بانك قانداي جاعدايدا ءسىزدىڭ كارتاڭىزدى بۇعاتتاي الادى؟

بۇل جايىندا Fingramota.kz ءتۇسىندىرىپ بەرەدى. جەكە تۇلعانىڭ تولەم كارتوچكاسىن نەمەسە بانك شوتىن بۇعاتتاۋ تولەم كارتوچكاسىن بۇعاتتاۋ دەگەنىمىز - تولەم كارتوچكاسىن قولدانۋمەن، ونىڭ ىشىندە تاۋارلار ءۇشىن اقى تولەۋ مەن اقشانى شەشىپ الۋ وپەراتسيالارىنا تولىق نەمەسە ءىشىنارا تىيىم سالۋ.

قازاقستان زاڭناماسىنىڭ شەڭبەرىندە «بۇعاتتاۋ» ۇعىمى تولەم كارتوچكالارىنا قاتىستى عانا قولدانىلادى.

ۇلتتىق بانك باسقارماسىنىڭ 2016-جىلعى 31- تامىزداعى 205№ قاۋلىسىمەن بەكىتىلگەن تولەم كارتوچكالارىن شىعارۋ قاعيداسىنا، سونداي-اق قازاقستان اۋماعىندا ولاردى پايدالانا وتىرىپ جۇرگىزىلگەن وپەراتسيالارعا قىزمەت كورسەتۋ بويىنشا قىزمەتكە قويىلاتىن تالاپتاردى بەكىتۋ تۋرالى قاعيدالاردىڭ 80-تارماعىنا سايكەس ەميتەنت تولەم كارتوچكاسىن مىناداي جاعدايدا بۇعاتتاي الادى:

1) تولەم كارتوچكاسىن ۇستاۋشىدان كارتوچكانىڭ جوعالعانى، ۇرلانعانى نەمەسە رۇقساتسىز پايدالانىلعانى تۋرالى حابارلاما العاندا؛

2) تولەم كارتوچكاسىن ۇستاۋشى كارتوچكانى بەرۋ تۋرالى شارتتى ورىنداماعاندا؛

3) تولەم كارتوچكاسىن پايدالانۋدىڭ ەميتەنت پەن تولەم كارتوچكاسىن ۇستاۋشى اراسىنداعى شارتتا كوزدەلگەن ىشكى قۇجاتتارىن ساقتاماعان جاعدايدا.

بۇل رەتتە تولەم كارتوچكاسىن بۇعاتتاۋ تالاپتارى ونى شىعارۋ تۋرالى شارتتا كەلىسىلەدى. زاڭنامادا «كارتوچكالىق شوت» دەگەن بولەك ۇعىم جوق جانە تولەم كارتوچكاسى - ونى ۇستاۋشىنىڭ ادەتتەگى بانكتىك شوتىنا قولجەتىمدىلىك قۇرالى. بۇل رەتتە بانك شوتى كليەنتكە ول بانككە ءوتىنىش جاساعان كەزدە اشىلادى.

سونداي-اق، «تولەمدەر جانە تولەم جۇيەلەرى تۋرالى» ق ر زاڭىنىڭ 27-بابىنا سايكەس كليەنتتىڭ بانكتىك شوتىنا شىعىس وپەراتسيالارىن توقتاتا تۇرۋ، مۇلكىن يەلەنۋدى ۋاقىتشا شەكتەۋ تۇرىندە شەكتەۋلەر سالىنۋى، سونداي-اق بانكتىك شوتىنداعى اقشاعا تىيىم سالىنۋى مۇمكىن.

شىعىس وپەراتسيالارىن جۇرگىزۋگە شەكتەۋ ۋاكىلەتتى مەملەكەتتىك ورگانداردىڭ نەمەسە لاۋازىمدى تۇلعالاردىڭ ءتيىستى شەشىمدەرىنىڭ (سالىق تولەمەگەن، تەرگەۋ جۇمىستارى جۇرگىزىلگەن كەزدە، الاياقتىق وپەراتسيالارعا كۇدىك بولعان كەزدە) نە قارجى مينيسترلىگىنىڭ قارجىلىق مونيتورينگ كوميتەتىنىڭ تەرروريزم مەن ەكسترەميزمدى قارجىلاندىرۋعا بايلانىستى ۇيىمدار مەن تۇلعالاردىڭ تىزبەسىنە ەنگىزىلگەن ۇيىمدار مەن جەكە تۇلعالار تۋرالى اقپاراتىنىڭ نەگىزىندە سالىنادى.

تىيىم سالۋدى سوت اكتىلەرىنىڭ جانە سوت ورىنداۋشىلارى سوت ورىنداۋشىلارىنىڭ پروكۋرور سانكتسيالاعان قاۋلىلارىنىڭ نەگىزىندە، قازاقستان رەسپۋبليكاسىنىڭ قىلمىستىق ءىس جۇرگىزۋ زاڭناماسىندا جانە اتقارۋشىلىق ءىس جۇرگىزۋ تۋرالى زاڭدا كوزدەلگەن تارتىپپەن سالادى.

ال ەگەر ەڭبەكاقى الاتىن كارتا بولسا؟

ەڭبەكاقى الاتىن تولەم كارتوچكاسى ەشقانداي جەڭىلدىك بەرمەيدى. ونىڭ كادىمگى تولەم كارتوچكاسىنان ەش ايىرماشىلىعى جوق. سوندىقتان ەڭبەكاقى الاتىن تولەم كارتوچكاسىن بۇعاتتاۋ ونداي كارتانى شىعارۋ تۋرالى شارتتا بەلگىلەنگەن بۇعاتتاۋ تالاپتارىنا سايكەس بارلىق كارتالارعا ارنالعان ورتاق نەگىزدەردە جۇزەگە اسىرىلۋى مۇمكىن.

بانك شوتى بويىنشا شىعىس وپەراتسيالارىن توقتاتا تۇرۋ نەمەسە شوتتاعى اقشاعا تىيىم سالۋ زاڭنامادا بەلگىلەنگەن نورمالارعا سايكەس جۇزەگە اسىرىلادى. ياعني، ۋاكىلەتتى مەملەكەتتىك ورگانداردىڭ نەمەسە لاۋازىمدى تۇلعالاردىڭ كليەنتتىڭ بانكتىك شوتى بويىنشا شىعىس وپەراتسيالارىن توقتاتا تۇرۋ تۋرالى ءتيىستى وكىمدەرى نەمەسە تىيىم سالۋ اكتىلەرى بولعان جاعدايدا، كارتوچكا بۇعاتتالادى.

بانك سانكسيا تۋرالى حابارلاۋعا مىندەتتى مە؟

تولەم كارتوچكاسىن شىعارۋ تۋرالى شارتتا بانكتىڭ كليەنتكە ءتيىستى حابارلامالاردى جىبەرۋ ءتارتىبى، تاسىلدەرى، جاعدايلارى تولىق جازىلۋعا ءتيىس. بانك پەن كليەنتتىڭ مۇنداي قارىم-قاتىناسى شارتتىق قاتىناستارمەن رەتتەلەدى. شارتتى مۇقيات وقىڭىز!

بانك قانداي دا ءبىر ترانزاكتسيانى بۇعاتتاۋعا قۇقىلى ما؟

ءيا، مۇمكىن. مىسالى، تولەم كارتوچكاسى بويىنشا كۇماندى، كۇدىكتى وپەراتسيالاردان ءوتۋ كەزىندە. كارتوچكامەن سانكتسيالانباعان (الاياقتىق) وپەراتسيالاردىڭ الدىن الۋ ءۇشىن بانكتەر ولاردىڭ جەكەلەگەن تۇرلەرىنە جۇيەلىك شەكتەۋلەر بەلگىلەۋى مۇمكىن.

ولاردى بەلگىلەۋ تالاپتارى، سونداي-اق الۋ ءتارتىبى دە تولەم كارتوچكاسىن شىعارۋ تۋرالى شارتتا جازىلعان.

«قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل تۋرالى» زاڭنىڭ نورمالارىندا بانكتەر وسىنداي فاكتىلەردىڭ الدىن الۋ جانە جولىن كەسۋ ماقساتىندا وپەراتسيانى كۇدىكتى دەپ تانىعان كەزدە ونى وتكىزگەنگە دەيىن دەرەۋ ق ر قارجى ق م ك- عا حابارلاۋعا مىندەتتى ەكەندىگى بەلگىلەنگەن.

بۇل رەتتە ەگەر بانكتىڭ كليەنتى - ۇيىم نەمەسە جەكە تۇلعا تەرروريزمدى جانە ەكسترەميزمدى قارجىلاندىرۋمەن بايلانىستى ۇيىمدار مەن تۇلعالاردىڭ تىزبەسىنە كىرەتىن بولسا، بانكتەر ولاردىڭ بانكتىك شوتتارى بويىنشا شىعىس وپەراتسيالارىن دەرەۋ توقتاتا تۇرۋعا مىندەتتى.

ەگەر كارتا نەمەسە شوت بۇعاتتالسا نە ىستەۋ قاجەت؟

ەگەر وسىنداي جاعداي ورىن السا، بانكتىڭ قولداۋ قىزمەتىنە جۇگىنۋ قاجەت. كليەنتتىڭ بانكتىك شوتىنداعى اقشانى جۇمساۋ ۋاكىلەتتى مەملەكەتتىك ورگانداردىڭ نەمەسە لاۋازىمدى تۇلعالاردىڭ ءتيىستى اكتىلەرى/شەشىمدەرى/وكىمدەرى نەگىزىندە شەكتەلگەن جاعدايدا، تۇسىنىك الۋ ءۇشىن ءتيىستى ۋاكىلەتتى مەملەكەتتىك ورگانعا نەمەسە لاۋازىمدى تۇلعاعا جۇگىنگەن دۇرىس.

تولەم كارتوچكاسى بۇعاتتالعان جاعدايدا، سوعان بايلانىستىرىلعان بانكتىك شوت بويىنشا وپەراتسيا ەميتەنت بانكتىڭ بولىمشەسىندە كاسسا ارقىلى جۇرگىزىلە الادى. بۇل رەتتە جەكە باسىن كۋالاندىراتىن قۇجاتتى كورسەتۋ قاجەت.

كارتوچكانى ءوز بەتىڭشە بۇعاتتان شىعارۋعا بولا ما؟

ەگەر تولەم كارتوچكاسىن كليەنتتىڭ ءوزى بۇعاتتاعان جاعدايدا عانا ونى بانكتىڭ ينتەرنەت- رەسۋرسىندا جەكە كابينەتتە بۇعاتتان شىعارۋعا بولادى. تولەم كارتوچكاسى بۇعاتتالعان نە بانك شوتى بويىنشا شىعىس وپەراتسيالارى توقتاتىلعان كەز كەلگەن جاعدايدا كارتا يەلەرى بانككە سۇراتۋ جىبەرە الادى جانە بانك تۇسىنىكتەمە بەرۋى ءتيىس.

ەگەر بانك ارەكەتىنىڭ زاڭدى ەكەندىگىنە كۇماندانساڭىز، ءوز قۇقىقتارىڭىزدى قورعاۋ ءۇشىن سوت ورگاندارىنا دا، سول سياقتى قارجى رەتتەۋشىسىنە دە جۇگىنە الاسىز.