الەمدەگى كوروناۆيرۋس: اۆستريا مەن يران جاپپاي لوكداۋن ەنگىزۋدە

وسى ۋاقىتقا دەيىن اۆستريادا ءىرى دۇكەندەر جۇمىس ىستەمەيدى. مەكتەپ وقۋشىلارى قاشىقتان ءبىلىم الادى. ءالپى رەسپۋبليكاسىنىڭ كانتسلەرى سەباستيان كۋرتس ەل بيلىگىنىڭ مۇعالىمدەرگە ينفەكتسياعا ءاناليزدى ەرىكتى تۇردە تاپسىرۋدى ۇسىنىپ، تۇرعىنداردىڭ وزگە دە توپتارىن روجدەستۆوعا دەيىن تەستىلەۋ ءۇشىن جاعداي جاساۋعا نيەتتى ەكەنىن حابارلادى. گەرمانيادا قاراشانىڭ باسىندا ەنگىزىلگەن جارىم-جارتىلاي كارانتين ناتيجەلەرى باعالانۋدا.

گ ف ر كانتسلەرى انگەلا مەركەل بۇل شارالاردىڭ اۋرۋعا شالدىققانداردىڭ ەكسپونەنتسيالدىق ءوسىمىن توقتاتۋعا مۇمكىندىك بەرگەنىن ايتتى. الايدا ۇكىمەت باسشىسى ەل ازاماتتارىن پاندەمياعا بايلانىستى الەۋمەتتىك بايلانىستارىن ودان دا قاتتى شەكتەۋگە شاقىردى. 16 فەدەرالدىق جەردىڭ باسشىسىلارىمەن تولىققاندى تىيىم سالۋ ماسەلەسىن كەلىسۋ مۇمكىن بولمادى.

كوۆيدتىڭ ءبىرىنشى تولقىنى كەزىندە قاتاڭ شەكتەۋ ەنگىزۋدەن باس تارتقان شۆەتسيا بيلىگى ەندى باعىتىن وزگەرتىپ وتىر. 24-قاراشادان باستاپ ەلدە سەگىز ادامنان كوپ جينالۋعا تىيىم سالىنادى. 20-قاراشادان باستاپ بارلار، مەيرامحانالار مەن تۇنگى كلۋبتاردا ساعات 22 دەن باستاپ الكوگول ونىمدەرىن ساتۋعا تىيىم سالىنادى. سوڭعى اپتالاردا ەلدە COVID-19 ۆيرۋسىن جۇقتىرعاندار سانىنىڭ ءوسىمى بايقالىپ وتىر، وسىعان بايلانىستى دەنساۋلىق ساقتاۋ جۇيەسىنە ۇلكەن سالماق تۇسكەن.

شۆەيتسارياداعى جەنيەۆا كانتونى قاراشادا كوروناۆيرۋس جۇقتىرۋدىڭ ەڭ جوعارى دەڭگەيى بەلگىلەنگەن ەۋروپا ايماقتارىنىڭ قاتارىنا كىردى. مۇنداعى ءجۇز مىڭ تۇرعىننىڭ ىشىندە التى مىڭ ادام اۋرۋ جۇقتىرعان. جەرگىلىكتى اۋرۋحانالاردىڭ دارىگەرلەرى دابىل قاقتى. جاعداي قاتاڭ كارانتين ەنگىزىلگەن سوڭ (كانتوندا مەيرامحانالار مەن بارلاردان باسقا، ازىق-تۇلىك ساتپايتىن بارلىق دۇكەندەر جابىلدى) تۇراقتالا باستادى، الايدا ءالى دە كۇردەلى بولىپ قالىپ وتىر.

BBC -دىڭ حابارلاۋىنشا، يراندا Covid-19 ۆيرۋسى سالدارىنان ءولىم وقيعالارىنىڭ كوبەيۋىنە بايلانىستى سەنبىدەن باستاپ ءبىرىنشى لوكداۋن ەنگىزىلىپ جاتىر. بولجام بويىنشا، تاۋلىك ىشىندە ءولىم سانى ەكى ەسە ءوسىپ، اۋرۋحانالار ناۋقاستار اعىنىن قابىلداي الماي قالادى.

«ۇكىمەتتىڭ بۇل قيراتۋشى ۆيرۋسپەن كۇرەس جۇرگىزۋ ءۇشىن لوكداۋن ەنگىزۋدەن باسقا امالى جوق. مەن كوروناۆيرۋستىڭ ءۇشىنشى تولقىنىمەن كۇرەس جۇرگىزۋ ءۇشىن جاپپاي كۇش جۇمىلدىرۋدى جاريالايمىن»، - دەدى ەل پرەزيدەنتى حاسان روۋحاني.

پاندەميا باستالعالى، ەلدە اۋرۋ جۇقتىرۋدىڭ 558 مىڭنان استام وقيعاسى تىركەلىپ، 41,4 مىڭنان استام ادام قايتىس بولعان. ا ق ش- تا Covid-19 ۆيرۋسىنا شالدىققاندار سانى پاندەميا باسىنان بەرى 11 ميلليون ادامنان استى، ال اۋرۋحانالارداعى پاتسيەنتتەر سانى رەكوردتىق قارقىنمەن ءوسىپ جاتىر. ەلدە كوروناۆيرۋستان 250 مىڭعا جۋىق ادام قايتىس بولدى.

ميچيگان جانە ۆاشينگتون شتاتتارى قاتاڭ كارانتين شارالارىن ەنگىزگەن. سارسەنبىدەن باستاپ ميچيگاندا جوعارى سىنىپ وقۋشىلارى مەن كوللەدج ستۋدەنتتەرى ونلاين- وقىتۋعا اۋىسىپ، مەيرامحانالار كەلۋشىلەردى قابىلدامايدى. ۆاشينگتوندا سپورتزالدار، كينوتەاترلار، تەاترلار جانە مۇراجايلار جابىلادى. وسى ارادا اق ءۇي جەلتوقساننان باستاپ ايىنا 20 ميلليون امەريكاندىق ازاماتقا ۆاكسينا ەگۋگە نيەتتى ەكەنىن مالىمدەدى. قازىرگى كەزدە ەلدە بىردە ءبىر ۆاكسينا رەسمي تۇردە ماقۇلدانعان جوق، دەپ حابارلايدى BBC .

اۆستراليادا كارانتين تالاپتارىن ساقتاۋعا مىندەتتى ادامدار تۇرىپ جاتقان قوناق ءۇيدىڭ قىزمەتكەرى وتباسىنىڭ 13 مۇشەسىنە ۆيرۋس جۇقتىرعان. اۋرۋ جۇقتىرۋ وقيعالارى انىقتالعان سوڭ وڭتۇستىك اۆستراليا شتاتىنىڭ بيلىگى وتكىزىلىپ جاتقان تەست سانىن كوبەيتىپ، جاڭا شەكتەۋلەر ەنگىزدى. ناۋرىز ايىنان باستاپ شەتەلدىكتەرگە ەلگە كىرۋگە تىيىم سالىنعان، ءبىراق اۆستراليا ازاماتتارى مەن قولىندا تۇرۋعا ىقتيارحاتى بار ازاماتتار ارنايى قوناقۇيدە مىندەتتى 14 كۇندىك كارانتيندە بولۋ تالابىن ساقتاسا، ەلگە قايتىپ كەلە الادى.