جامبىلدا ۇكىمەتتىك ەمەس ۇيىمداردىڭ فورۋمى ءوتتى
ونلاين رەجيمدە وتكەن فورۋم الاڭىندا ۇكىمەتتىك ەمەس ۇيىمدار مەن مەملەكەتتىك سەكتور وكىلدەرى ءوز جۇمىسىنىڭ ناتيجەسىن تالقىلاپ، الداعى كەزەڭگە ارنالعان جوسپاردى ايقىندادى.
جامبىل وبلىسىنىڭ اكىمى بەردىبەك ساپاربايەۆ فورۋم قاتىسۋشىلارىن ارنايى قۇتتىقتادى.
ول 30 جىل ىشىندە سەرىكتەستىك، مەملەكەت پەن ازاماتتىق سەكتور اراسىنداعى ىنتىماقتاستىق جۇيەلى سيپاتقا يە بولعانىن اتاپ ءوتتى.
بۇگىنگى كۇنى وبلىستا التى ساياسي پارتيا، 894 ۇكىمەتتىك ەمەس ۇيىم، 356 ءدىني بىرلەستىك، 12 قوعامدىق كەڭەس، 15 كاسىپوداق ۇيىمى تىركەلگەن.
«مەملەكەتتىك ساياساتتىڭ ماڭىزدى باعىتتارىنىڭ ءبىرى - ازاماتتىق قوعام ينستيتۋتتارىن دامىتۋ ءۇشىن قولايلى جاعدايلار جاساۋ. ءبىز سىزدەردىڭ حالىق اراسىندا قالاي جۇمىس جاساپ جاتقاندارىڭىزدى كورىپ، ءبىلىپ وتىرمىز. 30 جىل ىشىندە قازاقستاننىڭ ۇكىمەتتىك ەمەس ۇيىمدارى وزدەرىنىڭ ماڭىزدى رولدەرىن كورسەتىپ، ەلىمىزدىڭ ناعىز پاتريوتتارى ەكەنىن دالەلدەدى. ءبىز مۇنى جاقسى تۇسىنەمىز، الداعى ۋاقىتتا دا ءوڭىر تۇرعىندارىنىڭ يگىلىگى ءۇشىن بىرلەسىپ جۇمىس ىستەيتىن بولامىز»، - دەدى ءوڭىر باسشىسى.
ول ازاماتتىق قوعامدى دامىتۋدىڭ 2025-جىلعا دەيىنگى تۇجىرىمداماسى مەملەكەتتىك ورگانداردىڭ ۇكىمەتتىك ەمەس ۇيىمدارمەن ءوزارا ءىس-قيمىل تەتىكتەرىن جەتىلدىرۋگە كومەكتەسەتىنىنە سەنىم ءبىلدىردى.
ق ر اقپارات جانە قوعامدىق دامۋ ۆيتسە-ءمينيسترى بولات تىلەپوۆ مەملەكەت الەۋمەتتىك باستامالاردى ءاردايىم قولدايتىنىن باسا ايتتى.
«جامبىل وبلىسىندا ازاماتتىق سەكتور قوعامدىق باقىلاۋ قۇرالدارىن تابىستى پايدالانۋدا، ۆولونتەرلىك بەلسەندى دامىپ جاتىر. ءبىلىم ساپاسىن جاقسارتۋعا، ازاماتتاردىڭ دەنساۋلىعىن ساقتاۋعا، تۇرعىنداردىڭ قۇقىقتارى مەن زاڭدى مۇددەلەرىن قورعاۋعا ەرەكشە كوڭىل بولىنگەن»، - دەدى ول.
قازاقستان ازاماتتىق اليانسىنىڭ پرەزيدەنتى بانۋ نۇرعازيەۆا ارىپتەسىن قولداپ، جامبىل وبلىسىنداعى جەرگىلىكتى اتقارۋشى ورگاندار مەن ۇكىمەتتىك ەمەس سەكتور تۇراقتى بايلانىسىن اتاپ ءوتتى. فورۋم شارالارى پانەلدىك سەكتسيالارعا ۇلاستى. بۇل كۇنى «جومارت جۇرەك» سىيلىعىنىڭ لاۋرەاتتارى مەن «ASAR» سىيلىعىنىڭ جەڭىمپازدارى ماراپاتتالدى.
ازاماتتىق سەكتوردىڭ ەڭ بەلسەندى وكىلدەرىنە «حالىق العىسى» مەدالى جانە وبلىس اكىمىنىڭ العىس حاتى تابىستالدى.
