شەنەۋنىكتەر اۋىل تۇرعىندارىنىڭ سانى ازايسا، مەكتەپ پەن اۋرۋحانانى جابا سالادى - ءالي بەكتايەۆ
بۇل تۋرالى «اۋىل» حالىقتىق- دەموكراتيالىق پاتريوتتىق پارتياسىنىڭ كەزەكتەن تىس XVIII سەزىندە پارتيا ءتوراعاسى ءالي بەكتايەۆ ايتتى، دەپ حابارلايدى قازاقپارات ءتىلشىسى.
«اۋىل - ۇلتتىق قۇندىلىقتارىمىزدىڭ التىن بەسىگى، بەرەكە مەن بايلىعىمىزدىڭ باستاۋى. اۋىلدا وسكەن ءاربىر ازامات تۋعان توپىراعىن بارىنشا قادىرلەپ-قاستەرلەۋگە مىندەتتى. ءتورت تۇلىگىن تۇلەتىپ، شارۋاسىن ورگە سۇيرەپ وتىرعان اۋىل - ءبۇتىن ءبىر ەلدىڭ اسىراۋشىسى، قايناعان ەڭبەكتىڭ قاينار كوزى. الايدا، وكىنىشكە وراي، بۇگىن اۋىل ادامىنىڭ تۇرمىسى جايلى دەپ ايتا المايمىز. «ارقا جايلى بولسا، ارقار اۋىپ نەسى بار» دەمەكشى، قارقىنى ءوسىپ كەلە جاتقان ۋربانيزاتسيا ۇدەرىسى - سونىڭ ايقىن دالەلى»، - دەدى ول.
ونىڭ اتاپ وتۋىنشە، مەملەكەت تاراپىنان «اۋىل - ەل بەسىگى» اتتى ارنايى جوبا سوڭعى ەكى جىلدىڭ كولەمىندە ىسكە اسىرىلۋدا. الايدا ول باعدارلامانىڭ ءوزىنىڭ اۋىل ينفراقۇرىلىمىن رەتتەۋگە قاۋقارى جەتكىلىكسىز. مەملەكەتتىك ورگاندار اراسىندا ۇيلەسىمدى تىرلىك جوق، بولىنگەن قاراجاتتىڭ تيىمدىلىگى تومەن.
«ءبىز تەحنولوگيا قارىشتاپ دامىعان داۋىردەمىز. دەسە دە، ەلىمىزدە اۋىز سۋ ماسەلەسى ءالى شەشىمىن تاپقان جوق. XXI عاسىردا ءومىر ءسۇرىپ جاتساق تا، ءالى اۋىل ءىشىن ەسەك اربامەن كەزىپ، بوشكەلەپ، قۇتىمەن سۋ تاسىپ ءجۇرمىز. اۋىل بالاسىنىڭ قاقاعان قىس پەن اپتاپ جازداعى تۇسكە دەيىنگى ۋاقىتى سۋ تاسۋمەن وتەدى. جول ساپاسى ءتىپتى سىن كوتەرمەيدى. شالعايداعى ەلدى مەكەندەردى ايتپاعاننىڭ وزىندە استانا مەن وبلىس ورتالىقتارىنىڭ ماڭىنداعى اۋىلدارعا جەتۋ قيىن. اۋىل ىشىندەگى جولداردىڭ جاعدايى ءماز ەمەس»، - دەدى پارتيا ءتوراعاسى.
ءالي بەكتايەۆتىڭ ايتۋىنشا، ۇلتتىق ەكونوميكا مينيسترلىگى اۋىلدىق جەرلەردىڭ قاجەتتىلىگىن ناقتىلاۋ ءۇشىن ارنايى ساراپتاما جۇرگىزگەن. ونىڭ قورىتىندىسى بويىنشا ءار بەسىنشى اۋىلداعى مەكتەپ پەن بالاباقشا، ءار ءۇشىنشى اۋىلداعى مەديتسينا مەكەمەسى كۇردەلى جوندەۋدى قاجەت ەتىپ تۇر.
«شەنەۋنىكتەر اۋىل تۇرعىندارىنىڭ سانى ازايا باستاسا، ءبىلىم وشاقتارى مەن دەنساۋلىق ساقتاۋ مەكەمەلەرىن جابا سالۋدى ادەتكە اينالدىردى. اكىمدەر امبەباپ وقىتۋشى مەن فەلدشەردى شاقىرىپ، تىعىرىقتان شىعۋدىڭ ورنىنا ەلدى مەكەندى «بولاشاعى جوق» دەپ اتاۋعا بەيىم. بالاسىنا ءبىلىم، وزىنە العاشقى مەديتسينالىق كومەك الا الماعان ادام اۋىلدا تۇرا ما؟ وسىنداي قاراپايىم ءومىر اكسيوماسىن تۇسىنە الماعان باسشىلار كوپ. بىلتىر اۋىلدان قالاعا جارتى ميلليونعا جۋىق ادام قونىس اۋدارعان. 2014 -جىلدان باستاپ بالا تۋۋ كورسەتكىشى بويىنشا كوش باسىندا اۋىل ەمەس قالا تۇر. بۇنى قالاي تۇسىنۋگە بولادى؟ وسىنىڭ بارلىعىن ەسكەرە وتىرىپ، «اۋىل» پارتياسى ءوزىنىڭ سايلاۋالدى باعدارلاماسىنا اۋىلدىق ەلدى مەكەندەردىڭ ينفراقۇرىلىمىن دامىتۋ جونىندەگى مەملەكەتتىك جوبا دايىنداۋ قاجەتتىگىن ۇسىنىپ وتىر. اۋىلدا ءومىر ءسۇرۋ دەڭگەيى قالاعا جەتپەسە دە جەتە عابىل بولۋى شارت دەپ ەسەپتەيمىز. ءبىز پارلامەنتكە وتسەك تە، وتپەسەك تە وسى باعىتتى قاتاڭ باقىلاۋعا الىپ، ۇنەمى كوتەرىپ وتىراتىن بولامىز»، - دەدى «اۋىل» پارتياسىنىڭ جەتەكشىسى.
