ورالدا تويدان قاشقاندار ۆيدەوعا ءتۇسىپ قالدى

ورال قالاسى اكىمى اپپاراتىنىڭ ءبولىم باسشىسى اسلان جارمۇحانوۆتىڭ ايتۋىنشا، مونيتورينگ بارىسىندا 14 قاراشا كۇنى شەكتەۋ شارالارىن بۇزۋشىلىقتىڭ بەس دەرەگى انىقتالدى. سونىڭ ىشىندە «ايبات» مەيرامحاناسىندا ۇيلەنۋ تويى بولىپ، 60-70-تەي ادام جينالعان.

«ءبىز بارعان كەزدە ىشتەگىلەر ءبىر ساعات ۋاقىتتاي ەسىكتى اشقان جوق. سودان كەيىن مەيرامحانا اكىمشىسىنە قوڭىراۋ شالىپ، توتەنشە جاعداي قىزمەتكەرلەرىن شاقىردىق، ەسىكتى بۇزدىرامىز دەگەننەن كەيىن عانا ىشكە كىرە الدىق. توي قوناقتارى كيىنىپ ۇلگەرگەن، مەيرامحانادان شىعىپ بارا جاتقان ساتتە ۆيدەوعا ءتۇسىپ قالدى»، دەيدى اسلان جارمۇحانوۆ.

سونداي-اق نەكراسوۆ كوشەسى 47-مەكەنجايىندا ورنالاسقان كوتتەدجدە وتباسىلىق شارانىڭ ءوتىپ جاتقانى بەلگىلى بولدى. وعان وتىز شاقتى ادام قاتىسقان. تاعى ەكى دەرەك دۇكەندەردە تەرمومەتريانىڭ جوقتىعى جانە اراقاشىقتىقتىڭ ساقتالماۋىنا قاتىستى تىركەلدى. سونىمەن قاتار قوعامدىق تاماقتاندىرۋ نىسانى جۇمىس ىستەۋ ۋاقىتىن بۇزعان. بارلىق ماتەريالدار ءتيىستى شارالار قابىلداۋ ءۇشىن ورال قالاسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا جولداندى.

ەسكە سالا كەتەيىك، بۇدان بۇرىن ب ق و- دا كارانتين تالابىن بۇزعاندارعا 21 ميلليون تەڭگە ايىپپۇل سالىنعانىن، ورالدا مودۋلدىك اۋرۋحانا قۇرىلىسى اياقتالىپ كەلە جاتقانىن جازعان بولاتىنبىز.

اۆتور: ەلجان ەرالى