مەركىدە جالعىزباستى مۇگەدەك اناعا اۋىلداستارى اسارلاتىپ ءۇي سالىپ بەردى

مەركى اۋدانىندا «اسارلاتىپ ءۇي سالۋ جوباسى» اياسىندا تاعى دا ءبىر ءۇي يەسىنە تاپسىرىلدى. بۇل جولى جامبىل اۋىلدىق وكرۋگىندە جالعىزباستى، 2-توپتاعى مۇگەدەك انا ماحيرا ءامىرقۇلوۆا جوبا اياسىندا باسپانالى بولدى. اۋىل تۇرعىندارى جۇمىلا اتسالىسقان ءۇي ەڭسەسى بيىك ءارى كەڭ.

وكرۋگ اكىمى ەربول بايبولسىنوۆ تامىز ايىندا باستالعان باسپانا اۋىل تۇرعىندارىنىڭ ىنتىماعى مەن اۋىزبىرشىلىگىنىڭ ارقاسىندا بىتكەنىن جەتكىزدى. اتسالىسقاندارعا العىس ايتتى. قونىس تويعا ارنايى كەلگەن اۋدان اكىمىنىڭ ورىنباسارى باقىتحان ءابجاپاروۆ، ارداگەرلەر كەڭەسىنىڭ ءتوراعاسى قامبار يمانالييەۆ، اۋىل قاريالارى مەن جومارتتىق جاساعان ازاماتتار ىزگى تىلەكتەرىن ايتىپ، ءۇي يەسىنە جۇرەكجاردى لەبىزدەرىن جاۋدىردى. وكرۋگى اكىمى قۇرىلىس جۇمىستارىنا اتسالىسقان ءبىرقاتار ازاماتتاردى ماتەريالدىق تۇرعىدا كومەك قولىن سوزىپ، ازاماتتىق تانىتقانى ءۇشىن العىس حاتپەن ماراپاتتادى. ال قىزىل لەنتا قيىلىپ، جاڭا باسپانا يەسى ماحيرا ءامىرقۇلوۆاعا ءۇيدىڭ كىلتى تابىس ەتىلدى.

«وسى ءىستىڭ ۇيىمداستىرعان اۋىل اكىمدىگىنە جانە جۇمىلا ءۇي سالىپ بەرگەن بارلىق اۋىلداستارىما العىسىمدى ايتامىن. ءوزىم ەكىنشى توپتاعى مۇگەدەكپىن. مۇنداي ءۇي سالۋ ماعان ارمان ەدى. قىزىم ەكى بالاسىمەن مەنىمەن بىرگە تۇرادى. كۇيەۋ بالام قايتىس بولعان. قۋانىشىمدى سوزبەن ايتىپ جەتكىزە المايمىن» ، - دەيدى قونىس توي يەسى.

ايتا كەتەيىك، ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا، جامبىل وبلىسى اكىمىنىڭ قولداۋىمەن ەلىمىز بويىنشا العاش رەت جامبىل وڭىرىندە قولعا الىنعان «اسارلاتىپ ءۇي سالۋ» جوباسى ىسكە اسىرىلىپ جاتىر. جوبانىڭ ماقساتى - «اسار» ءداستۇرىن جاڭعىرتۋ، حالىقتى بەرەكە- بىرلىككە باستاۋ.

باسپاناعا مۇقتاج وتباسى اۋىل اقساقالدارىنىڭ شەشىمىمەن انىقتالادى. جوبادا باسىمدىق الەۋمەتتىك از قامتىلعان، مۇمكىندىگى شەكتەۋلى، كوپبالالى وتباسىلارعا بەرىلەدى. وبلىس بويىنشا بارلىعى 123 ءۇيدىڭ كىلتىن تابىس ەتۋ جوسپارلانعان. بۇگىنگى دەيىن كوپتىڭ كومەگىمەن سالىنعان وسىمەن 22 ءۇي پايدالانۋعا بەرىلىپ وتىر. قالعان ۇيلەردىڭ قۇرىلىسى قارقىندى جۇرگىزىلۋدە.