كوروناۆيرۋس جەلتوقساننىڭ سوڭى، قاڭتاردىڭ باسىندا ءورشۋى مۇمكىن – ق ر پروفەسسورى

مۇنداي بولجامدى قازاقستاننىڭ رەپرودۋكتيۆتى مەديتسينا قاۋىمداستىعىنىڭ پرەزيدەنتى، پروفەسسور ۆياچەسلاۆ لوكشين جاسادى، دەپ حابارلايدى قازاقپارات ءتىلشىسى.

«ەڭ الدىمەن، بۇكىل الەمدە جانە ەۋروپادا كوروناۆيرۋسقا قاتىستى قانداي جايتتىڭ ورىن الىپ جاتقانىن كورىپ وتىرسىزدار. ونىڭ قازاقستاندا دا ورىن الۋ ىقتيمالدىعى بار. دەگەنمەن، ول بىزدە ءبىرشاما جەڭىل ءوتۋى مۇمكىن، سەبەبى ماۋسىم مەن شىلدە ايىندا بىزدە كوپ ادام اۋىرىپ شىقتى»، - دەدى قاۋىمداستىق پرەزيدەنتى اگەنتتىك تىلشىسىنە بەرگەن سۇحباتىندا.

سونىمەن قاتار پروفەسسور ەلىمىزدەگى كوروناۆيرۋس ينفەكسياسىنا شالدىعۋعا قاتىستى شىنايى جاعداي مەن رەسمي ستاتيستيكا اراسىنداعى مالىمەتتەر قاراما-قايشىلىعىنا قاتىستى پىكىر ءبىلدىردى. «شىندىعىنا كەلگەندە، ءبىزدىڭ رەسمي ستاتيستيكامىز شىنايى جاعدايدان 20-30 ەسەگە از كورسەتىپ وتىر. سەبەبى ادامداردىڭ كوپشىلىگى مەديتسينالىق كومەككە جۇگىنگەن جوق. قازىر دە كوپ ادام اۋىرىپ جۇرگەنىمەن، پ ت ر- تەستىلەۋدەن وتپەيدى. مۇنى دا ءبىلىپ وتىرمىز. پ ت ر- دىڭ وڭ ناتيجەسى بارلىق ۋاقىتتا كوروناۆيرۋس بولا بەرمەيدى. سونىمەن قاتار تەرىس ناتيجە دە ۆيرۋستىڭ جوق ەكەندىگىنە دالەل بولا المايدى. سول سەبەپتى مەنىڭشە، جەلتوقسان ايىنىڭ سوڭى مەن قاڭتار ايىنىڭ باسىندا اۋرۋعا شالدىعۋ ءوسىمى قازىرگىدەن الدەقايدا جوعارى بولادى»، - دەدى ۆياچەسلاۆ لوكشين.

قازاقستاننىڭ رەپرودۋكتيۆتى مەديتسينا قاۋىمداستىعى پرەزيدەنتىنىڭ بولجامىنشا، كوروناۆيرۋسقا شالدىعۋ كورسەتكىشى، اسىرەسە ەلىمىز وڭىرلەرىندە ۋشىعا ءتۇسۋى مۇمكىن.

«قازىرگى ۋاقىتتا ەلىمىزدىڭ شىعىسى مەن سولتۇستىگىندە كوروناۆيرۋستىڭ ءورشىپ تۇرعانى بەلگىلى. مۇنداي جايت وڭتۇستىككە دە كەلىپ جەتەدى. سوندىقتان وعان دايىن بولۋىمىز قاجەت»، - دەدى پروفەسسور.

وسى ورايدا ول سانيتارلىق شەكتەۋ شارالارىن ساقتاۋ ماڭىزدىلىعىنا توقتالدى.

«كوروناۆيرۋستان ساقتانىپ، دەنساۋلىعىمىزعا قاۋىپ ءتوندىرۋدىڭ جالعىز جولى - الەۋمەتتىك اراقاشىقتىق ساقتاۋ، بارلىق جەردە ماسكا تاعۋ جانە قولدى ۇنەمى جۋۋ. تۋعان كۇن، ۇيلەنۋ تويىن وتكىزۋدى، جەرلەۋ راسىمىنە قاتىسۋدى دوعارۋ كەرەك. جۇمىستان باسقاسىنىڭ ءبارى توقتاعانى ءجون. مەيرامحانالارعا جۇمىس ىستەۋ كەرەكتىگى تۇسىنىكتى. ءبىراق، ولار ساقتىق شارالارىن قازىرگىدەن دە قاتتى ساقتاۋ ءتيىس. ەگەر دارىگەرلەردىڭ ۇسىنىمدارىن ورىندامايتىن بولساق، وندا ازاماتتارىمىزدان ايىرىلا بەرەمىز»، - دەدى ۆياچەسلاۆ لوكشين.

ايتا كەتەرلىگى، وتكەن تاۋلىكتە عانا قازاقستاندا 762 ادامدا كوروناۆيرۋس ىندەتى پتر ارقىلى راستالدى. قازىرگى ۋاقىتتا ەلىمىزدە كوروناۆيرۋستان 9961 ادام ەمدەلۋدە. ولاردىڭ اراسىندا 464 بالا بار. جالپى ناۋقاستاردىڭ اراسىندا 228 ادامنىڭ دەنساۋلىق جاعدايى ناشار. سونىڭ ىشىندە 22 ناۋقاستىڭ جاعدايى قاتتى اۋىر دەپ باعالانىپ وتىر. 23 ناۋقاس جاساندى تىنىس الۋ اپپاراتىندا جاتىر.

اۆتور: مارلان جيەمباي