پاۆلودار وبلىسىندا زياندى ادەتكە اۋەستەنگەندەر كوبەيگەن

مامانداردىڭ ايتۋىنشا، زياندى ادەتكە بوي ۇرۋعا كارانتيندىك شارالاردىڭ سالدارى دا تيگەن. بۇگىندە وبلىستىق پسيحيكالىق دەنساۋلىق ورتالىعىنىڭ كۇندىزگى ستاتسيونارى لىق تولى. ولارعا پسيحولوگيالىق جانە ءدارى-دارمەكتىك ەم-دوم شارالارى تاعايىندالىپ، جان-جاقتى كومەك كورسەتىلىپ جاتىر.

ءتىلشى: - 66 جاستاعى زەينەتكەردىڭ بويىندا پاندەميا كەزىندە قورقىنىش پايدا بولىپتى. ۇيرەيلەنگەنى سونشالىق، ەلەستەر دە كورىنە باستاعان. بۇعان شىداي الماعان ازامات وبلىستىق ناركولوگيالىق ديسپانسەرگە كەلىپ، ەمدەلە باستاپتى.

ەمدەلۋشى: - اۋرۋحاناعا ءوز ەركىممەن كەلدىم. ناركولوگ- ماماندارعا جاعدايىمدى ءتۇسىندىردىم. دارىگەرلەر جىلى قابىلداپ، ەمدەۋ كۋرسىن تاعايىندادى. قازىر ءتاۋىر بولىپ قالدىم. 32 كۇن ەم الىپ جاتىرمىن. تولىق كۋرستان وتكەن سوڭ ۇيىمە ورالامىن.

ءتىلشى: - مامانداردىڭ ايتۋىنشا، ىشىمدىككە سالىنعانداردىڭ ورتاشا جاسى 40-تار شاماسىندا. بۇگىندە وبلىستىق پسيحيكالىق دەنساۋلىق ورتالىعىندا ەم قابىلداپ جاتقان ناۋقاستاردىڭ ىشىندە كارىسى دە، جاسى دا بار. ماسەلەن، وردا بۇزار جاسقا تولعان بۇل جىگىتتىڭ تەنتەك سۋعا اۋەستەنگەنى سونشالىق، ۋلانىپ قالعان. ەندى زياندى ادەتتەن ارىلۋدى قالايدى.

ەمدەلۋشى: - ەم جاقسى ءجۇرىپ جاتىر. ەرتەڭ 10 كۇن بولادى. كەيىنگى بەتتە جامان اۋىرىپ جاتقانمىن. قازىر جاقسى ءجۇرىپ ءجۇرمىن. اسقازانىم دا كىشكەنە اۋىرعان. ونى دا ەمدەدى.

ءتىلشى: - سوڭعى جىلدارى ورتالىققا ءوز ەركىمەن كەلگەن ازاماتتاردىڭ سانى ارتىپ كەلەدى. جىل باسىنان بەرى 600 دەن استام ناۋقاس 45 كۇندىك كۋرستان ءوتىپ، ادەتىمەن كۇرەسۋگە بەل بۋىپتى.

ەلەنا بودروۆا، وبلىستىق پسيحيكالىق دەنساۋلىق ورتالىعىنىڭ ناركولوگى: - ىشىمدىك كەز كەلگەن پسيحوبەلسەندى زات سياقتى پسيحيكالىق جانە فيزيكالىق تاۋەلدىلىك تۋدىرادى. بىزگە كەلگەن ازاماتتار پاندەميا كەزىندەگى قورقىنىش پەن ۇرەيدى توقتاتۋ ءۇشىن تەنتەك سۋدى ىشكەندەرىن جاسىرمادى. ماسەلەنىڭ الەۋمەتتىك جاعى دا بار. الەۋمەتتىك جاعدايى ءۇشىن قاتتى الاڭداعاندار دا پروبلەماسىن ۇمىتۋ ءۇشىن تەنتەك سۋعا اۋەستەنۋى مۇمكىن.

ادام بويىندا ىشىمدىككە اۋەستىك، تاۋەلدىلىك بەلگىلەرى پايدا بولسا، دەرەۋ دارىگەردىڭ كومەگىنە جۇگىنگەن ابزال. قازىرگى ۋاقىتتا مەديتسينالىق مەكەمەنىڭ كۇندىزگى ستاتسيونارى تولىق. ولارعا مەديتسينالىق ساقتاندىرۋ اياسىندا تەگىن كومەك كورسەتىلەدى.

ەلەنا بودروۆا، وبلىستىق پسيحيكالىق دەنساۋلىق ورتالىعىنىڭ ناركولوگى:

- ابستينەنتتى سيندروم - اۋرۋدىڭ كەڭ تاراعان بەلگىسى. حالىق اراسىندا «باس جازۋ» دەپ اتالادى. وسى بەلگى پايدا بولسا، دابىل قاققان ءجون. سەبەبى الكوگوليزم سىرقاتىن ەمدەۋدى باستاپقى كەزەڭدە باستاعان ءجون. سوندا ناتيجە بولادى. بۇل اۋرۋمەن كۇرەستە تاعى ءبىر ماسەلە بار. ناۋقاس پروبلەمانىڭ بارىن مويىنداماسا، ولاردى ەمدەۋ قيىن. ماجبۇرلەپ ەمدەۋ دە بار. ءبىراق ادام ءوز ەركىمەن ەم قابىلداعان ءجون.

وكىنىشكە قاراي، ىشىمدىككە اۋەس جانداردىڭ قاتارىندا كامەلەتتىك جاسقا تولماعاندار دا بار. قازىرگى ۋاقىتتا 54 جاس ءوسپىرىم ديسپانسەرلىك ەسەپكە الىنعان.