مىلتىعىن پوليتسيا جيناپ العان قويشىلار قاسقىردان قالاي قورعانارىن بىلمەي وتىر

ال قيىر قونىپ، شەت جايلاپ جۇرگەن شوپانداردا قىلار قايران جوق. ءبىرلى جارىم مىلتىقتى پوليتسيا جيناپ العان. قازىر قۇمداعى جۇرتقا كوروناۆيرۋستىڭ كەسىرىنەن قاتىناس تا سيرەدى. كۇنكورىسىن تەك مالدان ايىرىپ وتىرعان حالىققا قاسقىردىڭ باسىنعانى تىپتەن قيىن بولدى. ازعىر قۇمىندا ءتۇز تاعىلارى توبىمەن جۇرەدى دەگەندى ەستيتىنبىز. ءبىراق قار ءتۇسىپ، اياز قىسقانشا باعىمداعى مالعا شاپپايتىن. ەندى جۇقپالى ىندەتكە بايلانىستى كولىك اياعى سيرەگەسىن قاسقىرلار قاۋقارسىز شوپاننان ىعىسۋدى قويعان. ال ولاردى ۇركىتەتىن مالشىلاردا مىلتىق جوق.

امانعالي عابباسوۆ، اسىل تۇقىمدى قوي زاۋىتىنىڭ شوپانى:

- كۇنى كەشە عانا قاسقىر شاۋىپ، ءبىر باس قويدى تارتىپ جەپ كەتتى. ونى قالاي ەتەمىز؟ مىلتىق جوق اتاتىن. جيناپ الىپ كەتتى. ەندى كەرى الايىق دەسەك قىرعىن قۇجات كەرەك. مالدى تولەتەدى، نانبايدى. مال باعۋ قيىنداپ بارادى.

ارىستانبەك كەنجە، ءتىلشى:

- ادەتتە اتتى قويشى - تاقىمى قاتتى قويشى دەگەن يتقۇس اتتى كىسىدەن ىعاتىن. ال قازىر قىردىڭ قاسقىرلارىنىڭ ابدەن باسىنعانى سونداي الدارىنداعى مالىن تارتىپ جەپ جاتقان كورىنەدى. وسى ءبىز ارالاپ كورگەن شارۋاشىلىقتىڭ وزىندە 4 ايدا 32 باس مال شىعىن بولعان. شارۋشالىققا قاراستى ون بەس وتاردا 12 مىڭنان استام قوي قىستاققا ءتۇستى. ازىرگە كۇن جىلى بولعاندىقتان مال ورىستەن قالماعان. ءبىراق ءتۇز تاعىلارى تىنىم بەرەر ەمەس. شارۋاشىلىقتا ەكسپورتقا اسىل تۇقىمدى ەدىلباي قويى باعىلاتىندىقتان مۇندا مال باسى قىمبات. ساۋلىق قوي 60 مىڭ، قوشقارى 120 مىڭ تەڭگە تۇرادى ەكەن. قاسقىرعا جىعىلعان قويلاردى قالتاسىنان تولەيتىن شوپاندار شاش ەتەكتەن شىعىنعا باتىپ ءجۇر.

امانگەلدى قابدولوۆ، قوي فەرماسىنىڭ مەڭگەرۋشىسى:

- بارلىق جەردە دە يت- قۇس كوبەيىپ كەتتى. اۋلاۋعا زاڭ جوق. قازىر مىلتىقتى ميليتسيا تاركىلەپ الدى، رۇقسات جوق دەپ. مىسالى، كورشى رەسەي شاباندارىندارىمەن كورشى تۇرامىز. ولارعا ميليتسيا كەلىپ، وزدەرى تىركەپ زاڭداستىرادى. بىزگە دە سونداي كومەك بولا ما ەكەن؟

كومەك بولمايدى ەكەن. سەبەبى زاڭسىز وت قارۋ ۇستاۋعا رۇقسات ەتۋدىڭ وزىندىك ەرەجەسى بار. تەك بيىلدىڭ وزىندە ازعىر وڭىرىنەن 6 مىلتىق تاركىلەنىپتى. سەبەبى قۇجاتتارى جوق.

گۇلنازيرا مۇحتاروۆا، وبلىستىق پ د رەسمي وكىلى:

- جەكەلەگەن قارۋ تۇرلەرىنىڭ اينالىمىنا مەملەكەتتىك باقىلاۋ جاساۋ» تۋرالى زاڭعا سايكەس، ورگانداردا تىركەلمەگەن قارۋ- جاراقتار تاركىلەنەدى. ۇيىندە زاڭسىز قارۋ ۇستاعان تۇلعا اكىمشىلىك جاۋاپكەرشىلىككە تارتىلادى.

ەندى شوپاندارعا قارۋ يەلەنۋ ءۇشىن الدىمەن قۇجاتتارىن راسىمدەۋ كەرەك. سودان كەيىن ۋچاسكەلىك ينسپەكتوردىڭ رۇقساتىمەن عانا مىلتىق ساتىپ الا الادى. ال جەرگىلىكتى بيلىك قۇقىق قورعاۋ ورگاندارىمەن بىرلەسىپ تۇيتكىلدى ماسەلەنىڭ ءتۇيىنىن تارقاتۋعا قامدانىپ جاتىر.

www.24.kz