د د س ۇ باسشىسى: كوروناۆيرۋستى تولىق جەڭۋ ءۇشىن تەك ۆاكتسينا ەگۋ جەتكىلىكسىز

ساقتىق شارالارى، جاپپاي تەستىلەۋ، سونداي-اق اۋرۋعا شالدىققاندارمەن بايلانىستا بولعان ادامداردى باقىلاپ وتىرۋ ءالى دە قاجەت.

بۇل تۋرالى Moderna كومپانياسى شىعارعان ۆاكتسينانىڭ تيىمدىلىگى تۋرالى اقپارات بەرۋ بارىسىندا دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس گەبرەيەسۋس ءمالىم ەتتى، دەپ حابارلايدى قازاقپارات news.un.org سايتىنا سىلتەمە جاساپ.

دۇيسەنبى كۇنى ب ا ق- تا امەريكانىڭ Moderna كومپانياسىنىڭ ساراپشىلارى جاساپ شىعارعان ۆاكتسينانى كلينيكالىق سىناقتان وتكىزۋدىڭ ءۇشىنشى، ياعني سوڭعى ساتىسىنىڭ بارىسىندا ونىڭ تيىمدىلىگى 94,5 پايىزدى قۇراپ وتىرعانى بەلگىلى بولدى.

سىناقتان وتكىزۋ كەزىندە كوروناۆيرۋستى 95 ادام جۇقتىرعان، سونىڭ ىشىندە 90 ادام ەكپەنىڭ ورنىنا پلاتسەبو العان. اۋرۋدىڭ اۋىر فورمادا وتكەن بارلىق 11 وقيعاسى پلاتسەبو ەكپەسى ەگىلگەندەر توبىندا بولعان.

ەسكە سالا كەتسەك، وتكەن اپتادا Pfizer كومپانياسى ءوز ۆاكتسيناسىنىڭ تيىمدىلىگى تۋرالى مالىمدەگەن، ول بۇل ۆاكتسينانى نەمىستىڭ BioNTech فيرماسىمەن بىرىگىپ شىعاردى. سونداي-اق، د-ر تەدروس كلينيكالىق سىناقتىڭ اياقتالىپ، ۆاكتسينانىڭ نارىقتا پايدا بولۋىنان كەيىن دە قولجەتىمسىز بولاتىنىن اتاپ ءوتتى.

«ەڭ باسىندا ۇسىنىس شەكتەۋلى بولادى، العاشقى قاتاردا مەديتسينالىق قىزمەتكەرلەر، ەگدە جاستاعى ادامدار جانە ءقاۋىپ توبىنا كىرەتىن وزگە دە تۇرعىندار بولادى. بۇل ءولىم وقيعالارىنىڭ سانى قىسقارتىپ، دەنساۋلىق ساقتاۋ جۇيەسىن قولداۋعا سەپتىگىن تيگىزەدى. ءبىراق، وسىدان كەيىن ۆيرۋستىڭ تارالۋىنىڭ بۇدان دا كوپ مۇمكىندىگى بولادى»، - دەدى د-ر تەدروس.

ول ۇيىمنىڭ ۆاكتسينالاردىڭ تيىمدىگى تۋرالى جاڭالىقتاردى «ساقتىق وپتيميزممەن» قابىلداپ وتىرعانىن جانە كوپتەگەن ەلدەردەگى جاعداي ءالى دە اۋىر ەكەنىن ۇمىتپاۋعا شاقىردى.

«ءبىز كەيبىر ەلدەردە اۋرۋ جۇقتىرۋ سانىنىڭ كوبەيۋىنە قاتىستى الاڭداپ وتىرمىز. ەۋروپادا، وڭتۇستىك جانە سولتۇستىك امەريكادا دەنساۋلىق ساقتاۋ جۇيەلەرى مەن مەديتسينالىق قىزمەتكەرلەرى ءوز مۇمكىندىكتەرىنىڭ شاماسىنان تىس جۇمىس ىستەۋدە»، - دەدى د-ر تەدروس.