دزيۋدودان ۇلتتىق قۇرامانىڭ باس جاتتىقتىرۋشىسى اۋىستى
نۇر-سۇلتان قالاسىندا قازاقستان دزيۋدو فەدەراتسياسىنىڭ كەزەكتەن تىس وتىرىسى ءوتتى. ۇلتتىق فەدەراتسيا باسشىسى قايرات قوجامجاروۆتىڭ جەتەكشىلىگىمەن وتكەن جيىنعا قازاقستان دزيۋدو فەدەراتسياسىنىڭ ۆيتسە-پرەزيدەنى، ق ر مادەنيەت جانە سپورت ۆيتسە-مينيسترى ساكەن مۇسايبەكوۆ، باس حاتشىسى اسحات جيتكەيەۆ، دزيۋدودان قازاقستان رەسپۋبليكاسىنىڭ مەملەكەتتىك جاتتىقتىرۋشىسى جاندوس قونىسبايەۆ پەن اتقارۋشى ديرەكتورى سامات جىلقىبايەۆ قاتىستى. سونداي-اق، فەدەراتسيانىڭ ۆيتسە-پرەزيدەنتتەرى بوستان جاڭبىربايەۆ پەن ەلدوس رامازانوۆ جيىنعا ۆيدەوكونفەرەنتسيا رەجيمىندە قوسىلدى.
جيىن بارىسىندا قازاقستان ۇلتتىق ەرلەر كومانداسىنا جاڭا باس باپكەر تاعايىندالدى. اتقارۋشى كوميتەتتىڭ ءبىراۋىزدان شەشىمىمەن قازاقستان ۇلتتىق ەرلەر كومانداسىنىڭ باس باپكەرى بولىپ دزيۋدودان قازاقستان رەسپۋبليكاسىنا ەڭبەگى سىڭگەن جاتتىقتىرۋشى، بىلىكتىلىگى جوعارى دەڭگەيدەگى جوعارى ساناتتى جاتتىقتىرۋشى، «قۇرمەت» وردەنىنىڭ يەگەرى عالىمجان جىلگەلديەۆ سايلاندى.
جاڭا قىزمەتكە وليمپيادا ويىندارىنىڭ كۇمىس جۇلدەگەرى ەلدوس سمەتوۆتىڭ جەكە جاتتىقتىرۋشىسى عالىمجان جىلگەلديەۆ تاعايىندالدى. ءوز كەزەگىندە ەلدوس سمەتوۆ جەكە باپكەرىن جاۋاپتى قىزمەتىمەن قۇتتىقتاپ، ەڭبەگىنىڭ ەلەنگەنىنە ءدان ريزا ەكەنىن جەتكىزدى.
«عالىمجان اعايدىڭ باس باپكەر بولىپ تاعايىندالعانىنا وتە قۋانىشتىمىن. وسىنداي بىلىكتى مامان ءوزىنىڭ بويىنداعى تاجىريبەسىن تەك قانا ءبىر نەمەسە ساناۋلى ەكى-ءۇش اداممەن عانا بولىسپەي، ىشىندە قالىپ كەتپەي، بۇكىل ەلىمىزدىڭ دزيۋدوسىنىڭ دەڭگەيىن جوعارىلاتۋ ءۇشىن بۇل كىسىنىڭ تاجىريبەسىن بارشامەن ءبولىسىپ، ۇيرەتكەنى ابدەن كەرەك دەپ ويلايمىن. عالىمجان اعاي ۇلتتىق قۇراماعا كەشە عانا كەلگەن جوق. سانالى عۇمىرىن سپورتقا ارناپ، تالماي شاكىرت باپتاپ كەلەدى.
عالىمجان جىلگەلديەۆ قازاقستاننىڭ دزيۋدو تاريحىن ءتورت رەت جاڭارتقان ادام. ءبىر ەمەس، ەكى الەم چەمپيونىن باپتاپ شىعاردى. اتاپ ايتقاندا، جاستار مەن ەرەسەكتەر اراسىنداعى الەم بىرىنشىلىگىندە شاكىرتى توپ جاردى، وليمپيادا ويىندارىنىڭ كۇمىس جۇلدەگەرىن باپتادى، سونداي-اق، ەلىمىزگە تۇڭعىش رەت بۇكىل الەمدىك ۋنيۆەرسيادا ويىندارىنىڭ التىنىن اكەلدى.
ءتول شاكىرتتەرى وسى كۇنگە دەيىن قانداي جەتىستىككە جەتسە، ۇلتتىق قۇراما سپورتشىلارىن دا ءدال سونداي بيىك بەلەستەرگە جەتەلەيدى دەپ ويلايمىن. سەبەبى، بۇگىنگى بىلىكتى مامان بىرنەشە الەم چەمپيونى مەن وليمپيادا ويىندارىنىڭ جەڭىمپاز، جۇلدەگەرلەرىن باپتاۋعا ابدەن قاۋقارلى. سوندىقتان، باس باپكەر قىزمەتىنە كىرىسكەن عالىمجان جامبىلبەك ۇلىنا سەنىم ارتىپ، ساتتىلىك تىلەيمىن، - دەپ كەلتىرەدى دزيۋدودان ۇلتتىق قۇراما كوشباسشىسى ەلدوس سمەتوۆتىڭ ءسوزىن ۇ و ك سايتى.
ايتا كەتەرلىگى، قۇرامانىڭ بۇرىڭعى باپكەرى ايدىن سماعۇلوۆ دەنساۋلىعىنا بايلانىستى قىزمەتىن توقتاتۋ تۋرالى ءوتىنىش ءبىلدىردى. ول قازاقستان ەرلەر ۇلتتىق قۇراماسىنىڭ باس باپكەرى قىزمەتىنە 2018-جىلى كىرىسكەن بولاتىن.
ءوز كەزەگىندە، قازاقستان دزيۋدو فەدەراتسياسىنىڭ پرەزيدەنتى قايرات قوجامجاروۆ ايدىن سماعۇلوۆقا وسى ۋاقىتقا دەيىن اتقارعان جۇمىسىنا العىس ايتىپ، جاڭادان تاعايىندالعان باس باپكەرگە ساتتىلىك تىلەدى.
massaget.kz
