كارانتينگە قاراماستان ءبىلىم ساپاسىنىڭ تومەندەۋىنە جول بەرمەۋىمىز قاجەت - مەملەكەت باسشىسى
مەملەكەت باسشىسى سانيتارلىق تالاپتار مەن شەكتەۋ شارالارىنىڭ ساقتالۋىنا كومپانيا باسشىلارىنىڭ جانە بيزنەس يەلەرىنىڭ جاۋاپتى ەكەنىن ەسكە سالدى. سوڭعى ۋاقىتتا ءىرى كاسىپورىندارداعى ەڭبەك ۇجىمدارىندا ۆيرۋس جۇقتىرعاندارىڭ سانى ارتا باستادى. قوعامدىق كولىكتەگى سانيتارلىق جاعداي جانە ازاماتتار كوپ شوعىرلاناتىن ورىنداردا الەۋمەتتىك قاشىقتىقتىڭ ساقتالماۋى الاڭداۋشىلىق تۋدىرىپ وتىر.
- اتا- انالار شىدامدىلىق تانىتىپ، قازىرگى احۋالعا تۇسىنىستىكپەن قاراۋى كەرەك. وسىنداي جاعداي تەك قازاقستاندا عانا ەمەس، بۇكىل الەمدە قالىپتاسىپ وتىر. ءبىز ءبىلىم ساپاسىنىڭ تومەندەۋىنە جول بەرمەۋىمىز قاجەت. وقىتۋ ناتيجەسىنە مونيتورينگ جۇرگىزىپ، ءبىلىم سالاسىنداعى ولقىلىقتاردى جويۋ ءۇشىن ۋاقتىلى شارالار قابىلداۋ كەرەك. ۇكىمەتكە ءوڭىر اكىمدەرىمەن بىرلەسىپ، شەكتەۋ شارالارىنا قاراماستان، ءبىلىم ساپاسىن باقىلاۋدى كۇشەيتۋدى تاپسىرامىن، - دەدى قاسىم- جومارت توقايەۆ.
ايتا كەتەيىك، بۇگىن قازاقستان پرەزيدەنتى ۇكىمەت مۇشەلەرىمەن، ءبىرقاتار ورگان باسشىلارىمەن، قالالار مەن وبلىستاردىڭ اكىمدەرىمەن ۆيدەوكونفەرەنتسيا رەجيمىندە كەڭەس وتكىزدى. اتالعان جيىندا مەملەكەت باسشىسى كەي وڭىرلەردە كوروناۆيرۋس فاكتىلەرىن جاسىرۋ جاعدايلارى اشكەرە بولعانىن ايتتى.
