جۇمىس ورنىندا دەنە جاتتىعۋلارىن جاساۋدىڭ پايداسى قانداي

«جاتتىعۋدى ءبىز ورتالىعىمىزدىڭ كەڭ دالىزىندە، الەۋمەتتىك اراقاشىقتىقتى ساقتاي وتىرىپ جاسايمىز. وعان ورتالىق قىزمەتكەرلەرى، جاس ەرەكشەلىكتەرىنە قاراماستان ەرىكتى تۇردە جينالادى. كوبىنە جاتتىعۋدى ءوزىم جۇرگىزەمىن. كۇندە ءتۇرلى قيمىل- قوزعالىستار جاسايمىز»، - دەدى دەنساۋلىق ساقتاۋدى دامىتۋ رەسپۋبليكالىق ورتالىعى باس ديرەكتورىنىڭ كومەكشىسى ريمما شيتكەنوۆا.

دەنساۋلىق ساقتاۋدى دامىتۋ رەسپۋبليكالىق ورتالىعىنىڭ باس ديرەكتورى قانات توسەكبايەۆتىڭ ايتۋىنشا، جۇمىس ۋاقىتى باستالار الدىندا 10 مينۋت دەنە جاتتىعۋىن جاساۋ ادامدى سەرگىتىپ، ەڭبەك قابىلەتتىلىگىن ارتتىرادى.

«كەڭسەدە ءبىر ورىندا تاپجىلماي وتىرىپ، جۇمىس ىستەۋ دەنساۋلىققا كەرى اسەرىن دە تيگىزەدى. ماسەلەن، ومىرتقا قيسايادى، مويىننىڭ قان تامىرلارى بىلەۋلەنەدى، جۇيكە اۋرۋلارى پايدا بولادى. سوندىقتان، بۋىندى جازىپ، قان اينالىمىن جاقسارتۋ ءۇشىن جاتتىعۋعا 10 مينۋت بولگەن دۇرىس. ءارى بۇل جاڭاشىلدىقتى ەڭ الدىمەن قول استىنداعى قىزمەتكەرلەرىنىڭ دەنساۋلىعىن ويلايتىن ءار باسشى قولداۋى ءتيىس دەپ ويلايمىن»، - دەيدى قانات توسەكبايەۆ.

ەسكە سالا كەتەيىك، ق ر دەنساۋلىق ساقتاۋ مينيسترلىگىنىڭ 2020 -جىلعى 28 - قازانداعى بۇيرىعى بويىنشا دەنە جاتتىعۋىمەن شۇعىلدانۋدىڭ ۇلگىلىك قاعيدالارى بەكىتىلگەن بولاتىن. ەرەجەگە سايكەس، دەنە شىنىقتىرۋ جاتتىعۋلارى جۇمىس كۇنىنىڭ ءبىرىنشى جارتىسىندا ورىندالىپ، ۇزاقتىعى 10-15 مينۋتتان اسپاۋى ءتيىس.

اۆتور: ءاليحان اسقار