ەۋروپانىڭ ءبىرقاتار ەلىندە قۇس تۇماۋى ءورشىي باستادى
كوپەنگاگەن. قازاقپارات - نيدەرلاندى ەلىندە قۇستىڭ جۇزدەگەن مىڭ باسى جويىلعاننان كەيىن دانيا مەن فرانسيادا قۇس تۇماۋىنىڭ وقيعالارى تىركەلگەن، دەپ حابارلايدى قازاقپارات Merco Press-كە سىلتەمە جاساپ.
فرانسيانىڭ كورسيكا ارالىندا ۆيرۋس انىقتالعان سوڭ، وندا جۇزدەگەن تاۋىق ءولتىرىلدى، ال دانيالىقتار ەلدىڭ باتىسىندا ۆيرۋس ورشىگەن سوڭ، ونىڭ تارالۋىن توقتاتۋ ءۇشىن 25 مىڭنان استام قۇستىڭ كوزى جويىلعانىن مالىمدەدى. فرانسيا ۇلتتىق قورعانىس شارالارى تۋرالى بۇيرىق بەردى، سونىڭ ىشىندە ءۇي قۇستارىن جابايى قۇستاردان مىندەتتى تۇردە وقشاۋلاپ ۇستاۋ تالابى بار، ال دانيا تاۋىق جۇمىرتقاسىن ەو سىرتىنا ەسپورتتاۋدى توقتاتتى.
ادام ءۇشىن قاۋىپتى ەمەس، ءبىراق اۋىلشارۋاشىلىق سالاسىن تالقانداۋشى بولاتىن قۇس تۇماۋى وقيعالارى بەلگيا، نيدەرلاندى، يرلانديادا، سونداي- اق باسقا ەلدەردە دە تىركەلگەن. وسى ايدا نيدەرلاندى بيلىگى ۆيرۋس سالدارىنان 200 مىڭنان استام قۇستىڭ جويىلعانىن مالىمدەگەن بولاتىن. فرانسيانىڭ وڭتۇستىك-باتىسىنداعى ۇيرەك باعۋشىلار سوڭعى جىلدارى قۇس تۇماۋىنان ەكى رەت زارداپ شەككەن. ۆيرۋس جۇقتىرعان قۇستاردى جاپپاي جويۋ سالدارىنان ولار جۇزدەگەن ميلليون ەۋرودان ايرىلدى. دانيا شارۋالاردى قۇستارىن تۇماۋدان قورعاپ قالۋعا شاقىردى. ايتا كەتسەك، تاياۋدا دانيادا كەيبىرەۋلەرىنىڭ كوروناۆيرۋس ينفەكسيانا شالدىققانى انىقتالعان سوڭ، ميلليونداعان قاراكۇزەن جويىلعان.
اۆتور: زارينا تۋعانبايەۆا
