الماتىدا ءۇي ماڭىنداعى دۇكەندەر الەۋمەتتىك ماڭىزدى تاۋارلاردىڭ باعاسىن كوتەرىپ جىبەردى

الماتى. قازاقپارات - الماتىدا ءۇيدىڭ جانىنداعى شاعىن دۇكەندەر الەۋمەتتىك ماڭىزى بار ازىق- تۇلىك تاۋارلارىنىڭ باعاسىن كوتەرىپ جىبەردى.

بۇل تۋرالى ونلاين بريفينگ بارىسىندا «الماتى» الەۋمەتتىك- كاسىپكەرلىك كورپوراتسياسى» باسقارما ءتوراعاسى اسقار بىلىسبەكوۆ ايتتى، دەپ حابارلايدى قازاقپارات ءتىلشىسى.

اسقار بىلىسبەكوۆتىڭ ايتۋىنشا، الماتىدا الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ جانە ۇستاۋ باعدارلاماسىنىڭ ارقاسىندا وزگە وڭىرلەرمەن سالىستىرعاندا ازىق-تۇلىك باعاسى ەداۋىر تومەن.

«بۇگىندە الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرىپ، ۇستاپ تۇرۋ ءۇشىن بىزدە اينالىمدا 8 ميلليارد استام تەڭگە بار. ءبىز ءىرى ساۋدا جەلىلەرىمەن، وندىرۋشىلەرمەن، شارۋا قوجالىقتارىمەن، فەرمەرلەرمەن، جەتكىزۋشىلەرمەن جانە ديستريبيۋتورلارمەن جۇمىس ىستەيمىز. ارينە، ونىڭ ءبارى ءبىزدىڭ تالاپقا ساي كەلە بەرمەيدى. ويتكەنى، بۇل بيۋدجەت قاراجاتى ەكەنىن ۇمىتپاۋىمىز كەرەك. بۇل اقشا جەڭىلدەتىلگەن نەسيە تۇرىندە بەرىلەدى. ساۋدا جەلىلەرى ديستريبيۋتورلارى مەن تاۋار وندىرۋشىلەرگە ءبولىپ بەرەمىز. بۇل قارجى كەيىن قالا بيۋدجەتىنە قايتارىلادى» دەدى اسقار بىلىسبەكوۆ.

سونىمەن قاتار، ول الەۋمەتتىك ماڭىزى بار تاۋارلاردىڭ باعاسىن كىمدەر كوتەرەتىنىن ايتتى.

«ازىق- تۇلىك باعاسىن كوتەرەتىندەرگە كەلسەك، ولار - نەگىزىنەن ءۇيدىڭ جانىنداعى شاعىن دۇكەندەر. ءبىز شاعىن جانە ورتا بيزنەس وكىلدەرىمەن كەزدەسىپ ولارعا ءبارىن تۇسىندىرەمىز. الداعى ۋاقىتتا ولاردى دا الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ باعدارلاماسىنا قاتىستىرامىز»، - دەدى ول.

ونىڭ ايتۋىنشا، باعانى زاڭسىز كوتەرگەن كاسىپكەرلەرگە مونيتورينگتى قالانىڭ كاسىپكەرلىك جانە ينۆەستيتسيالار باسقارماسى جۇرگىزەدى.