فۋتبول: قازاقستان چەرنوگوريامەن تەڭ ءتۇستى

نۇر-سۇلتان. قازاقپارات - فۋتبولدان قازاقستان مەن چەرنوگوريا قۇرامالارى اراسىنداعى جولداستىق كەزدەسۋى اياقتالدى، دەپ حابارلايدى قازاقپارات ءتىلشىسى.

ەكى قۇراما اراسىندا تارتىستى ويىن ءوربىدى. كەزدەسۋ الدىندا قازاقستان قۇراماسى ءتۇرلى سەبەپپەن ءبىرقاتار فۋتبولشىنى قاتارعا قوسا العان جوق. سوعان قاراماستان بۇگىن قازاقستاندىق ويىنشىلار جيناقى قيمىل كورسەتتى.

ويىن بارىسىندا گول سوعاتىن بىرنەشە مۇمكىندىكتى ءمۇلت جىبەرىپ الدى. چەرنوگوريا قۇراماسىنىڭ دا ەسەپتى وزگەرتەتىن بىرنەشە مۇمكىندىگى بولعان ەدى. دەسە دە ولارعا دا دالدىك جەتىسپەي جاتتى. كەزدەسۋ 0:0 ەسەبىمەن تەڭ اياقتالدى.

ەستەرىڭىزگە سالا كەتەلىك، بۇعان دەيىن ەكى قۇراما ءۇش مارتە كەزدەستى.

2008-جىلدىڭ 27- مامىرىندا پودگوريتسەدە وتكەن جولداستىق كەزدەسۋدە ولاردان 0:3 ەسەبىمەن جەڭىلىپ قالدى. ودان كەيىن ەكى قۇرامانىڭ جولى 2018-جىلعى الەم چەمپيوناتىنا ىرىكتەۋ كەزەڭىندە ە توبىندا ءتۇيىستى. الدىمەن 2016-جىلدىڭ 8- قازانىندا پودگوريتسەدە 0:5 ەسەبىمەن ەسە جىبەرگەن قازاقستاندىق قۇراما 2017-جىلدىڭ 1- قىركۇيەگىندە ەلوردادا ولارعا 0:3 ەسەبىمەن ەسە جىبەردى.

سوندىقتان قازاقستان مەن چەرنوگوريا بۇگىن العاش رەت تەڭ ءتۇسىپ وتىر. دەگەنمەن قازاقستاندىق فۋتبولشىلار ءتورت ويىن بويى اتالعان قارسىلاسىنا بىردە-ءبىر گول سوعا الماي كەلەدى.

ەستەرىڭىزگە سالا كەتەلىك، قازاقستان قۇراماسى ەندى ۇلتتار ليگاسىندا ەكى ويىن وتكىزەدى. الدىمەن 15- قازاندا سىرت الاڭدا البانيامەن شەبەرلىك بايقاسسا، 18- قاراشادا ءوز الاڭىندا ليتۆانى قابىلدايدى. قازاقستان س ليگاسىندا ءتورتىنشى توپتا سىنعا ءتۇسىپ ءجۇر.