تەڭگەنىڭ نىعايۋىنا ۆاكسينا تۋرالى جاعىمدى جاڭالىقتار ىقپال ەتتى - ۇلتتىق بانك

وتكەن اپتادا ۆاكسينانىڭ ءساتتى سىناعى تۋرالى جاڭالىق شىعىپ، الەمدىك نارىقتاردا ەيفوريا تۋعىزدى. وسىنىڭ اياسىندا مۇناي باعاسى شارىقتاپ كەتتى، ودان كەيىنگى ۆاكسينانى جاپپاي پايدالانۋعا بەرۋ جىلدامدىعىنا جانە ا ق ش- تاعى مۇناي قورىنىڭ وسۋىنە سىني كوزقاراس تۇزەتۋدى تۋىنداتىپ، نارىققا ىقپال ەتتى. مۇناي باعاسىنىڭ جان- جاقتى سەرپىنى تەڭگەگە دە اسەر ەتتى.

«COVID-19 -عا قارسى Pfizer جانە BioNTech ۆاكسيناسىنىڭ كلينيكالىق سىناقتارىنىڭ ءۇشىنشى كەزەڭى تۋرالى 9 - قاراشادا شىققان جاڭالىق وتكەن اپتادا الەمدىك قارجى نارىقتارىنىڭ قوزعاۋشى كۇشى بولدى. ۆاكسينانىڭ تيىمدىلىگى تۋرالى جاقسى جاڭالىقتار اياسىندا تاۋار نارىقتارىندا وڭ سەرپىن جانە ينۆەستورلاردىڭ تاۋەكەلگە اۋەستىگىنىڭ ارتۋى بايقالدى. قور يندەكستەرى مەن مۇناي باعاسى وتكەن اپتانى سەنىمدى وسۋدەن باستادى. سارسەنبىدە قىركۇيەكتەن بەرى العاش رەت ەتالوندىق Brent سۇرىپتى مۇنايدىڭ باعاسى ءبىر باررەل ءۇشىن $45 بەلگىسىنەن جوعارى كوتەرىلدى، بۇل دامۋشى ەلدەردىڭ ۆاليۋتالارىنا وڭ اسەر ەتتى. ءبىزدىڭ ۇلتتىق ۆاليۋتامىز دا ءبىر دوللار ءۇشىن 427,26 تەڭگە دەڭگەيىنە دەيىن نەمەسە اپتانىڭ باسىنا قاتىستى %1,2- عا نىعايدى»، - دەيدى ءاليا مولدابەكوۆا.

الايدا، ەپيدەميولوگيالىق جاعدايدىڭ ناشارلاۋى بەيسەنبىدە حالىقارالىق ەنەرگەتيكالىق اگەنتتىكتىڭ 2020 -جىلى مۇنايعا الەمدىك سۇرانىس بويىنشا بولجامىن تومەندەتتى. ال ا ق ش- تىڭ ەنەرگەتيكا مينيسترلىگى تاۋلىگىنە 488,7 ميلليون باررەلگە دەيىن، ياعني مۇناي قورىنىڭ ءبىر اپتادا % 0,9- عا ءوسىمى تۋرالى دەرەكتەردى جاريا ەتتى.

جاپپاي ۆاكسيناتسيانىڭ مەرزىمى جانە مۇنايعا دەگەن سۇرانىستىڭ پاندەميا الدىنداعى دەڭگەيلەرگە دەيىن قالپىنا كەلۋ پەرسپەكتيۆالارىمەن قوسا جاريالانعان ستاتيستيكا الەم نارىقتارىنداعى باعا جارىسىن توقتاتا تۇردى. اپتا سوڭىندا مۇناي باعاسىن تۇزەتە وتىرىپ تومەندەتۋگە سەبەپ بولدى. تەڭگە باعامى سوعان قاراماستان، ءبىر اپتادا % 0,4- عا نىعايىپ، 430,52 دەڭگەيىنە قايتىپ كەلدى.

ۇلتتىق بانك ءتوراعاسىنىڭ ورىنباسارى ءاليا مولدابەكوۆا جاقىن اراداعى پەرسپەكتيۆادا تەڭگەنىڭ ديناميكاسىن قانداي فاكتورلار انىقتايتىنىن ايتتى.

ازيا ەلدەرى بويىنشا كومىرسۋتەكتەر باعالارىنا جاقسى ەكونوميكالىق ستاتيستيكا قوسىمشا ىقپال ەتتى. قىتاي بويىنشا - ونەركاسىپ ءوندىرىسىنىڭ % 6,9 دەڭگەيىندە ءوسۋى (كۇتىلىپ وتىرعان % 6,7- عا قاراعاندا) جانە جاپونيا ءى ج ءو- ءنىڭ ءۇشىنشى توقساندا % 5 دەڭگەيىندە ءوسۋى ورىن الدى (بولجامدى % 4,4- عا قاراعاندا). دۇيسەنبىدە جاھاندىق قور نارىقتارى وسۋمەن جابىلدى. جاپوندىق Nikkei 225 يندەكسى دۇيسەنبىنىڭ قورىتىندىسى بويىنشا % 2,1- عا ءوسىپ، 29 جىل ىشىندەگى ەڭ جوعارعى كورسەتكىشتى جاڭارتتى.

«ءبىزدىڭ ۆاليۋتا ءۇشىن بۇل ءسوزسىز جاعىمدى بەلگى: اپتا باسىنان بەرى تەڭگە شامامەن 0,45 پايىزعا نىعايدى. قىسقا مەرزىمدى پەرسپەكتيۆادا سىرتقى نارىقتارداعى جاعىمدى جاڭالىقتاردىڭ جيىنتىعى سالىق اپتاسىمەن بىرگە تەڭگەنىڭ نىعايۋىنا اسەر ەتەدى. ءبىراق باسقا دا سىرتقى جانە ىشكى فاكتورلاردى ەسكەرۋ قاجەت. سىرتقى فاكتورلار، بۇل، ەڭ الدىمەن، ۆاكسينانى جاپپاي قولدانۋ مەرزىمدەرى بويىنشا بەلگىسىزدىك جانە +وپەك ەلدەرىنىڭ الداعى كەزدەسۋىنىڭ ناتيجەلەرى. ىشكى فاكتورلار - تولەم بالانسى تاراپىنان تەڭگەگە جاسالىپ جاتقان قىسىم، ول بيىلعى ناۋرىزدان باستاپ بايقالىپ وتىرعان مۇناي باعاسىنىڭ تومەن كەزەڭىمەن بايلانىستى»، - دەدى ول.

اۆتور: گۇلميرا عوسمانالي