قوستانايدا كرەمني كاربيدىن وندىرەتىن زاۋىتتىڭ قۇرىلىسى باستالدى

ليساكوۆ قالاسىندا 2020 -جىلدىڭ 11 ايىندا 50 ميلليارد تەڭگەنىڭ ءونىمى وندىرىلگەن. اتاپ ايتقاندا، ءسۇت ءوندىرىسى - %32، مەتالل قۇرىلعىلارىنىڭ ءوندىرىسى - %31 ارتتى. ماشينا جاساۋ سەكتورىندا دا ءوسىم بار. 542 دەستەلەگىش قۇراستىلىپ، ەگىس كەشەندەرىنىڭ ءوندىرىسى 4 ەسە ۇلعايدى.

«نەگىزگى كاپيتالعا سالىنعان ينۆەستيتسيالار كولەمى 21 ميلليارد تەڭگەنى قۇرادى. «بوبروۆسكي كۆارتسيت» جەكە شارۋا قوجالىعى 8 ميلليارد تەڭگەگە كرەمنيي كاربيدىن وندىرەتىن زاۋىتتىڭ قۇرىلىسىن باستادى. الدىن الا بولجام بويىنشا زاۋىت جىلىنا 34 مىڭ توننا كرەمنيي كاربيدىن وندىرەدى. ناتيجەسىندە قالانىڭ 175 تۇرعىنى تۇراقتى جۇمىسقا ورنالاسادى. بۇدان بولەك، قالاداعى شاعىن اۋدانداردىڭ بىرىندە قۇنى 430 ميلليون تەڭگەنى قۇرايتىن سپورتتىق- ويىن- ساۋىق پاركىنىڭ قۇرىلىسى جۇرگىزىلۋدە. كوروناۆيرۋس پاندەمياسىنا بايلانىستى ساياباقتىڭ پايدالانۋعا بەرۋ مەرزىمى 2021 -جىلعا اۋىستىرىلدى»، - دەدى المات يسماعۇلوۆ.

ليساكوۆ قالاسىنىڭ تۇرعىن ءۇي قۇرىلىسى سالاسىندا دا ىلگەرىلەۋ بار. وسى جىلى وڭىردە 9254 شارشى مەتر تۇرعىن ءۇي پايدالانۋعا بەرىلدى، بۇل 2019 -جىلدىڭ سايكەس كەزەڭىنەن %3,3 ارتىق. جەكە ينۆەستيتسيا ەسەبىنەن جەرگىلىكتى ينۆەستور 16 پاتەرلى جالعا بەرىلەتىن تۇرعىن ءۇي سالىپ جاتىر.

قالادا «بيزنەستىڭ جول كارتاسى 2025» مەملەكەتتىك باعدارلاماسى شەڭبەرىندە 105,7 ميلليون تەڭگەگە 10 جوبا ماقۇلدانعان. ال «قاراپايىم زاتتار ەكونوميكاسى» سالالارىن جەڭىلدىكپەن كرەديتتەۋ باعدارلاماسىنا 103 ميلليون تەڭگە ءبولىندى. ليساكوۆ تۇرعىندارى ورتالىقتاندىرىلعان اۋىز سۋ جۇيەسىنە تولىقتاي قوسىلماق. قازىر 11,5 شاقىرىم بولاتىن ماگيسترالدىق سۋ قۇبىرلارىن قايتا جاڭارتۋ بويىنشا ەكى جىلدىق جوبالار باستالدى. اۋقىمدى جۇمىستارعا 560 ميلليون تەڭگەدەن استام قارجى باعىتتالدى. سوڭعى كەزدەرى قالا تۇرعىندارى مەديتسينالىق نىسانداردىڭ جۇمىسىنا سىن ايتىپ، قالا اكىمىنىڭ بلوگىنا حاتتار جازعان بولاتىن.

قازىر ورتالىق اۋرۋحانانىڭ ماتەريالدىق- تەحنيكالىق بازاسىن جاقسارتۋ بويىنشا كەشەندى شارالار قولعا الىندى. قالالىق اۋرۋحاناعا 4 سانيتارلىق اۆتوكولىك جانە دەمەۋشىلىك كومەك بويىنشا 1 رەانيموبيل، مەديتسينالىق جابدىق، 4 جاڭا Hyundai ماركالى اۆتوكولىك ساتىپ الىندى. ليساكوۆتا ءدارى- دارمەك پەن جەكە قورعانىس قۇرالدارىنىڭ 3 ايلىق قورى بار.