بريتانيادا كوروناۆيرۋسقا قارسى ۆاكسينا ەگۋ كەلەسى اپتادا باستالادى
نۇر- سۇلتان. قازاقپارات - بريتاندىق MHRA تۇراقتاندىرۋشى ورگانى تۇرعىنداردى Covid-19 ۆيرۋسىنان % 95- عا دەيىن قورعاۋعا قابىلەتتى ۆاكسينانى ەگۋ كەلەسى اپتادا باستالاتىنىن مالىمدەدى، دەپ حابارلايدى قازاقپارات BBC - گە سىلتەمە جاساپ.
ەكپەنى قاجەت ەتەتىن ادامداردا، ماسەلەن، قارتتار ۇيىندەگى قاريالاردا ۆاكسينا قابىلداعاننان كەيىن يممۋنداۋ پروتسەسى بىرنەشە كۇننىڭ ىشىندە باستالۋى مۇمكىن. بريتانيا 40 ميلليون ەكپەگە تاپسىرىس بەردى. بۇل 20 ميلليون ادامعا ۆاكسينا جاساۋ ءۇشىن جەتكىلىكتى.
پرەمەر- مينيستر بوريس دجونسون تۆيتتەردە «بۇل بىزگە قالىپتى ءومىرىمىزدى قايتارۋعا جانە ەكونوميكامىزعا سەرپىن اكەلۋگە كومەكتەسەتىن ۆاكسينا» دەپ جازدى.
دەنساۋلىق ساقتاۋ ءمينيسترى مەتت حەنكوك BBC Breakfast-قا بەرگەن سۇحباتىندا ەكپە جاساتۋ كەزەگى كەلگەندە NHS ادامدارعا حابار بەرەتىنىن ايتتى. سونداي- اق، ول كوكتەمنەن، پاسحادان باستاپ جاعداي جاقسارىپ، جازدا ادامدار الاڭسىز دەمالا الاتىنىنا سەنىمدى ەكەنىن جەتكىزدى. 50-گە جۋىق اۋرۋحانا ەكپەنى كۇتىپ وتىر.
قازىرگى ۋاقىتتا ءماجىلىس- ورتالىقتارى سىندى جەرلەردە ۆاكسينا جاساۋعا ارنالعان ورىندار دايىندالىپ جاتىر. NHS اتقارۋشى ديرەكتورى سايمون ستيۆەنس دەنساۋلىق ساقتاۋ قىزمەتى «ەل تاريحىنداعى ەڭ اۋقىمدى ۆاكسيناتسيالاۋ پروتسەسىنە دايىندالىپ جاتقانىن» مالىمدەدى. ساراپشىلاردىڭ پىكىرىنشە، ۆاكسيناتسيا باستالعانىمەن ادامدار كوروناۆيرۋس تالاپتارىنا مۇقيات بولىپ، الەۋمەتتىك قاشىقتىق پەن ماسكا تاعۋ ەرەجەسىن ساقتاعانى ابزال.
اۆتور: بالنۇر قوجاگەلدى
