى تۇركى جۇرتىندا «كوكبورىدەن تاراعانبىز» دەگەن اڭىزدى بىرەۋ بىلسە، بىرەۋ ۇمىتقان. كوكبورىنى قاسيەت پەن كيەنىڭ، قايتپاس قايسارلىقتىڭ تامىرى، ءومىر ءسۇرۋ تالاپتارىنىڭ وزەگى رەتىندە قابىلداعان. كوكبورىگە ءتان جىگەر مەن مىنەز- قۇلىقتى ۇرپاق بويىنا سىڭىرۋگە مۇددەلى بولعان. مۇنى بۇگىنگى كۇنگە ۇزىلمەي جەتكەن اڭىزدار دەرەكتەرى ايعاقتايدى. تۇرقى اسا تارتىمدى نىساننىڭ يدەيا اۆتورى ءارى ءمۇسىنشىسى - ەۋرازيا ديزاينەرلەر وداعىنىڭ مۇشەسى امانتاي مەڭدىعاليەۆ.

«ۇلىتاۋ كوكبورىسى» اتاۋى تەلىنگەن ەڭسەلى ەسكەرتكىشتىڭ بيىكتىگى - 9,70 مەتر، ونىڭ ىشىندە ءمۇسىننىڭ بيىكتىگى - 6 مەتر، ال تۇعىرى - 3,70 مەتر. كوكبورى ءمۇسىنىنىڭ جەكە سالماعى 2 توننا بولسا، تۇعىرىمەن قوسا ەسەپتەگەندەگى سالماعى - 5 توننا شاماسىندا. ىشكى قۇرىلىمى تەمىردەن ازىرلەنىپ، جالپى ءبىتىمى 60 گرادۋس اياز بەن ىستىققا دەس بەرمەيتىن پلاستيك ماتەريالدان قۇيىلىپ جاسالعان. ىرگەتاسى وتە مىعىم - 3/3 مەتر اۋماقتا 2 مەتر تەرەڭدىكتەن باستاپ ساپالى بەتونمەن قۇيىلعان. «شىعارماشىل ادامنىڭ ۇنەمى وي ۇستىندە جۇرەتىنى، ىزدەنىستە بولاتىنى بەلگىلى.

«ۇلىتاۋ كوكبورىسى» يدەياسى مەنى ستۋدەنت كەزىمنەن «مازالايتىن». وسىدان ءبىر جىلعا جۋىق ۋاقىت بۇرىن ءمۇسىننىڭ ەسكيزىن جاساپ، قۇزىرلى مەملەكەتتىك ورگان – ق ر مادەنيەت جانە سپورت مينيسترلىگىنەن اۆتورلىق قۇقىق كۋالىگىن دە الىپ قويعان بولاتىنمىن. الايدا، ايتپاسا دا بەلگىلى سەبەپتەرمەن ونى جالپاق جۇرتقا جارقىراتىپ كورسەتۋدىڭ ورايى كەلمەي- اق قويعان. «ساباقتى ينە - ساتىمەن» دەمەكشى، باعالى يدەيانى ۇلىتاۋ اۋدانىنىڭ اكىمى بەرىك ءابدىعالي ۇلىنىڭ قولداۋىمەن جۇزەگە اسىرۋ مۇمكىندىگى تۋدى. ورايى كەلىپ تۇرعان شارۋانى تياناقتاۋعا ءوزىمنىڭ ۇلىم، ءمۇسىنشى ارمات مەڭدىعالييەۆتىڭ كوپ كومەگى ءتيدى»، - دەيدى ءمۇسىنشى امانتاي قاجيم ۇلى.

اۆتوردىڭ ايتۋىنشا، بۇل - الەمدە وسىنداي سيپاتتاعى ءارى وسىنداي كولەمدەگى تۇڭعىش ەسكەرتكىش. ەندى دۇنيە جۇزىندەگى ەڭ ءىرى كوكبورى ءمۇسىنى حالىقتىڭ رۋحىن كوتەرىپ، نامىسىن جانىپ، ەلدىك پەن ەرلىك ۇستانىمىنا ۇندەپ تۇرادى. اۋداننىڭ اتقارۋشى بيلىگى ونى گيننەستىڭ رەكوردتار كىتابىنا ەنگىزۋ شارالارىنا كىرىستى.