پرەزيدەنت تاپسىرماسىمەن اقتوبەدەگى ۇسەنوۆتەر وتباسىنىڭ باسپانا ماسەلەسى وڭ شەشىمىن تاپتى
وبلىس اكىمى وڭداسىن ورازالين 4 بالانىڭ اسىراۋشىسى - جالعىزباستى امانگەلدى زايدۋللايەۆقا 3 بولمەلى پاتەر كىلتىن تاپسىرىپ، بالالاردىڭ باسپانالى بولۋىنا اتسالىسقان ازاماتتارعا العىس ءبىلدىردى، دەپ حابارلايدى قازاقپارات.
«قازاق حالقىندا «قايىرىمدىلىق جاساساڭ، قايىرىن ءوزىڭ كورەسىڭ» دەگەن قاناتتى ءسوز بار. قايىرىمدىلىق جاساۋ، جابىرقاعاننىڭ جانىنان تابىلۋ، شاراسىزعا كومەك قولىن سوزۋ - حالقىمىزدىڭ قانىنا بىتكەن اسىل قاسيەتتەرىنىڭ ءبىرى. بۇگىنگى شارا، ءبىزدىڭ بولاشاعىمىز - بالالار ءۇشىن جاسالىپ جاتقان يگى ءىس. اتالعان ماسەلە مەملەكەت باسشىسىنىڭ تىكەلەي باقىلاۋىندا. ءبىزدىڭ مىندەتىمىز - بالانىڭ جۇزىنەن كۇلكى، جۇرەگىنەن قۋانىش كەتپەيتىن ءومىر سىيلاۋ.
« حارەكەت» قايىرىمدىلىق قورى، «نەكتار» قۇرىلىس كومپانياسى، بارلىق كومەك قولىن سوزعان قايرىمدى ازاماتتاردىڭ ارقاسىندا ءبىر وتباسى باسپانالى بولدى»، - دەپ اتاپ ءوتتى وڭداسىن ورازالين.
كوپبالالى وتباسى بۇعان دەيىن امانگەلدى زايدۋللايەۆتىڭ اعاسىنىڭ مەنشىگىندەگى شاعىن ۇيدە تۇرىپ كەلگەن. قيىن جاعدايدا قالعان بۇلدىرشىندەردىڭ ماسەلەسىن شەشۋ ماقساتىندا ءوڭىر باسشىسى جەتەكشى قۇرىلىس كومپانيالارىمەن كەلىسسوز جۇرگىزدى. ناتيجەسىندە «نەكتار» قۇرىلىس كومپانياسىنىڭ باسشىسى شاميل كاسپرانوۆ جاڭاشا ۇلگىدە سالىنعان، اۋماعى 93 شارشى مەتر بولاتىن ءۇش بولمەلى پاتەردى جەڭىلدەتىلگەن باعامەن ۇسىندى.
«نەكتار» تۇرعىن ءۇي كەشەنىندە ورنالاسقان جاڭا پاتەردىڭ ىشىنە قاجەتتى مۇلىك ساتىپ الىپ بەرۋگە وڭىردەگى ءىرى كاسىپورىندار دا اتسالىستى.
ۇسەنوۆتەر وتباسىنا بۇعان دەيىندە مەملەكەت تاراپىنان ءتۇرلى اكسيالار اياسىندا قولداۋلار كورسەتىلىپ كەلدى.
