قازاقستاندا ەر بالالار سانى ارتادى - دەموگرافيالىق بولجام

ەڭبەك رەسۋرستارىن دامىتۋ ورتالىعىنىڭ دەموگرافيالىق بولجامىنا سايكەس، 2030 -جىلعا قاراي قازاقستاندا حالىق سانى % 11,8 وسەدى (2019 -جىلمەن سالىستىرعاندا) جانە شامامەن 20 ميلليون 692 مىڭ ادامدى قۇرايدى.

«بۇل رەتتە، شامامەن 12,7 ميلليون ادام (%61,2) قالالىق جەردىڭ تۇرعىندارى بولادى. ال اۋىل تۇرعىندارىنىڭ سانى 8 ميلليوننان اسادى (%38,8). سونداي- اق، دەموگرافيالىق كورسەتكىشتەر سەرپىنىنىڭ اعىمداعى دەڭگەيىن ساقتاي وتىرىپ، 2050 -جىلعا قاراي حالىقتىڭ بولجامدى سانى شامامەن 25,4 ميلليون ادامدى قۇرايدى. بۇل، 2030 -جىلعى دەڭگەيدەن % 22,7 جانە 2019 -جىلعى كورسەتكىشتەن % 34,3 ارتىق. ونىڭ ىشىندە 16,7 ميلليون ادام (%65,7) قالالاردا، ال 8,7 ميلليون ادام (%34,3) اۋىلدىق جەرلەردە تۇراتىن بولادى»، - دەلىنگەن ەڭبەك رەسۋرستارىن دامىتۋ ورتالىعىنىڭ اقپاراتىندا.

«2030 -جىلعا قاراي حالىقتىڭ % 27,4، ال 2050 -جىلعا قاراي % 36 استامى رەسپۋبليكالىق ماڭىزى بار نۇر- سۇلتان، الماتى جانە شىمكەنت قالالارىندا تۇراتىن بولادى. ءبىزدىڭ بولجامىمىز بويىنشا، وڭىرلەرگە كەلەتىن بولساق، 10 جىلدان كەيىن الماتى جانە تۇركىستان وبلىستارىندا 2 ميلليون ادامنان تۇرادى. ال قاراعاندى، شىعىس قازاقستان جانە جامبىل وبلىستارىندا 1 ميلليوننان استام تۇرعىن بولادى. 2050 -جىلعا قاراي اقتوبە، اتىراۋ، ماڭعىستاۋ جانە قىزىلوردا وبلىستارى دا ميلليون تۇرعىنى بار وڭىرلەرگە اينالادى»، - دەپ ءبولىستى ەردو بولجامداۋ دەپارتامەنتىنىڭ ديرەكتورى دميتريي شۋمەكوۆ.

سونداي- اق، حالىقتىڭ ورتاشا جاسى دا ارتاتىنى اتاپ وتىلگەن. «ءولىم- ءجىتىمدى، تۋۋدى جانە كوشى- قوندى وتكەن جىلدار دەڭگەيىندە ساقتاي وتىرىپ، 2030 -جىلعا قاراي 14-29 جاس ارالىعىنداعى جاستار سانى وتكەن جىلمەن سالىستىرعاندا % 26 وسەدى جانە 4,4 ميلليون ادامدى قۇرايدى دەپ بولجاپ وتىرمىز. ال 2050 -جىلعا قاراي بۇل كورسەتكىش شامامەن 5,1 ميلليوندى قۇرايدى»، - دەپ اتاپ ءوتتى ساراپشى.

بولجامدارعا سايكەس، تۇركىستان وبلىسى 2030 -جىلى جاس تۇرعىندار بويىنشا كوشباسشى بولادى: اتالعان ۋاقىتقا قاراي وسى وڭىردەگى جاستاردىڭ سانى 516 مىڭ ادامدى قۇرايدى دا، ۇلەسى % 24,3 دەيىن وسەدى. الماتى وبلىسى ۇلدار مەن قىزداردىڭ 488 مىڭ كورسەتكىشىمەن - ەكىنشى ورىندى، ال الماتى قالاسى جاستاردىڭ 479 مىڭ كورسەتكىشىمەن ءۇشىنشى ورىندا بولادى. سونىمەن بىرگە، ساراپشىلار 21 - عاسىردىڭ ورتاسىنا قاراي قازاقستان جاستارىنىڭ ۇشتەن ەكىسى قالالاردا تۇرادى جانە ۇلدار سانى قىزدار سانىنان ءسال اسادى دەپ سانايدى.