الماتى وبلىسىندا «ءۇشارال- دوستىق» اۆتوجولى جابىلدى

«قازاۆتوجول» ۇ ك ا ق الماتى وبلىستىق فيليالى مەن «قازاق اۆتوجول» ج ش س الماتى وبلىستىق فيليالىنىڭ حابارلاۋىنشا، 17- قاراشا ساعات 12:10 باستاپ اۋا رايىنىڭ قولايسىزدىعىنا بايلانىستى «ءۇشارال- دوستىق» رەسپۋبليكالىق اۆتوجولىندا (84-184 شاقىرىم ارالىعى) بارلىق اۆتوكولىكتىڭ جۇرۋىنە تىيىم سالىندى.

الماتى وبلىسى توتەنشە جاعدايلار دەپارتامەنتى قىسقى جولدا قاۋىپسىزدىك ەرەجەلەرىن ساقتاۋ كەرەكتىگىن ەسكەرتەدى. جۇرگىزۋشىلەر مىنا تالاپتاردى قاتاڭ ساقتاۋى ءتيىس:

- اۋا رايىنىڭ وزگەرۋىن، مەتەورولوگيالىق مالىمەتتەردى باقىلاۋ، اۋا رايىنىڭ ناشارلاۋى جانە اۆتوجولداردا اۆتوكولىك قوزعالىسىنا شەكتەۋلەر ەنگىزۋ كەزىندە جولعا شىقپاۋ؛

- ءار كولىكتە مىندەتتى تۇردە شۇعىل جاعدايدا قۇتقاراتىن زاتتار - دانەكەرلەۋ شامى، ارقان، دوڭگەلەكتەرگە ارنالعان شىنجىر، كۇرەك، ءپارافيندى شىراقتار، سونداي- اق جىلى كيىم، ءبىرىنشى كەزەكتە قاجەتتى زاتتار، تاماق جانە سۋ قورى بولۋى ءتيىس؛

- جازعى شينانى قىسقى دوڭگەلەككە ۋاقىتىلى اۋىستىرۋ قاجەت؛

- ەگەر ءسىز بوران نەمەسە قاتتى اياز كەزىندە جولدا بولساڭىز، كولىگىڭىز ەلدى مەكەننەن الىس جەردە نەمەسە سىزگە تانىس ەمەس جەردە توقتاپ قالسا، كولىكتە قالىپ، جولدا باسقا كولىكتى كۇتىپ نەمەسە «101» جانە «112» ءنومىرى ارقىلى كومەك شاقىرۋ قاجەت.

اۆتور: سامال قابىشيەۆا