اتىراۋدا اۋىل مەكتەبىنىڭ وقۋشىلارى روبوت، درون قۇراستىرىپ جاتىر
وبلىستىق ءبىلىم باسقارماسى باسپا ءسوز قىزمەتىنىڭ مالىمەتىنشە، قىزىلقوعا اۋدانىنداعى ساعىز ورتا مەكتەبىندە STEM زەرتحاناسى بار. قازىر وندا 5-11 سىنىپتا وقيتىن 30 وقۋشى قوسىمشا ءدارىس الادى.
«ءبىزدىڭ زەرتحانادا وقۋشىلار قۇراستىرعان درون ادەتتەگىدەي اۋەدە ۇشادى. ءتىپتى سۋ بەتىندە ءجۇزىپ، ۆيدەو تۇسىرەدى. دروننىڭ اۋەدە ۇشۋ جىلدامدىعى سەكۋندىنا - 1,5 مەتر. ال سۋ بەتىندە سەكۋندىنا 2,5 مەترگە دەيىن جۇزەدى. ازىرگە سىناما تۇرىندە قۇراستىرىلعان دروننىڭ قۋاتى 6 مينۋتقا جەتەدى. كەيىن قايتا قۋاتتاۋعا بولادى. سونىمەن بىرگە، وقۋشىلار اعاش ستانوگىمەن، 3D نوۋتبۋكپەن جۇمىس ىستەۋدى ۇيرەنۋدە» - دەيدى STEM زەرتحانانىڭ لابورانتى ءلايلا شىڭدىبايەۆا.
ونىڭ ايتۋىنشا، زەرتحانادا جوعارى سىنىپتىڭ وقۋشىلارى ارنايى باعدارلاما جۇكتەلگەن 3D پرينتەردىڭ كومەگىمەن تەلەفون تىرەۋىشىن، قۇمىرالار مەن ەرەكشە فورماتتاعى اباي كىتابىن، برەلوكتار، مەدالدار جاساپ شىعارعان. سونداي- اق، وقۋشىلار STEM زەرتحانادا ءۇش ءتۇرلى فۋنكتسيا اتقاراتىن روبوتتار جاساعان. ماسەلەن، مبوت روبوتى كەدەرگىلەردەن وزدىگىنەن بۇرىلۋ ارقىلى وتە الادى. ەكىنشى روبوت اۋەنمەن قوزعالادى. ءۇشىنشى روبوت باعدارلامامەن ارنايى سىزىلعان سىزبالار كومەگىمەن جۇرەدى.
«بۇل زارتحانا ماتەماتيكا، ينجەنەريا باعىتىنداعى وسى زامانعى تەحنولوگيالىق ىزدەنىستەرگە باعىتتالعان. جوعارى سىنىپ وقۋشىلارى روبوتتاردى قۇراستىرادى. ال، تومەنگى سىنىپ وقۋشىلارى درون، روبوت قۇراستىرۋدىڭ تاسىلدەرىن ۇيرەنىپ جاتىر» - دەيدى ساعىز ورتا مەكتەبى ديرەكتورىنىڭ مىندەتىن اتقارۋشى مەيرامگۇل اياعانوۆا.
ءبىر ەرەكشەلىگى، اۋدانداعى وزگە مەكتەپتەردە مۇنداي STEM زەرتحانا جوق. بۇل مەكتەپتەگى زەرتحانا بيىلعى قاڭتاردا ىسكە قوسىلعان. اتالعان مەكتەپتىڭ حيميا ءپانىنىڭ ءمۇعالىمى اقىنتا بيسەمبيەۆا بىلتىر رەسپۋبليكالىق عىلىمي جوبالار بايقاۋىنا قاتىسىپ، جەڭىمپاز اتانعان. جۇلدەگە ۇتىپ العان زەرتحانانى ءوزى ەڭبەك ەتەتىن مەكتەپكە ورنالاستىرعان. ەكى جىل بۇرىن اشىلعان ساعىز ورتا مەكتەبىندە 424 وقۋشى وقيدى. مۇندا كادەت سىنىبى، وندىرىستىك شەبەرحانالار، تىگىن تسەحى، گيمناستيكا ورتالىعى مەن ت ي ر الاڭى بار. وقۋشىلار شىعارماشىلىعىن دامىتۋ ماقساتىندا ءبىلىم ورداسىندا 16 ۇيىرمە مەن 4 كلۋب اشىلعان.. سونىڭ ءبىرى - بي ۇيىرمەسى.
«ءدارىس كلاسسيكا، ەسترادا جانە ۇلتتىق بي باعىتىندا وتەدى. ۇيىرمەگە قاتىسىپ جۇرگەن وقۋشىلاردىڭ ونلاين تۇردە ءوتىپ جاتقان «جارىق جۇلدىز» كونكۋرسىندا شوقتىعى بيىك تۇر» - دەيدى بي ۇيىرمەسىنىڭ جەتەكشىسى باقىت قويشىعالي.
ەسكە سالا كەتەلىك، اتىراۋلىق وقۋشىلاردىڭ عىلىمي جۇمىسى حالىقارالىق جيناققا ەنگەنىن جازعان ەدىك.
