ەلورداعا ۇشىپ كەلگەن ەلشىلىك قىزمەتكەرىنەن كوروناۆيرۋس انىقتالدى
نۇر-سۇلتان. قازاقپارات - نۇر-سۇلتانعا ۇشىپ كەلگەن رەسەي فەدەراتسياسىنىڭ ەلشىلىگى قىزمەتكەرىنەن كوروناۆيرۋس انىقتالدى.
بۇل تۋرالى كولىكتەگى باس مەملەكەتتىك سانيتارلىق دارىگەر ءسادۋاقاس بايعابىلوۆ ءمالىم ەتتى، دەپ حابارلايدى قازاقپارات ءتىلشىسى.
«رەسەي فەدەراتسياسى ەلشىلىگىنىڭ قىزمەتكەرى نۇر-سۇلتانعا ۇشىپ كەلگەننەن كەيىن پ ت ر- تەست ادىستەمەسىمەن تەكسەرىلدى. تەكسەرۋ ناتيجەسىندە رەسەي ازاماتىنان كوروناۆيرۋس ينفەكسياسى انىقتالدى»، - دەيدى ءسادۋاقاس بايعابىلوۆ.
ونىڭ ايتۋىنشا قازىرگى ۋاقىتتا شەتەل ازاماتى 14 كۇندىك كارانتينگە جاتقىزىلعان.
«ءوزى تولتىرعان انكەتادا ول رەسەي ازاماتى ەكەنىن جانە سول ەلدىڭ سىرتقى ىستەر مينيسترلىگىندە جۇمىس ىستەيتىنىن، قازاقستانداعى ر ف ەلشىلىگىنە كەلگەنىن كورسەتتى»، - دەيدى كولىكتەگى باس مەملەكەتتىك سانيتارلىق دارىگەر.
اۆتور: ايان بەكەن ۇلى
