ەۋروپا ەلدەرى روجدەستۆونى تويلاماۋى مۇمكىن
لوندون. قازاقپارات - ەۋروپانىڭ بىرنەشە ەلىنىڭ ۇكىمەتى جۇما كۇنى روجدەستۆونى تويلاۋعا ءالى ەرتە دەپ ەسكەرتىپ، كارانتيندىك شەكتەۋلەر جەلتوقساننىڭ سوڭىندا كۇشىندە قالۋى مۇمكىن ەكەندىگىن جاريالادى، دەپ حابارلايدى قازاقپارات BBC- گە سىلتەمە جاساپ.
بۇل تۋرالى شۆەتسيا، يرلانديا جانە فرانسيا بيلىگى مالىمدەدى. سونداي-اق ەۋروپانىڭ كەي ەلدەرى كارانتين ءتارتىبىن قاتاڭداتىپ جاتىر.
كەيىنگى تاۋلىكتە يتاليادا 40902 ادام كوروناۆيرۋس جۇقتىرىپ، رەكوردتىق كورسەتكىشكە جەتتى. ا ق ش- تاعى جاعداي دا ءماز ەمەس. جۇما كۇنى كاليفورنيادا ينفەكسياعا شالدىققاندار سانى ميلليوننان استى. بۇعان دەيىن مۇنداي كورسەتكىش تەحاس شتاتىندا تىركەلگەن. شتات بيلىگى جاڭا شەكتەۋ شارالارىنىڭ ەنگىزىلەتىنىن مالىمدەدى، كاليفورنيالىقتارعا قاتتى قاجەتتىلىك بولماسا شتاتتان شىقپاۋدى سۇرادى. وسىنداي شەكتەۋلەردى جۇما كۇنى ورەگون جانە ۆاشينگتون شتاتتارىنىڭ اكىمشىلىگى ەنگىزدى.
