الماتىدا كينوتەاترلار قايتا جابىلا ما؟
بۇل سۇراققا ونلاين بريفينگ بارىسىندا الماتىنىڭ باس سانيتارلىق دارىگەرى جانداربەك بەكشين جاۋاپ بەردى، دەپ حابارلايدى قازاقپارات ءتىلشىسى.
جانداربەك بەكشين قازاقستاننىڭ باس سانيتارلىق دارىگەرىنىڭ № 57 قاۋلىسىنا سايكەس، الماتىداعى كينوتەاترلاردىڭ جۇمىس ىستەۋىنە رۇقسات بەرىلگەنىن اتاپ ءوتتى.
«كەلۋشىلەردىڭ بىرەۋى اۋرۋ جۇقتىرسا، كينوتەاترلار جابىلمايدى. ينفەكتسيا فاكتىسى راستالسا، وندا ول قارقىندى تۇردە دەزينفەكتسيالانادى. ەگەر ينفەكتسيانىڭ قايتالانعان جاعدايلارى بولسا، وندا بۇل كينوتەاتر جابىلۋى ابدەن مۇمكىن. بۇل ماسەلە ءالى دە قاراستىرىلاتىن بولادى. ءبىز بارلىق تۇرعىندار مەن كاسىپكەرلەردەن دەنساۋلىق ساقتاۋ مينيسترلىگىنىڭ بارلىق پروفيلاكتيكالىق شارالارى مەن تالاپتارىن ورىنداۋدى سۇرايمىز»، - دەپ جاۋاپ بەردى جانداربەك بەكشين.
ەسكە سالايىق، الماتىداعى كينوتەاترلارعا 26 -قازاننان باستاپ جۇمىس ىستەۋگە رۇقسات بەرىلگەن. بۇعان دەيىن قالاداعى كينوتەاترلاردىڭ قالاي جۇمىس ىستەيتىنى تۋرالى حابارلانعان بولاتىن.
