ەلوردا كوشەسىندە شولاق مىلتىقپەن جۇرگەن وزبەكستان ازاماتى ۇستالدى

نۇر-سۇلتان قالالىق پوليتسيا دەپارتامەنتىنىڭ مالىمەتىنشە، شارا اياسىندا جۇرگىزىلگەن رەيدتەر بارىسىندا گاز تاپانشاسىمەن جۇرگەن 4 ادام ۇستالدى. ساراپتاما قورىتىندىسىنا سايكەس، تاركىلەنگەن گاز تاپانشالارى جاراقاتتايتىن وقپەن اتۋعا جارامدى بولىپ شىقتى.

«سونىمەن قاتار جيەنقۇلوۆ كوشەسى بويىندا وزبەكستان رەسپۋبليكاسىنىڭ 38 جاستاعى تۋماسى توقتاتىلدى. ونىڭ پوليەتيلەن پاكەتىن قاراۋ بارىسىندا شولاق مىلتىق تابىلدى. ماماننىڭ قورىتىندىسىنا سايكەس، تەگىس ءارى قىسقا ۇڭعىمالى قارۋ 16 كاليبرلى اڭشى مىلتىعىنان قولدان جاسالعان. زاۋىت ءنومىرى وشىرىلگەن جانە اتۋعا جارامدى. مۇنان بولەك، پوليتسيا قىزمەتكەرلەرى 20 دانا وق-ءدارى تاركىلەدى»، - دەلىنگەن ۆەدومستۆو اقپاراتىندا.

جەدەل الدىن ال شاراسىن وتكىزۋ بارىسىندا قارۋ-جاراق، وق-ءدارى، جارىلعىش زاتتار مەن قۇرىلعىلاردى زاڭسىز دايىنداۋ جانە ساتۋمەن بايلانىستى 11 قىلمىس انىقتالدى. ولارعا قاتىسى بار تۇلعالاردىڭ ۇستىنەن ق ر قىلمىستىق كودەكسىنىڭ 287-بابىمەن تەرگەۋ امالدارى جۇرگىزىلىپ جاتىر.