اقتوبەدە سەمەي يادرولىق سىناق پوليگونىنان زارداپ شەككەندەرگە ەسكەرتكىش قويىلدى

سەمەي يادرولىق سىناق پوليگونىنان زارداپ شەككەندەرگە ارنالعان ەسكەرتكىش قۇرىلىسىنا «پارىز» قوعامدىق قورى قارجى ءبولدى. ەسكەرتكىشتىڭ ديزاينىن سىزىپ، ارحيتەكتۋراسىن ۇيلەستىرگەن - باقتىگەرەي جاپار.

«بيىل سەمەي ارداگەرلەرىنە ەسكەرتكىش قويۋ سۇراعى ءوز شەشىمىن تاپتى. بۇل ارداگەرلەر باس قوساتىن، سالتاناتتى شارالاردى وتكىزەتىن، ومىردەن وزعان ارداگەرلەردى ەسكە الاتىن جەرگە اينالماق. نەگىزى 1949 -جىلدان 1991 -جىلعا دەيىن سەمەي يادرولىق پوليگونىندا 11 مىڭنان استام اقتوبەلىك قىزمەتتىك مىندەتىن اتقاردى»، - دەدى «نيەۆادا- سەمەي» حالىقارالىق يادرولىق قارۋعا قارسى قوزعالىسىنىڭ باتىس قازاقستان ايماعى فيليالىنىڭ ديرەكتورى ءىزىمعالي كوبەنوۆ.

اقتوبە وبلىستىق قورعانىس ىستەرى جونىندەگى دەپارتامەنتىنىڭ مالىمەتتەرى سۇيەنسەك، بۇگىندە وبلىستا سەمەي يادرولىق پوليگونىندا يادرولىق سىناققا قاتىسقان 1800 دەن استام ادام تۇرادى. ونىڭ 268 ءى مۇگەدەك، 40 ى يادرولىق سىناقتارعا قاتىسۋشىلاردىڭ جەسىرى. ءبارى قاجەتتى الەۋمەتتىك كومەك الىپ وتىر. تەحنيكالىق جانە كومەكشى ساۋىقتىرۋ قۇرالىمەن قامتىلعان، ساناتورلىق- كۋرورتتىق ساۋىقتىرۋعا جىبەرىلەدى. يادرولىق سىناققا قاتىسقاندارعا جىل سايىن 100 مىڭ تەڭگە مولشەرىندە ءبىرجولعى ماتەريالدىق كومەك كورسەتىلەدى.