الەۋمەتتىك جەلى ادامداردى ءبىر- بىرىنەن الىستاتىپ جاتىر - ايدوس سارىم

بۇل ويىن بەلگىلى ساياساتتانۋشى ايدوس سارىم قازاقستان ازاماتتىق اليانى وتكىزگەن جاس ساياساتتانۋشىلاردىڭ Policy Camp رەسپۋبليكالىق ونلاين مەكتەبىندەگى ونلاين جيىندا ايتتى، دەپ حابارلايدى قازاقپارات ءتىلشىسى.

ونلاين جيىندا ساياساتتانۋشى ايدوس سارىم الەۋمەتتىك جەلىنىڭ قوعام دامۋىنا كەلتىرىپ جاتقان زيانى تۋرالى باياندادى.

«ءبىزدىڭ قوعام ينتەرنەتتىڭ ىشىندە الەۋمەتتىك جەلىدە قالىپتاسقان پسيحولوگيا مەن زاڭدىلىقتاردى قيالداعى ەمەس كادىمگى كۇندەلىكتى ومىرگە الىپ كەلە جاتىر. بۇل ساياساتقا دا، مادەنيەتكە دە، وتباسىعا دا تەرىس اسەرىن تيگىزىپ جاتىر. ينتەرنەت تۋرالى قازىر كوپ جەرلەردە ماقالا، كىتاپ جازىلىپ جاتىر. ينتەرنەتتىڭ قوعام پسيحولوگياسىنا تەرىس اسەرى ايتىلىپ جاتىر. كەزىندە دەموكراتيالاندىرۋ، ادامداردى جاقىنداستىرۋ دەگەن ۇلكەن ماقساتپەن قۇرىلعان الەۋمەتتىك جەلى قازىر كەرىسىنشە قوعامدى دەموكراتيادان توتاليتارلىق باعىتقا الىپ بارا جاتىر دەگەن تەوريا بار. ەكىنشىدەن، بۇل پسيحولوگيالىق تۇرعىدان ادامداردى ءبىر- بىرىنەن الىستاتىپ جاتىر. بىزدە پاندەميا كەزىندە الەۋمەتتىك ديستانتسيا دەگەن ۇعىم پايدا بولدى. الەۋمەتتىك ديستانتسيانى تۋدىراتىن پاندەميا ەمەس، الەۋمەتتىك جەلى دەپ ويلامىن. قازىر ادامداردىڭ تۇلعالاردىڭ ءوزىن ءوزى تانىتۋعا قۇلشىنىسىن تۋدىرعان زامان. ءوزىن ءوزى تانىتۋدىڭ، اباي ايتقانداي «تولىق ادام» كاتەگورياسىنا جەتكىزۋ ءۇشىن ادامنىڭ اتىن شىعارۋ ەمەس، پوتەنتسيالىن پايدالانۋ كەرەك دەپ ويلايمىن. ءبىز كوبىنەسە ەكى جەردە شاتاسامىز. قاتتى سويلەۋ، ۇلكەن- كىشىگە بارىنە «سەن» دەپ سويلەۋ ينتەرنەتتەن كەلىپ جاتقان دۇنيە. بۇل ءبىزدىڭ قوعامداعى سىندارلى ديالوگقا كەسىرىن تيگىزەدى»، - دەدى ايدوس سارىم.

ونىڭ ايتۋىنشا، ينتەرنەت كەز- كەلگەن سالادا قالىپتاسقان يەرارحيانى جويادى. «بۇل دەگەنىڭىز مەن باستىقپىن، ءسىز- قولاستىمداعى جۇمىسشىسىز دەگەن ءسوز ەمەس. كەز- كەلگەن كاسىپ، سونىڭ ىشىندە پوليتولوگيا كاسىبى دە يەرارحياعا نەگىزدەلەدى. ءار مادەنيەت، عىلىم ءبىلىم وسى يەرارحيادان تۇرادى. مادەنيەتتەن، قوعامنان يەرارحيا كەتكەندە اۆتوريتەت كەتەدى. اسىرەسە الەۋمەتتىك جەلىدەن اۆتور كەتەدى. مىسالى عىلىمدى 40 جىل قازبالاعان عالىم مەن مەكتەپتەن كەشە عانا شىققان وقۋشىنىڭ دەڭگەيى ءبىر بولىپ قالدى. مەنىڭ ويىمشا، بۇل دۇرىس ەمەس. جۇرەگىمە وپەراتسيا جاساۋ كەرەك پە دەپ مەن كورشىلەرىمنەن ەمەس، Facebook قاۋىمداستىعىنان ەمەس، دارىگەردەن سۇراعانىم ءجون»، - دەدى ساياساتتانۋشى.

اۆتور: گۇلميرا عوسمانالي