جامبىل وبلىسىندا مونشادا تۇتىنگە ۋلانعان ءتورت بالا اۋرۋحاناعا ءتۇستى

بيىلعى جىلدىڭ 6-جەلتوقسانىندا ساعات 22.10 دا كومىرمەن جاناتىن مونشاداعى جىلىتۋ پەشىنىڭ اقاۋىنان ءتورت بالا تۇتىنگە ۋلانىپ، اۋرۋحاناعا ءتۇستى. وعان پەشتەگى ساڭىلاۋدىڭ جانە ءتۇتىن قۇبىرىنىڭ تازارتىلماعاندىعى سەبەپ بولعان.

«جامبىل وبلىسى، جامبىل اۋدانى، جالپاقتوبە اۋىلىنداعى جەكە تۇرعىن ءۇيدىڭ مونشاسىندا شومىلۋ كەزىندە ۋلى گازبەن ۋلانۋ سالدارىنان 2013، 2015، 2016، 2019 -جىلدارى تۋعان بالالار ورتاشا دارەجەدەگى ۋلانۋ جاعدايىمەن اۋرۋحاناعا ءتۇستى. جالپى مۇنداي ۋلانۋ وقيعالارى كوبىنەسە گاز ونىمدەرى تولىق جانباعان جاعدايدا پايدا بولعان گازدىڭ ادام اعزاسىنا اسەرى سالدارىنان ورىن الادى»، - دەلىنگەن وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتىنىڭ حابارلاماسىندا.

اتالعان دەپارتامەنت ماماندارى ەرەسەكتەرگە قاۋىپسىزدىك ەرەجەلەرىن بارىنشا ساقتاۋعا، بالالاردى قاراۋسىز قالدىرماۋعا شاقىرادى.