كوپبالالى انالاردىڭ جاردەماقىسى قىسقاراتىنى راس پا: مينيسترلىك جاۋاپ بەردى
نۇر-سۇلتان. قازاقپارات - الەۋمەتتىك جەلىدە 2021-جىلى ءتورت بالانى ومىرگە اكەلىپ، باعىپ-قاعىپ جاتقان ايەلدەر كوپبالالى انالار ساناتىنا جاتپايدى، ءتىپتى ولاردىڭ جاردەماقىسى دا قىسقاراتىن بولادى دەگەن اقپارات جەلدەي ەسىپ، قىزۋ تالقىلانۋدا.
بۇل شىنىمەن راس اقپارات پا، الدە قۇر قاۋەسەت پە؟ جۇرتتى ەكىۇداي ويعا قالدىرىپ قويعان حابارعا قاتىستى ەڭبەك مينيسترلىگى پىكىر ءبىلدىردى دەپ حابارلايدى ەۋرازيا ءبىرىنشى ارناسى.
بۇگىندە الەۋمەتتىك جەلىدە 4 بالالى انالاردىڭ جاردەماقىسى قىسقارتىلىپ، ءتىپتى 2021-جىلى ولار «كوپبالالى انالار» ساناتىنا جاتپايدى دەگەن الىپ-قاشپا اڭگىمەلەر تاراۋدا. ونداعى جازبالارعا ۇڭىلسەك، الداعى جىلى ءتورتىنشى پەرزەنتىن بوساناتىن ايەلدەر، الگى كومەككە ىلىنبەيدى ەكەن. الايدا ەڭبەك مينيسترلىگى بۇل اقپاراتتىڭ جاي قاۋەسەت ەكەنىن، شىندىققا ەش جاناسپايتىنىن حابارلادى. ءتورت بالالى انالاردىڭ جاردەماقىسىن قىسقارتۋ، ولاردى كوپبالالىلار ساناتىنان الىپ تاستاۋ ماسەلەسى مۇلدەم قارالىپ جاتقان جوق».
«رەسمي اقپارتتارعا عانا سۇيەنۋگە، سوعان سەنۋگە، جالعان اقپارات تاراتپاۋعا شاقىرامىن. بۇل باعىتتا مەنىڭ ايتارىم: كوپبالالى وتباسىلاردى الەۋمەتتىك قامسىزداندىرۋ ماسەلەسى - 2000-جىلدىڭ باسىنان كەلە جاتقان جۇيە. ونى الىپ تاستاۋ قارالعان جوق. كەرىسىنشە، وزدەرىڭىز بىلەسىزدەر، بيىلعى جىلدان باستاپ ءبىز وتباسىنىڭ قۇرامىنداعى بالا سانىنا قاراي الەۋمەتتىك تولەم جۇيەسىن ديففرەنتسيالدى تۇردە تاعايىنداۋدى جۇزەگە اسىردىق»، - دەدى ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك كومەك دەپارتامەنتى ديرەكتورىنىڭ ورىنباسارى اسقار نيازوۆ.
