كورەيادا درون- تاكسيلەر قىزمەت كورسەتەدى

كورەيانىڭ ءبىر قالاسىنان ەكىنشى قالاسىنا تاكسي ارقىلى قاشان جەتۋگە بولادى؟

كوروناۆيرۋس ىندەتى درونداردىڭ دا جۇمىسىنا اسەر ەتتى. ولار سەۋل ساياباعىنا كەلۋشىلەرگە ماسكا تاعۋدى ەسكەرتەدى. پوشتا جەتكىزۋ قىزمەتىن دە باستاعان. ال ەندى بىرنەشە جىلدان كەيىن وسىنداي امەريكاندىق درونمەن ءتىپتى جۇمىسقا جەتۋگە بولادى.

ۆلاديسلاۆ سوي، ءتىلشى:

- بۇل قۇرىلعى درونعا ۇقسامايدى. ويتكەنى ودان اۋىرلاۋ. مۇنى كىشكەنتاي تىكۇشاق دەسە دە بولادى. سالماعى 200 كەلىدەي بولاتىن قۇرىلعى پلاستماسسادان جاسالعان.

بۇگىن مىنا 650 كەلىلىك قىتايدا جاسالعان اۋە تاكسيى سىناقتان ءوتتى. ۇيىمداستىرۋشىلار بورتقا جولاۋشى ورنىنا 20 كەلىدەن ءتورت قاپ كۇرىش سالدى. درون ەلەكتر قوزعالتقىشىندا جۇمىس ىستەيدى، سوندىقتان ول تىكۇشاق سياقتى شۋلى ەمەس. درون ەلۋ مەتر بيىكتىكتە ءبىر شاقىرىم سەگىز ءجۇز مەتر ۇشىپ ءوتىپ، قاجەتتى نۇكتەگە امان- ەسەن قوندى.

كورەيا ۇكىمەتى بيىل جازدا قالالىق اۋە كولىگىن دامىتۋ جوسپارىن ۇسىنعان بولاتىن. وسىلايشا ەندى 2025 -جىلدان باستاپ سەۋلدە 30-50 شاقىرىم قاشىقتىققا تاكسيمەن ۇشۋعا بولادى. بۇل ءوز كەزەگىندە كولىك كەپتەلىسىن ازايتۋعا مۇمكىندىك بەرەدى.

لي ران، كورەيا جەر، ينفراكۇرىلىم جانە كولىك مينيسترلىگىنىڭ ءبولىم باستىعى:

- كورەيالىق كومپانيالار دا تاكسي- درونداردى جاساپ جاتىر. مەنىڭ ويىمشا، ءبىزدىڭ دروندار كوپ دەگەندە 5 جىل ىشىندە پايدا بولادى. ەڭ باستىسى، ءبىز تاكسي جانە پوشتا دروندارى سەۋل ورتالىعىندا قاۋىپسىز ۇشا الاتىنىن كورسەتتىك. كورەيا ۇكىمەتى تاراتقان دەرەكتەرگە سايكەس، وتاندىق تاكسي دروندارى ساعاتىنا 300 شاقىرىمعا دەيىن جىلدامدىقپەن ۇشا الادى.

مۇنداي درون ينچحونداعى اۋەجايدان سەۋلگە دەيىنگى 40 شاقىرىم قاشىقتىقتى 15 مينۋتتا ۇشىپ وتەدى. ساپار باعاسى ءجۇز دوللارعا دەيىن بولماق. دەسە دە، قالالىق اۋە كولىگى نارىعىندا باسەكەلەستىك ارتا تۇسسە، اۋە ساياحاتىنىڭ قۇنى ارزانداۋى بەك مۇمكىن.

www.24.kz