تۇركىستاننان العاشقى حالىقارالىق اۆيارەيس قاي ەلگە اشىلادى
بۇل تۋرالى تۇركىستان وبلىسىنىڭ اكىمى ءومىرزاق شوكەيەۆ ايتتى، دەپ حابارلايدى قازاقپارات ءتىلشىسى.
«اۋەجاي سالىندى. تولىق قولدانىسقا بەرىلدى دەپ ايتۋعا بولادى. ۇلكەن، كەرەمەت اۋەجاي. ونىڭ ۇشىپ- قونۋ جولاعىنىڭ ۇزىندىعى 3300 مەتردى قۇرايدى. بارلىق حالىقارالىق ستاندارتقا ساي كەلەدى. سونىمەن قاتار تەرمينالى دا جاقسى سالىنعان. شەتەلدىك بولسىن، ىشكى بولسىن بارلىق رەيسكە قىزمەت كورسەتۋگە مۇمكىندىگى بار»، - دەدى ءوڭىر باسشىسى ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونىمەن قاتار ول تۇركىستان حالىقارالىق اۋەجايىنان شەتەلدىك جانە ىشكى رەيستەر قاشان جولعا قويىلاتىندىعىن ايتتى.
«رەيستەردىڭ اشىلۋى پاندەمياعا بايلانىستى. پاندەميا ءسال باسەڭدەسە ءبىرىنشى تۇركيانىڭ ىستانبۇل قالاسىنا رەيس اشىلادى. ودان كەيىن مەككەگە اشىلۋى مۇمكىن. ونى ەندى ۋاقىت كورسەتەدى. ال 1-جەلتوقساننان باستاپ كۇندەلىكتى ىشكى رەيستەردى باستايمىز. بۇعاندا پاندەميا اسەر ەتۋى مۇمكىن. ءبىراق باستايمىز»، - دەدى ءومىرزاق شوكەيەۆ.
اۆتور: مارلان جيەمباي
