تۇران دالاسى: تۇركىستاننىڭ برەندىن ناسيحاتتاۋعا ارنالعان بايقاۋ ءوتىپ جاتىر
ءوز ءوڭىرىنىڭ دامۋىنا بەيجاي قارامايتىن جانداردىڭ تۋىندىسى كرەاتيۆتى يدەياسى مەن سەناري مازمۇنىنا قاراي باعالانادى. شىعارماشىلىق بايقاۋ ەلباسىنىڭ «رۋحاني جاڭعىرۋ» باعدارلاماسى اياسىنداعى «تۋعان جەر» جوباسىنىڭ ىسكە اسىرىلۋىنا باعىتتالعان. نەگىزگى ماقسات - تۇركىستان وبلىسىنداعى اۋدان- قالالاردىڭ تاريحىن زەرتتەۋ، تاريحي- مادەني جانە كيەلى ورىنداردى دارىپتەۋ. ەڭ باستىسى - ءار ەلدىمەكەننىڭ برەندىن قالىپتاستىرۋعا ۇلەس قوسىپ، ونى ناسيحاتتاۋ.
بەينەفيلمدەر سايىسىنا وبلىس كولەمىندەگى اۋدان- قالالاردان 15 قاتىسۋشى ءوتىنىم بەرىپ، 17 تۋىندى ۇسىنىلعان. بەينەفيلمدەر قازىرگى تاڭدا وبلىستىق مادەنيەت باسقارماسىنىڭ الەۋمەتتىك جەلىلەردەگى رەسمي پاراقشالارىندا جاريالانىپ جاتىر. بايقاۋعا ەلىمىزگە بەلگىلى كينورەجيسسەر، سەناريست جانە اكتەر اقان ساتايەۆ، رەجيسسەر، پروديۋسەرلەر ولجاس ەرمەكبايەۆ پەن مەيىرجان الياكباروۆ قازىلىق ەتەدى. جەڭىمپازدار ۇمىتكەرلەردىڭ جۇمىسى تولىق جاريالانىپ بولعان سوڭ انىقتالادى. بەينەفيلمدەردىڭ قارالىم سانى مەن كورەرمەندەر تاراپىنان بەرىلگەن باعاسى، سىن- پىكىرلەرى دە ەسكەرىلەدى. باس جۇلدە يەگەرىنە - 700 مىڭ تەڭگە، I ورىنعا - 500 مىڭ تەڭگە، II ورىنعا - 300 مىڭ تەڭگە (ەكى ادام)، III ورىنعا - 200 مىڭ تەڭگە (ءۇش ادام). 5 قاتىسۋشىعا 100 مىڭ تەڭگەدەن ىنتالاندىرۋ سىيلىعى مەن ديپلوم تابىستالادى.
