تۇركىستاننان تاشكەنتكە تەمىر جول سالىنادى - نۇرسۇلتان نازاربايەۆ

بۇل تۋرالى كەشە ق ر تۇڭعىش پرەزيدەنتى — ەلباسى نۇرسۇلتان نازاربايەۆ «Qazaqstan» ۇلتتىق ارناسىنداعى «تۇركىستان: كونە مەن كەلەشەك كوپىرى» دەرەكتى فيلمىندە ايتتى، دەپ حابارلايدى قازاقپارات.

«قازىردىڭ وزىندە تۇركىستانعا 200 مىڭداي ادام بارادى. جول جوق بولسا دا، قوناق ءۇي بولماسا دا. بيىل دۇنيەجۇزىلىك ستاندارتتا سالىنعان اۋەجايدى سالدىردىق. قانداي ۇلكەن ۇشاق بولسا دا قوندىرا الادى. 3 ميلليونعا جاقىن قوناقتاردى قارسى الا الادى. سونىڭ ارقاسىندا كەلەم دەپ وتىرعان تۇركىتەكتەس اعايىندار جەتەتىن بولادى. قازىر كورشىلەرمەن تۇركىستاننان تاشكەنتكە تەمىرجول سالۋ جونىندە سويلەسىپ جاتىرمىز، ونى دا شەشەمىز. سوندا سامارقان، بۇقارا، تاشكەنت، شىمكەنت، تۇركىستان قالالارىنان ۇلكەن شەڭبەر جاسالىپ، تۋريستىك جول اشىلادى. ءبىزدىڭ ساناعىمىز بويىنشا 2025-2030-جىلعا قاراي 3,5 ميلليون حالىق كەلۋى كەرەك»، - دەدى ەلباسى.

ايتا كەتەيىك، «تۇركىستان: كونە مەن كەلەشەك كوپىرى» دەرەكتى فيلمى ن. نازاربايەۆتىڭ «قازاقستان» رەسپۋبليكالىق تەلەراديوكورپوراتسياسىنىڭ باسقارما ءتورايىمى، جۋرناليست ءلاززات تانىسبايعا بەرگەن سۇحباتى نەگىزىندە ازىرلەندى.

دەرەكتى تۋىندى «Qazaqstan» تەلەرناسىنان كەشە 20:00 دە ەفيرگە شىقتى. بۇعان دەيىن ن. نازاربايەۆ «ەل استاناسىنىڭ تۇركىستانعا كوشۋى مۇمكىن بە؟» دەگەن سۇراققا جاۋاپ بەرگەن ەدى.